وفاقی وزیر ڈاکٹر مصدق ملک نال آذربائیجان دے سفیر خضر فرہادوف دی ملاقات

اسلام آباد۔ 13 مئی (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے آذربائیجان پاکستان دے اہم ترین اسٹریٹجک شراکت داراں اچوں ہک اے، ݙوہیں ملکاں دے وچال تکڑے تعلقات سانجھے اعتماد، مشترکہ قدراں تے علاقائی رابطیں تے مبنی ہن۔ انھاں اے ڳالھ پاکستان اچ آذربائیجان دے سفیر خضر فرہادوف کوں آکھی جنہاں انھاں نال اتھاں ملاقات کیتی۔ ملاقات دے دوران ݙوہیں پاسوں پاکستان تے آذربائیجان وچال ݙو طرفہ تعلقات کوں ٻیا تکڑابݨاوݨ، جاری تعاون، تے سانجھے مفاد تے مبنی مشترکہ منصوبیں دے موقعیں تے ڳالھ مہاڑ کیتی ڳئی ۔ آذربائیجان دے سفیر وفاقی وزیر کوں آندے ورلڈ اربن فورم دے حوالے نال بریفنگ ݙتی تے باکو دے متوقع دورے دے دوران ڈاکٹر مصدق ملک دی آذربائیجان دے وزرائے توانائی تے ماحولیات نال ممکنہ ملاقاتاں تے وی ڳالھ کیتی ۔ ملاقات دے دوران سفیر خضر فرہادوف پاکستان، ترکیہ تے وسطی ایشیائی ملکاں وچال ودھدے تعاون تے ترقی تے اطمینان دا اظہار کیتا۔ انھاں آکھیا انھاں ملکاں وچال تکڑے اتحاد تے مشترکہ منصوبے علاقائی اقتصادی ترقی تے مشترکہ خوشحالی اچ اہم کردار ادا کرسڳدن۔ ݙوہیں پاسوں پاکستان تے آذربائیجان دے عوام دے وچال ودھدے رابطیں تے وی ڳالھ مہاڑ کیتی ڳئی تے سفر دی ودھدی ہوئی طلب پاروں ݙوہیں ملکاں وچال پروازاں دی تعداد ودھاوݨ دے امکانات دا جائزہ ڳھدا ڳیا۔ گزریل سال تقریباً ہک لکھ 20 ہزار پاکستانی شہریاں کوں آذربائیجان دے ای-ویزا تے سوکھے ویزا جاری کیتے ڳئن، جنھاں اچوں تقریباً نوے ہزار پاکستانیاں آذربائیجان دا دورہ کیتا۔ ملاقات اچ سیاحت دے شعبے اچ تعاون ودھاوݨ دے موقعیں تے وی ڳالھ تھئی ۔ سفیر خضر فرہادوف آکھیا پاکستان اپݨے متنوع قدرتی مناظر، ساحلاں، پہاڑاں تے قدرتی حسن پاروں سیاحت دے ٻہوں زیادہ امکانات رکھیندے۔ ڈاکٹر مصدق ملک آکھیا پاکستان آذربائیجان دے سیاحت دے شعبے دی ترقی دے تجربے توں فیدہ چا سڳدے۔ انھاں آکھیا سیاحت تے ایندے نال جڑی ہوئی صنعتاں دا ودھارا پاکستانی نینگراں سانڳے لکھاں روزگار دے موقع پیدا کرسڳدے۔