پہلگام واقعے دے بعد عالمی سطح تے بھارت دی ساکھ بری طرح متاثر تھئی، “شائننگ انڈیا” دا بیانیہ عالمی تنہائی اچ تبدیل تھی ڳیا، عطاء اللہ تارڑ

اسلام آباد۔ 13 مئی (اے پی پی) وفاقی وزیر اطلاعات و نشریات عطاء اللہ تارڑ آکھیے پہلگام واقعے دے بعد عالمی سطح تے بھارت دی ساکھ بری طرح متاثر تھئی، “شائننگ انڈیا” دا بیانیہ عالمی تنہائی اچ تبدیل تھی ڳئے، پاکستان دہشت گردی دے خلاف فرنٹ لائن ریاست اے، ایں جنگ اچ ݙتی ونڄݨ آلی قربانیاں ناقابلِ فراموش ہن، پاکستان تے الزام لاوݨ آلا بھارت خود ٻاہرلے ملک سکھ رہنماواں دے قتل اچ ملوث رہیے تے اپݨے داخلی مسئلیں کوں ٻاہرلے تے ٻاہرلے مسئلیں کوں داخلی رنگ ݙیوݨ ایندا وطیرہ رہیے، دہشت گردی بھارت دا داخلی تے جموں و کشمیر بین الاقوامی مسئلہ اے۔ معرکہ حق دے دوران قوم تے مسلح افواج دے اتحاد پاکستان دی دفاعی صلاحیتاں کوں اجاگر کیتا تے ملک دے وقار اچ اضافہ تھئے، پاکستان کوں اڄ سنجیدہ ملک دے طور تے ݙٹھا ویندے جیڑھا بین الاقوامی جھیڑیں دے حل اچ کردار ادا کریندا پئے۔اے ڳالھ انہاں اتھاں انسٹیٹیوٹ آف سٹریٹجک سٹڈیز اچ انڈیا سٹڈی سینٹر دے زیرِ اہتمام “Marka-e-Haq: Victory in the Battlefield and Beyond” دے موضوع تے منعقد تھیوݨ آلے سیمینار نال خطاب کریندے آکھی ۔ تقریب اچ انسٹیٹیوٹ آف سٹریٹجک سٹڈیز دے چیئرمین بورڈ آف گورنرز ایمبیسڈر خالد محمود، سابق وزیر خارجہ جلیل عباس جیلانی، ترجمان دفتر خارجہ طاہر حسین اندرابی، سابق وائس چیف آف ایئر اسٹاف ایئر مارشل ریٹائرڈ فاروق حبیب، معروف سٹریٹجک تجزیہ کار احمد حسن العربی سودھے ٻئی اہم شخصیات وی موجود ہن۔وفاقی وزیر اطلاعات آکھیا جو بھارت پاکستان تے جنگ مسلط کیتی، پاکستان ہمیشہ امن تے یقین رکھیندے تے امن دا علمبردار رہیے۔ انھاں آکھیا پاکستان دہشت گردی دے خلاف فرنٹ لائن ریاست اے، اساں دہشت گرداں تے دنیا وچال ہک کندھ  تے ڈھال بݨ تے کھڑوں۔ انھاں آکھیا بھارت دے بیانیے تے سٹریٹجی اچ کجھ تضادات تے عدم مطابقت پاتی ویندی اے۔ بھارت ہمیشاں ٻاہرلے مسئلیں کوں داخلی تے داخلی مسئلیں کوں ٻاہرلا رنگ ݙیندا رہیے، دہشت گردی بھارت دا داخلی مسئلہ اے، ٻاہرلا کائنی جݙاں جو جموں و کشمیر دا جھیڑا عالمی مسئلہ اے، اقوام متحدہ دی سلامتی کونسل دی قرارداداں جموں و کشمیر دے عوام کوں حقِ خودارادیت ݙیندن۔وفاقی وزیر آکھیا جݙاں پہلگام دا واقعہ پیش آیا تاں بھارت فالس فلیگ آپریشن کوں ہوا ݙیوݨ تے من گھڑت بیانیہ بݨاوݨ دی کوشش کیتی جیندے اچ ٻہوں سارے تضادات موجود ہن۔ پہلگام واقعہ تھیوݨ دے صرف ݙاہ منٹ دے اندر ایف آئی آر درج کر ڳھدی ڳئی، بغیر کہیں تحقیقات دے الزام پاکستان تے لا ݙتا ڳیا۔ انھاں آکھیا پہلگام لائن آف کنٹرول توں سو کلو میٹر توں وی زیادہ فاصلے تے واقع اے، کیویں ممکن اے جو جیں نقل و حرکت دا الزام لاتا ویندا پئے ایندا سراغ وی نہ لاتا ونڄ سڳے۔ انھاں آکھیا جیویں ای پہلگام دا واقعہ پیش آیا تاں اساں فوراً متحرک تھی ڳئے ۔ بیانیے دی اصل قوت ریاستی اداریں وچال اتحاد، ہم آہنگی تے مشترکہ عمل اچ ہوندی اے، سارے ریاستی ادارے ہک پاسو ہن، ساݙا مقصد تے ہدف مشترک ہئی جو سچ کوں موثر طریقے نال دنیا دے سامݨے رکھیا ونڄے۔انھاں آکھیا مئی دی جنگ دے دوران ساݙا بیانیہ ایں کیتے مضبوط ہئی کیوں جو اساں وقتی ، درست فورم تے موثر انداز اچ سچ کوں دنیا دے سامݨے رکھیا، بیانیے دی جنگ اچ اصل اہمیت ایں ڳالھ دی ہوندی اے جو صحیح ڳالھ، درست ویلھے تے درست فورم تے کیتی ونڄے۔ عطاء اللہ تارڑ آکھیا اے ضروری ہوندے جو سٹریٹجک بیانیے دے حوالے نال مخصوص تے تفصیلی مہم ترتیب ݙتی ونڄے، بیانیے دے محاذ تے ساکوں اوں ویلھے ٻہوں تقویت ملی جݙاں وزیراعظم محمد شہباز شریف پاکستان ملٹری اکیڈمی اچ خطاب کریندے پہلگام واقعے دی شفاف، غیر جانبدارانہ تے آزادانہ تحقیقات دی پیشکش کیتی۔ اڄ ہک سال گزر چکئے پر بھارت دی طرفوں ساݙی ایں پیشکش دا کوئی جواب کائنی ݙتا ڳیا تے نہ ہی ݙتا ونڄ سڳدے کیوں جو سارے ڄاݨدن پہلگام واقعہ ہک فالس فلیگ آپریشن ہئی۔ پاکستان ثابت کیتے ساݙے ہتھ صاف ہن جݙاں جو بھارت تحقیقات توں بچدا رہیا تے ول ایں فالس فلیگ آپریشن کوں جواز بݨا تے پاکستان دے اندر نشوم شہریاں تے شہری آبادی کوں نشانہ بݨایا۔انھاں آکھیا بھارت دے موقف کوں عالمی سطح تے ایں عمل نال ٻیا نقصان پڄیا۔ انھاں آکھیا اساں مقامی تے بین الاقوامی صحافیاں دے ہک وفد کوں بیلہ نور شاہ گھن ڳئے جتھاں بھارت دہشت گرد کیمپاں دے ہووݨ دا الزام لاتا ہئی۔ اساں انھاں صحافیاں کوں ایں کیتے اتھاں گھن ڳئے تاں جو دنیا کوں ݙکھایا ونڄ سڳے بھارت دے الزامات بے بنیاد ہن۔ اڳلے ݙینھ ساݙا مریدکے تے بہاولپور ونڄݨ دا پروگرام ہئی پر ایں دوران بھارت جارحیت کر ݙتی۔ انھاں آکھیا اساں اقوام متحدہ دے چارٹر دے تحت اپݨے حق دے مطابق مضبوط تے فیصلہ کن جواب ݙیوݨ اچ حق بجانب ہاسے۔ وفاقی وزیر آکھیا بیانیے دے محاذ تے اساں بین الاقوامی میڈیا نال مسلسل رابطے اچ ہاسے کیوں جو ساݙے کنے دنیا کوں ݙسݨ سانڳے ٻہوں کجھ ہئی۔ انھاں آکھیا پاکستان دہشت گردی دے خلاف فرنٹ لائن ریاست اے جیہڑی دہشت گرداں تے باقی دنیا وچال ہک ڈھال تے کندھ بݨ تے کھڑی اے۔ انھاں آکھیا جݙاں کوئی پاکستانی اپݨی جان دی قربانی ݙیندے تاں او صرف مادرِ وطن سانڳے کائنی ہوندی بلکہ پوری دنیا کوں محفوظ کرݨ سانڳے ہوندی اے۔ انھاں آکھیا دنیا دا کوئی ایجھا ملک کائنی جیں دہشت گردی دی جنگ اچ 90 ہزار جاناں دی قربانی ݙتی ہووے تے سینکڑاں ارب ڈالر دے معاشی ضیان برداشت کیتے ہوون۔وفاقی وزیر آکھیا پاکستان تے دہشت گردی دا الزام ہک ایجھے ملک تے لاتا ویندا پئے جیڑھا خود دنیا اچ سکھ رہنماواں دے قتل اچ ملوث اے، بھارت کینیڈا اچ ہردیپ سنگھ نجر دے قتل سودھے امریکہ، برطانیہ تے دنیا دے مختلف حصیں اچ ٹارگٹ کلنگ دے واقعیں اچ ملوث اے۔ انھاں آکھیا پاکستان دہشت گردی دے خلاف جنگ لڑدا پئے جݙاں جو بھارت دہشت گردی کوں ودھارا ݙیندا پئے، اساں کنے ثبوت موجود ہن، پاکستان اچ گرفتار تھیوݨ آلا بھارتی شہری کلبھوشن یادیو پاکستان اچ تخریبی سرگرمیاں اچ ملوث ہئی تے او حراست اچ اے۔ انھاں آکھیا بیانیے دے محاذ تے پاکستان دا بنیادی موقف ایہو رہیے جو عالمی برادری تئیں حقائق کوں موثر، مربوط تے بروقت انداز اچ پڄایا ونڄے تے ایں مقصد سانڳے درست ویلھا تے درست فورم دا انتخاب کیتا ڳیا۔انھاں آکھیا گزریل سال مئی اچ بھارتی حکومت تے بھارتی میڈیا ولوں کئی دعوے غیر مصدقہ تے مبالغہ آمیز قرار ݙتے ڳئے جݙاں جو پاکستانی میڈیا، علمی حلقیں تے دانشور طبقے ایں صورتحال اچ بھرپور کردار ادا کیتا۔ پاکستانی میڈیا چینلز، سوشل میڈیا پلیٹ فارمز، تجزیہ کاراں، اینکر پرسنز تے رپورٹرز عالمی سطح تے پاکستان دا موقف موثر انداز اچ پیش کیتا ایندے برعکس بھارتی میڈیا دی طرفوں جنگی جنون تے اشتعال انگیزی تے مبنی بیانیہ سامݨے آیا جیندے اچ کئی غیر حقیقی دعوے وی شامل ہن۔ انھاں آکھیا بھارتی میڈیا لاہور تے ملتان دی بندرگاہواں کوں تباہ کرݨ دے کوڑے دعوے کیتے حالانکہ انھاں ݙوہیں شہراں اچ بندرگاہواں کائناں ہن۔ انھاں آکھیا جوایندے برعکس معرکہ حق دے دوران پاکستانی میڈیا مستند، تصدیق شدہ تے قابلِ اعتماد معلومات ݙتیاں، ایں موثر بیانیے پاروں ریاستی اداریں تے میڈیا وچال مکمل ہم آہنگی، رابطہ تے معلومات دا بلا رکاوٹ تبادلہ ہئی۔انھاں آکھیا جوساݙی نینگرنسل جنگ دے اوکھے مرحلے اچ اپݨی انج قسم دی “میم وار” (meme war) شروع کر ݙتی۔ ہک پاسو میزائل تے گولے داغے ویندے پئے ہن تے ݙوجھے پاسو پاکستانی نوجوان اپݨے موبائل فوناں تے لیپ ٹاپاں دے ذریعے تخلیقی میمز تیار کریندے پئے ہن۔ ایں تے مخالف فریق وی حیران ہئی، ایں پورے منظر نامے اچ پاکستان نے اپݨی بہترین کارکردگی ݙکھائی۔ انھاں آکھیا بیانیے دی جنگ ہووے، روایتی عسکری صورتحال ہووے یا سفارتی سطح دی کوششاں، وزارتِ خارجہ تے ٻئے ریاستی اداریں مربوط انداز اچ اپݨا کردار ادا کیتا۔ ایندی بنیادی وجہ ایہو ہئی جو اساں کنے دنیا کوں ݙسݨ سانڳے سچ موجود ہئی جینکوں اساں موثر طریقے نال دنیا تائیں پڄایا۔ ݙوجھے پاسو دشمن مسلسل غلطیاں کریندا رہیا، پوری دنیا ݙٹھا ایندے عزائم کیویں بے نقاب تھئے ۔ انھاں آکھیا معرکہ حق دے دوران سول تے عسکری قیادت ہک پیج تے ہئی، ایں اتحاد ساکوں دنیا کوں اپݨا موقف موثر انداز اچ بیان کرݨ اچ مدد ݙتی۔وفاقی وزیر اطلاعات فیلڈ مارشل سید عاصم منیر دی جرات مندانہ تے بہادر قیادت کوں خراجِ تحسین پیش کریندے آکھیا جو پاکستان دے ردِعمل جیں انداز اچ صورتحال دا مقابلہ کیتا اوں پوری قوم دے حوصلے بلند کر ݙتے۔ عطاء اللہ تارڑ آکھیا پاکستان ہک ذمہ دار ملک اے، معرکہ حق دے دوران پاکستان دشمن دے صرف فوجی اہداف تے فوجی اݙیں کوں نشانہ بݨایا ایندے برعکس بھارت ساݙے شہری علاقیں تے حملے کیتے۔ وفاقی وزیر آکھیا جݙاں بھارت دے اٹھ جہاز ڈٹھے تاں بھارت دا غرور وی زمین بوس تھی ڳیا۔ دنیا دے سامݨے فضائی معرکے اچ ساݙی برتری ثابت تھئی۔ انھاں آکھیا جو ساݙی بحریہ وی ہر قسم دی جارحیت دے جواب سانڳے چوکس تے تیار ہئی، معرکہ حق اچ پوری قوم متحد تے اپݨی افواج دے رلے کھڑی ہئی، اساں اپݨے سیاسی اختلافات کوں پچھوں سٹ ݙتا۔انھاں آکھیا پوری دنیا ݙٹھا پہلگام فالس فلیگ آپریشن تے پاکستان تے لاتے ڳئے بے بنیاد الزامات توں شروع تھی تے پاکستان ہر مرحلے تے درست حکمتِ عملی اپنائی۔ پاکستان دی کامیابی ایں ڳالھ دا ثبوت اے جو ملک اچ مقامی طور تے تیار کیتے ونڄݨ آلے دفاعی آلات تے ٹیکنالوجی کہیں توں گھٹ کائنی۔ وفاقی وزیر آکھیا معرکہ حق دے بعد پاکستان دی عزت تے وقار اچ ودھارا تھئے، عالمی سطح تے پاکستان دی اہمیت تے کردار نمایاں تھئے۔ ہݨ پاکستان دا ناں عزت نال ڳھدا ویندے تے اینکوں ہک سنجیدہ ملک دے طور تے ݙٹھا ویندے جیڑھا بین الاقوامی جھیڑیں دے حل اچ کردار ادا کریندا پئے۔ انھاں آکھیا اڄ دنیا پاکستان دی صلاحیتاں تے استعداد کوں تسلیم کریندی پئی اے جݙاں جو ݙوجھے پاسو مشرقی ہمسائے سینکڑوں ارب ڈالر لابنگ فرمز تے پی آر فرمز تے خرچ کیتے پراڄ شائننگ انڈیا دے بجائے تنہائی دا شکار اے۔ انھاں آکھیا جݙاں کوئی ملک اپݨی پوری بنیاد تے بیانیہ غلط معلومات تے پروپیگنڈے تے رکھئے، اپݨے داخلی مسئلیں کوں ٻاہرلے تے ٻاہرلے مسئلیں کوں داخلی بݨاوے، خطے اچ بالادستی قائم کرݨ دی کوشش کرے، خود کوں جنوبی ایشیاء دا تھاݨیدار سمجھے تاں اے رستہ کݙاہیں کامیاب نی تھی سڳدا۔ عطاء اللہ تارڑ آکھیا معرکہ حق توں قوم دا سر فخر نال اُچا تھئے ، انشاء اللہ پاکستان ٻیا ترقی کریسی تے ایں عظیم قوم دے لوک اپݨے ملک تے ماݨ کریندے رہسن۔