چیئرمین این ڈی ایم اے دی متعلقہ اداریں کوں مربوط تے فعال تیاریاں، فوری رسپانس تے مسلسل رابطہ کاری یقینی بݨاوݨ دی ہدایت

اسلام آباد۔ 13 مئی (اے پی پی) نیشنل ڈیزاسٹر مینجمنٹ (این ڈی ایم اے) دے چیئرمین لیفٹیننٹ جنرل انعام حیدر ملک وقتی الرٹس تے عوامی آگاہی کوں جانی و مالی تحفظ کیتے ناگزیر قرار ݙیندے سارے متعلقہ اداریں کوں مربوط تے فعال تیاریاں، فوری رسپانس تے مسلسل رابطہ کاری یقینی بݨاوݨ دی ہدایت کیتی اے۔بدھ کوں این ڈی ایم اے میڈیا ونگ توں جاری بیان موجب قومی و عسکری قیادت دی ہدایات تے این ڈی ایم اے قومی ساوݨ کانفرنس دا انعقاد کیتا۔ کانفرنس دا مقصد ساوݨ سیزن 2026 دے ممکنہ خطرے نال نبڑݨ کیتے پہلے توں تیاری کوں یقینی بݨاوݨ ہئی۔ این ڈی ایم اے ہیڈ کوارٹر اسلام آباد اچ تھیوݨ آلی کانفرنس اچ ساوݨ سیزن کیتے قومی تیاریاں تے اداریں وچال رابطہ کاری دا جائزہ ڳھدا ڳیا۔ این ای او سی دی طرفوں جاری ابتدائی ڈیزاسٹر ارلی وارننگ (DEW-3) دے تناظر اچ کئی خطرات نال نبڑݨ کیتے تیاریاں دا جائزہ ڳھدا ڳیا۔جون توں ستمبر تئیں گرمی دی زور دی لہر، چھل ، گلیشیائی جھیلاں دی چھل ، شہراں اچ چھل دی صورتحال تے لینڈ سلائیڈنگ جیھے خطرے دا شدید ݙر اے۔ چیئرمین این ڈی ایم اے لیفٹیننٹ جنرل انعام حیدر ملک وقتی الرٹس تے عوامی آگاہی کوں جانی و مالی تحفظ کیتے ناگزیر قرار ݙے ݙتا۔ انھاں سارے متعلقہ اداریں کوں مربوط تے فعال تیاریاں، فوری رسپانس تے مسلسل رابطہ کاری یقینی بݨاوݨ دی ہدایت کرݙتی۔این ای او سی موجب 2026 دا ساوݨ ملک اچ غیر متوازن مینھ دا سبب بݨ سڳدے، شمالی علاقیں اچ زیادہ جݙاں جو میدانی تے جنوبی علاقیں اچ گھٹ مینھ دا امکان اے۔ ابتدائی ساوݨ آوݨ دے باوجود جنوبی تے میدانی علاقیں اچ معمول توں ودھ درجہ حرارت تے گرمی دی شدت برقرار رہݨ دا امکان اے۔ شمالی پاکستان اچ زور دا مینھ ، مغربی ہواوئیں، تکھے پگھلدے گلیشیئرز، جھیلاں دی چھل، لینڈ سلائیڈنگ تے اچانک چھل دے کٹھے خطرے دا امکان اے۔این ڈی ایم اے حساس علاقیں اچ پہلے توں تیاریاں، وقتی الرٹس تے وقتی رسپانس میکنزم کوں ٻیا مؤثر بݨاوݨ دی ہدایت کر ݙتی۔ مقامی فلاحی اداریں، مقامی رضاکاراں تے سول سوسائٹی کوں ضلعی تے مقامی سطح تے فعال بݨاوݨ تے زور، مقامی سطح تے تیاریاں کوں ٻیا مؤثر بݨاوݨ دی ہدایت کیتی اے۔ کانفرنس اچ ریسکیو آلات، مشینری، سامان دی وقتی ترسیل، ایمرجنسی وسائل تے ریلیف سٹاک دی دستیابی دا تفصیلی جائزہ ڳھدا ڳیا۔ ممکنہ ہنگامی صورتحال نال نبڑݨ کیتے ریلیف کیمپس، انخلاء منصوبہ بندی، رابطہ نظام تے حساس علاقیں اچ پہلے توں اقدامات تے مشورہ کیتا ڳیا۔ شمالی علاقیں اچ سیاحواں دی حفاظت، اہم انفراسٹرکچر دے تحفظ تے عوامی آگاہی مہمات کوں ٻیا مؤثر بݨاوݨ تے اتفاق کیتا ڳیا۔ پی ڈی ایم ایز، پی ایم ڈی، این ایچ اے، واپڈا، مسلح افواج، ریسکیو سروسز تے ٻئے اداریں مربوط قومی حکمتِ عملی دے تحت مکمل تعاون جاری رکھݨ دے عزم دا اعادہ کیتا۔