چیئرمین سینیٹ دا بیلجیئم دے شاہی لوکاں دے اعزاز اچ استقبالیہ، سیاسی و سماجی شخصیات دی شرکت

اسلام آباد۔ 13 مئی (اے پی پی) چیئرمین سینیٹ سید یوسف رضا گیلانی بیلجیئم دے شہزادہ ایڈورڈ ڈی لائن لا ٹرموئیل تے شہزادی ازابیلا اورسینی ڈی لائن لا ٹرموئیل دے اعزاز اچ استقبالیہ ݙتا جیندے اچ پیپلز پارٹی دے چیئرمین بلاول بھٹو زرداری، ڈپٹی چیئرمین سینیٹ سیدال خان ناصر، رکن قومی اسمبلی سید عبدالقادر گیلانی، رکن قومی اسمبلی سید علی قاسم گیلانی، رکن قومی اسمبلی علاؤ الدین جونیجو، رکن قومی اسمبلی شرمیلا فاروقی، ڈپٹی چیف آف مشن امریکہ ٹو پاکستان نٹالی بیکر، یورپ اچ پاکستان ڈائسپورہ دے عامر شیخ تے ٻئے اراکین پارلیمنٹ و سفارتکاراں شرکت کیتی۔ چیئرمین سینیٹ شاہی مہماناں کوں خوش آمدید آکھدے آکھیا جو پاکستان سانڳے اعزاز دی ڳالھ اے جو بیلجیئم دے شاہی خاندان دی ممتاز شخصیات پاکستان تشریف گھن آئن ۔ انہاں آکھیا جو اے دورہ محض سفارتی تعلقات دا اظہار کائنی بلکہ پاکستان تے بیلجیئم دے عوام وچال دوستی، خیرسگالی تے سانجھے احترام دی علامت اے۔ سید یوسف رضا گیلانی آکھیا جو بیلجیئم دے شاہی خاندان کوں یورپ دے قدیم ترین تے باوقار شاہی خانوادیاں اچ شمار کیتا ویندے تے معزز مہماناں دا اے دورہ ݙوہیں ملکاں وچال دوستی تے خیرسگالی دے پیغام کوں ٻیا تکڑا کریسی۔ انہاں آکھیا پاکستان، بیلجیئم کوں یورپی یونین دے ہک قابل اعتماد دوست تے اہم شراکت دار دے طور تے ٻہوں قدر دی نگاہ نال ݙیہدے۔ چیئرمین سینیٹ عوامی رابطیں دی اہمیت تے زور ݙیندے آکھیا قوماں وچال پائیدار تعلقات صرف معاہدیں تے اداریں توں کائنی بلکہ ثقافتی ہم آہنگی، ذاتی رابطیں تے بامقصد مکالمے نال بݨدن۔ انہاں آکھیا شاہی وفد دا اے دورہ سانجھے احترام، اعتماد تے مشترکہ اقدار تے مبنی سفارتکاری دی بہترین مثال اے۔ انہاں پاکستان دی قدیم تہذیب، ثقافتی تنوع تے مہمان نوازی دی روایتاں دا ذکر کریندے امید ظاہر کیتی جو معزز مہمان پاکستان دے عوام دی محبت، خلوص تے گرمجوشی کوں نیڑے توں محسوس کریسن۔ ݙو طرفہ تعلقات تے ڳالھ کریندے چیئرمین سینیٹ آکھیا پاکستان تے بیلجیئم وچال تعلقات کئی ݙہاکیں تے محیط اعتماد، تعمیری تعاون تے بین الاقوامی اشتراک تے مبنی ہن۔ انہاں آکھیا جو تجارت، پارلیمانی رابطے، تعلیم، ثقافت تے ترقیاتی تعاون سودھے مختلف شعبیں اچ ݙوہیں ملکاں وچال اشتراک مسلسل ودھدا پئے۔ سید یوسف رضا گیلانی آکھیا بھانویں جو پاکستان تے بیلجیئم جغرافیائی لحاظ نال ہک ٻئے توں پرےہن، پر ݙوہیں ملک مکالمے، امن، جمہوری اقدار تے مشترکہ خوشحالی جیھے اصولاں تے ہکو جیہا یقین رکھدن۔ انہاں جی ایس پی پلس فریم ورک دے تحت پاکستان سانڳے بیلجیئم دی حمایت دی تعریف کیتی تے آکھیے جو ایں تعاون توں پاکستان تے یورپی یونین وچال معاشی رابطیں کوں ٻئی تقویت ملی اے۔ عالمی چیلنجز دا ذکر کریندے چیئرمین سینیٹ آکھیا موسمیاتی تبدیلی، معاشی غیر یقینی صورتحال، امن تے سماجی ہم آہنگی جیہے مسئلیں اجتماعی دانش تے مضبوط عالمی تعاون دے متقاضی ہن۔ انہاں خطے اچ امن، استحکام تے بین الاقوامی ہم آہنگی دے ودھارے سانڳے پاکستان دے عزم دا اعادہ کیتا۔ انٹر پارلیمانی سپیکرز کانفرنس دے بانی چیئرمین دی حیثیت نال سید یوسف رضا گیلانی پارلیمانی سفارتکاری کوں ٻیا مضبوط بݨاوݨ دی خواہش دا اظہار کریندے پاکستان تے بیلجیئم دی پارلیماناں وچال رابطیں اچ ودھارے دا خیرمقدم کیتا۔ چیئرمین سینیٹ ݙوہیں ملکاں وچال مضبوط تعلقات، دیرپا امن تے ٻئے گہرے تعاون سانڳے نیک تمناواں دا اظہار کیتا۔ بیلجیئن شہزادے تقریب توں خطاب کریندے چیئرمین سینیٹ سید یوسف رضا گیلانی ولوں استقبالیہ تے شکریہ ادا کیتا تے عالمی سطح تے امن دے ودھارے سانڳے پاکستان دی کوششاں دی تعریف کیتی ۔ انہاں آکھیا یورپی ملک عالمی امن دے ودھارے اچ پاکستان دے تعمیری کردار کوں قدر دی نگاہ نال ݙیہدن تے امید ظاہر کیتی جو پاکستان دی سفارتی کوششاں وسیع عالمی جھیڑیں کوں روکݨ تے بین الاقوامی استحکام دے ودھارے اچ مددگار ثابت تھیسن۔