دہشت گردی دے خلاف جنگ ملک دی بقاء دی جنگ اے، پاکستان دے خلاف جنگ کابل حکومت دے ذریعے لڑی ویندی پئی اے، جیڑھا دہلی دے نال کیتے اوھو کابل دے نال وی تھیسی، وزیر دفاع خواجہ محمد آصف

اسلام آباد۔ 13 مئی (اے پی پی) وزیر دفاع خواجہ محمد آصف آکھیے دہشت گردی دے خلاف جنگ پاکستان، سارے صوبیں تے ملک دی بقاء دی جنگ اے، پاکستان دے خلاف جنگ کابل حکومت دے ذریعے لڑی ویندی پئی اے، پاکستان دے حوالے نال ایں ویلھے دہلی تے کابل اچ کوئی فرق کائنی، پاکستان دی مسلح افواج بلتستان توں گھن کراہیں گوادر تئیں پاکستان کیتے شہادتاں ݙیندیاں پئن۔قومی اسمبلی دے اجلاس اچ اپوزیشن ارکان دے چاتے ڳئے نکات دا جواب ݙیندے وزیر دفاع خواجہ محمد آصف آکھیا اے ڳالھ چنڳی اے جو ایں ویلھے دہشت گردی دے معاملے تے وفاق خیبرپختونخوا حکومت دے نال اے، نقصان ساݙا ہک اے، پاکستان کابل حکومت دے نال لمبی ڳالھ مہاڑ کیتی اے پر او اپݨی سرزمین کوں پاکستان دے خلاف استعمال نہ کرݨ دے حوالے نال کہیں قسم دے تحریری تعاون کیتے تیار کائنی، ایں ویلھے افغانستان دی حکومت بھارت تے ہندواتوا دی پراکسی بݨ ڳئی اے، معرکہ حق اچ شکست دے بعد بھارت اللہ تعالیٰ دے فضل و کرم نال پاکستان دے خلاف براہِ راست تصادم دی جرات کائناں کریسی، ہݨ پاکستان دے خلاف ساری جنگ کابل حکومت دے ذریعے لڑی ویندی پئی اے۔وزیر دفاع آکھیا افغانستان دی پشت پناہی تے سہولت کاری نال پاکستان دی سرزمین تے دہشت گردی تھیندی پئی ہئی، ایں ماحول دے باوجود پاکستان افغانستان دے نال ڳالھ مہاڑ کیتی جیندے اچوں کوئی نتیجہ کائنی نکلیا۔ وزیر دفاع آکھیا تھی سڳدے کہیں تریجھے ملک دے ذریعے رابطے دیاں کوششاں تھیندیاں ہوون اساں ایندے حوالے نال حتمی ڳالھ کائنی کرسڳدے۔ وزیر دفاع آکھیا دہشت گردی دے معاملے تے لمبے عرصے تئیں اساکوں خیبرپختونخوا حکومت دا تعاون میسر کائناں ہئی پر ہݨ اے تعاون ݙتا ویندا پئے، اے چنگی ڳالھ اے جو دہشت گردی دے خلاف سارے ہک صفحے تے ہوون۔وزیر دفاع آکھیا پاکستان پوری دیانتداری دے نال ترائی ملکاں ترکیہ، قطر تے سعودی عرب دے ذریعے کوششاں کیتیاں تے منت کیتی اے جو دہشت گرداں دی پشت پناہی چھوڑ ݙیو، دہشت گرداں دی تنصیبات، کیمپاں کوں ختم کیتا ونڄے تے انھاں دی سہولت کاری دا سلسلہ روک ݙتا ونڄے پر او ایں ڳالھ  تے کائنی آندے، ایندا ہک مطلب نکلدے جو “تنگ آمد بہ جنگ آمد”، ول تاں جنگ ای تھیسی، بھاویں مشرقی سرحد ہووے یا مغربی سرحد، ہک ای دشمن ٻیٹھے تے ایندے اچ کوئی فرق کائنی، ایں ویلھے دہلی تے کابل اچ کوئی فرق کائنی، ساݙی خواہش ضرور اے جو اے فرق ہووے تے او ساݙے نال ڳالھ مہاڑ کرے تے ایجھے انتظامات کیتے ونڄن جیندے نال دہشت گردی دا خاتمہ تھی سڳے، پر جے او ایندے کیتے تیار کائنی تاں جیڑھا دہلی دے نال کیتے اوہو کابل دے نال وی تھیسی۔ انھاں آکھیا جو دہشت گردی دے موضوع تے جے ایوان اچ بحث تھیندی اے تاں ایندے کیتے ویلھا مقرر کیتا ونڄ سڳدے۔وزیر دفاع آکھیا پاکستان دی مسلح افواج بلتستان توں گھن کراہیں گوادر تئیں پاکستان کیتے شہادتاں ݙیندیاں پئن، سیاسی فیدے کیتے کائنی بلکہ پاکستان کیتے ڳالھ تھیوݨی چاہیدی اے۔ انھاں آکھیا کل ہک لیفٹیننٹ کرنل شہید تھئے، فوج دی سنڄاݨ پاکستان اے، ترائے مہینے پہلے تئیں خیبرپختونخوا حکومت دی طرفوں دہشت گردی تے کوئی تعاون کائنی کیتا ڳیا، اپوزیشن دے ارکان کوں معرکہ حق دی تقریبات اچ دعوت ݙتی ڳئی پر انھاں تقریبات اچ کوئی کائنی آیا۔ وزیر دفاع آکھیا جو دہشت گردی دے خلاف جنگ پاکستان، سارے صوبیں تے ملک دی بقاء دی جنگ اے، ایں ایوان توں صوبائیت دے ناں تے آوازاں چاتیاں ویسن تاں درست کائنی، مسلح افواج تے قانون نافذ کرݨ آلے اداریں دی سنڄاݨ صرف پاکستان۔