وزیر ریلوے دا شہید گینگ میٹ سانڳے بعد از شہادت ستارۂ شجاعت دی منظوری تے صدرِمملکت تے وزیراعظم توں اظہارِ تشکر

اسلام آباد۔ 13 مئی (اے پی پی) وفاقی وزیر ریلوے محمد حنیف عباسی وزیراعظم محمد شہباز شریف تے صدرِ مملکت آصف علی زرداری دی طرفوں ریلوے دے شہید گینگ میٹ لیاقت علی سانڳے بعد از شہادت “ستارۂ شجاعت” دی منظوری تے ٻہوں اطمینان تے شکریہ ادا کیتے۔ وزارتِ ریلوے توں جاری بیان اچ وفاقی وزیر حنیف عباسی صدرِ مملکت تے وزیراعظم دا دلوں شکریہ ادا کریندے ایں فیصلے کوں شہداء سانڳے ٻہوں وݙا قومی اعزاز قرار ݙتا۔ انھاں آکھیا اے فیصلہ شہید لیاقت علی دی دہشت گردی دے خلاف بے مثال قربانی، جرات تے فرض شناسی دے اعتراف اچ کیتا ڳئے، ایجھے فیصلے نہ صرف شہداء دے خانداناں سانڳے تسلی دا باعث تھیندن بلکہ قوم کوں یکجہتی، قربانی تے حب الوطنی دا پیغام وی ݙیندن۔ وفاقی وزیر آکھیا شہید لیاقت علی دی قربانی پوری قوم سانڳے ماݨ، حوصلے تے عزم دی علامت اے۔ اتھاں پاکستان ریلوے اپݨے بیان اچ آکھیے ادارہ اپݨے شہداء دی عظیم قربانیاں کوں ہمیشہ یاد رکھیسی تے انھاں دے اہل خانہ دے نال ہر اوکھے ویلھے کھڑا رہسی۔