وزیراعلیٰ مریم نواز دا سارے ضلعیں کوں خود مختار بݨاوݨ دا تاریخی فیصلہ، پنجاب اچ ضلعیں دے اپݨے مالی وسیلیں توں ارباں روپے دی لاڳت نال ترقیاتی کماں دا آغاز

لاہور۔ 13 مئی (اے پی پی) وزیراعلیٰ پنجاب مریم نواز سارے ضلعیں کوں خود مختار بݨاوݨ دا تاریخی فیصلہ کیتے۔ پنجاب اچ ضلعیں دے اپݨے مالی وسیلیں توں ارباں روپے دی لاڳت نال ترقیاتی کماں دا آغاز کیتا ویسی۔ وزیراعلیٰ مریم نواز دی صدارت اچ کمشنرز دا اہم اجلاس منعقد تھیا جیندے اچ ڈسٹرکٹ ڈویلپمنٹ پلان دے تحت مقامی ریونیو توں عوامی فلاح دے منصوبیں دی منظوری ݙتی ڳئی۔ اجلاس اچ کمشنرز ساہیوال، سرگودھا، فیصل آباد تے ملتان وزیراعلیٰ کوں دستیاب وسیلیں تے مجوزہ ترقیاتی منصوبیں تے تفصیلی بریفنگ ݙتی۔ اجلاس اچ وزیراعلیٰ کڑے سوال کیتے تے آکھیا “آئی واش” کائناں ، گراؤنڈ ورک  چاہیدے، کمشنرز ہݨ ایئر کنڈیشنڈ کمریں اچ کائناں، فیلڈ اچ نظر آؤن۔مریم نواز فیصل آباد ڈویژن اچ نجی سوسائٹی اچ ترائے سالہ ٻالڑی دے کھلئے کھݙے اچ ڈھہہ تے جاں بحق تھیوݨ دے واقعے تے کاوڑ کیتی ۔ وزیراعلیٰ ہدایت کیتی جے کوئی شہری مین ہول اچ ڈٹھا تاں سوسائٹی مالکان کوں گرفتار کیتا ونڄے۔ وزیراعلیٰ نجی ہاؤسنگ سوسائٹیاں توں ہر مہینے کھلے مین ہولز نہ ہووݨ دا بیانِ حلفی گھنݨ دا وی حکم ݙتا۔ انھاں پنجاب بھر دی ساری نجی سوسائٹیاں کوں نوٹس جاری کرݨ دی ہدایت کیتی تے آکھیا سرکاری و نجی سکولاں دی بلڈنگز تے خاص نظر رکھی ونڄے۔ ساری کنسٹرکشن سائٹس کوں باقاعدہ ایس او پیز موجب کارڈن آف  کیتا ونڄے تاں جو کوئی حادثہ نہ تھیوے۔ وزیراعلیٰ کمشنرز کوں خود فیلڈ وزٹ کرݨ دا حکم ݙتا۔ وزیراعلیٰ آکھیا کمشنرز سارے کے پی آئیز (KPIs) دی کڑی نگرانی کوں یقینی بݨاؤن۔ جے پاور انتظامیہ کول تساݙے کول اے تاں ذمہ واری وی تساݙی ای ہے۔ ساری تحصیلاں اچ ڈیپ کلیننگ (Deep Cleaning) دے عمل کوں یقینی بݨایا ونڄے۔ کجھ افسراں دی کارکردگی بہتر اے پر کجھ صرف آئی واش بݨایا ہویا اے۔ زمین تے اتنا کم نظر کائنی آندا پیا جتنا آوݨا چاہیدا ہئی، عوام کوں ریلیف ملݨا چاہیدے۔ انھاں آکھیا کمشنرز حکومت دیاں اکھیں، کن تے ٻانہیں، اپݨیاں ذمہ واریاں پوریاں کرن۔ ضلعی انتظامیہ کوں میݙے اعتماد دی لاج رکھݨی ہوسی، غفلت دی گنجائش کائنی۔ کمشنرز دا مانیٹرنگ دا میکانزم ایجھا ہووݨا چاہیدے جو کہیں وی کوتاہی دی گنجائش نہ رہے۔ کہیں دی سفارش یا اقربا پروری کائنی صرف میرٹ تے کم تھیسی۔اجلاس کوں بریفنگ اچ ݙسایا ڳیا ساہیوال ڈویژن کیتے لوکل گورنمنٹ دے 4 ارب روپے دے فنڈز موجود ہن۔ ساہیوال شہر تے گردونواح اچ 1.12 ارب روپے توں ترقیاتی کم کیتے ویسن۔ ساہیوال اچ 862 ملین روپے دی لاگت نال 18.8 کلومیٹر طویل 10 اہم سڑکاں تعمیر تھیسن۔ ستمبر 2026 تئیں ساہیوال دی سڑکاں دی تعمیر و مرمت دا کم مکمل کر ڳھدا ویسی۔ بریفنگ اچ مزید ݙسایا ڳیا جنھاں شہری سڑکاں دی مدت پوری تھی چکی اے انھاں کوں ول جدید معیار تے تعمیر کیتا ویسی۔ ساہیوال دے دیہاتی علاقیں اچ فارم ٹو مارکیٹ سڑکاں دا ڄال وچھایا ویسی۔ ساہیوال ڈی پی او چوک توں ڈی پی ایس چوک تئیں 3.2 کلومیٹر طویل سڑک بݨسی۔ فرید ٹاؤن روڈ دی اپ گریڈیشن تے شیر دل چوک توں سمندری روڈ دی تعمیر تھیسی۔ انھاں ساہیوال اچ عالمی معیار دی سڑکاں بݨاوݨ دا حکم ݙتا تے ترٹی پُھٹی سڑکاں تے تشویش کیتی۔ بریفنگ اچ ݙسایا ڳیا ہڑپہ روڈ توں ڈی پی ایس روڈ تے گرلز کالج توں بھیا چوک تئیں سڑکاں تعمیر تھیسن۔ وزیراعلیٰ سڑکاں دے نال لیول تے فٹ پاتھاں (Pavements) دی تعمیر کوں لازمی قرار ݙے ݙتا۔ بریفنگ اچ ݙسایا ڳیا چیچہ وطنی شہر اچ ݙو اہم سڑکاں سودھے احمد نگر بائی پاس تے گرلز کالج بائی پاس روڈ بݨسی۔ چیچہ وطنی دے دیہاتی علاقیں اچ چک L-9/138 تے چک L-9/186 دی سڑکاں تعمیر تھیسن۔ انھاں چیچہ وطنی چوک دی خوبصورتی تے مین بازار کوں ماڈل بازار بݨاوݨ دی ہدایت کیتی تے آکھیا دکاناں دے سامݨے تجاوزات تے خوبصورتی اچ رکاوٹاں برداشت کائناں کیتیاں ویسن۔ انھاں ساہیوال شہر دے داخلی رستے تے سوہݨے تے پرکشش انٹری پوائنٹ بݨاوݨ دا حکم ݙتا۔ بریفنگ اچ ݙسایا ڳیا اوکاڑہ اچ پپلی پہاڑ روڈ دی اپ گریڈیشن تے گوگیرا توں ٹھٹھہ سرانگ تئیں سڑک بݨسی۔ وزیراعلیٰ مریم نواز اوکاڑہ مین اکبر روڈ تے سولر اسٹریٹ لائٹس تے جناح اسٹیڈیم اچ فلڈ لائٹس لاوݨ دا وی حکم ݙتا۔اجلاس اچ پاکپتن اچ 5 شہری، 5 دیہی تے 4 بیوٹیفکیشن اسکیماں دی منظوری ݙتی ڳئی۔ اجلاس کوں بریفنگ اچ ݙسایا ڳیا پاکپتن اچ ناردرن سدرن بائی پاس تے ملکہ ہانس روڈ دی تعمیر تھیسی۔ پاکپتن اچ کرکٹ اسٹیڈیم تے ڈی پی او آفس دے سامݨے اسپورٹس ایرینا قائم کیتا ویسی۔ پاکپتن دی اولڈ گگو شاہ والی ڳلی کوں ماڈل اسٹریٹ بݨایا ویسی۔ وزیراعلیٰ پاکپتن نہر دے کناریں دی خوبصورتی دے نال سولر لائٹس لاوݨ دی ہدایت کیتی۔ اجلاس اچ ساہیوال ڈویژن دی ساری17 اسکیماں ستمبر 2026 تائیں مکمل کرݨ دا ہدف مقرر کیتا ڳیا۔ ایں موقع تے سرگودھا ڈویژن کیتے 2.8 ارب روپے دے ریونیو توں ترقیاتی منصوبیں دی منظوری ݙتی ڳئی۔ اجلاس اچ شاہ پور لک موڑ روڈ دی تعمیر تے بھیرہ دی بیوٹیفکیشن دی منظوری وی ݙتی ڳئی۔ سیال موڑ موٹروے انٹری پوائنٹ دی خوبصورتی تے سرگودھا یونیورسٹی روڈ تے پیڈسٹرین برج (پیدل چلݨ آلیں دا پل) بݨسی۔ وزیراعلیٰ سرگودھا اچ سیف سٹی کیمریں دی تنصیب دا عمل تکھا کرݨ دا حکم ݙتا۔ بریفنگ اچ ݙسایا ڳیا نواز شریف انسٹیٹیوٹ آف کارڈیالوجی تئیں رسائی سوکھی بݨائی ویسی تے رحمان پورہ روڈ دی اپ گریڈیشن تھیسی۔ قائد آباد اچ فیملی پارک، بس اسٹینڈ تے بھکر دے شہری علاقیں دی سڑکاں دی اپ گریڈیشن تھیسی۔ دریا خان اچ کلر کوٹ روڈ دی ری ویمپنگ  کڈز ایریا، لیڈیز پارک تے بس اسٹیشن بݨسی۔ منکیرہ دے انٹری پوائنٹ دی خوبصورتی تے میانوالی روڈ تے اسٹریٹ لائٹس دی تنصیب تھیسی۔ وزیراعلیٰ سرگودھا ڈویژن دی اسکیماں 30 ستمبر تئیں مکمل کرݨ دی ہدایت کیتی۔ وزیراعلیٰ مریم نواز پورے پنجاب اچ ترقیاتی کماں دے ہکو جیھے معیار کوں برقرار رکھݨ دا حکم ݙتا۔اجلاس کوں بریفنگ اچ ݙسایا ڳیا فیصل آباد ڈویژن کول 5.3 ارب روپے دے مقامی وسیلے موجود ہن۔ فیصل آباد اچ 81 کلومیٹر طویل 38 سڑکاں سودھے مجموعی طور تے 59 اسکیماں تے کم تھیسی۔ جھنگ روڈ بائی پاس دی اپ گریڈیشن تھیسی۔ انھاں فیصل آباد اچ اینڈ ٹو اینڈ پیومنٹ تعمیر کرݨ دا حکم ݙتا۔ بریفنگ اچ ݙسایا ڳیا ڈجکوٹ توں تاندلیانوالہ روڈ دی تعمیرِ نو تے سمال انڈسٹریل اسٹیٹ دی بہتری تھیسی۔ جڑانوالہ توں ستیانہ لنک روڈ تے فٹ پاتھ تعمیر کیتے ویسن۔ ٹوبہ ٹیک سنگھ تے گوجرہ اچ اینڈ ٹو اینڈ سڑکاں بݨسن۔ چنیوٹ اچ 7 سڑکاں دی بہتری تے شہر دی بیوٹیفکیشن تھیسی۔ جھنگ روڈ تے اسٹریٹ لائٹس تے سڑکاں دی حالت بہتر بݨائی ویسی۔ ملتان ڈویژن دے چار ضلعیں اچ 3 ارب روپے توں 28 اسکیماں مکمل کیتیاں ویسن۔ ملتان اچ گھنٹہ گھر توں چونگی نمبر 9 تے ڈیرہ اݙہ توں عزیز ہوٹل تئیں روڈ دی اینڈ ٹو اینڈ اپ گریڈیشن تھیسی۔ عسکری بائی پاس اولڈ شجاع آباد روڈ کوں ڈٻل کیتا ویسی۔ بریفنگ اچ ݙسایا ڳیا فوارہ چوک توں گرلز ڈگری کالج تے پرمٹ روڈ کوں بہتر بݨایا ویسی۔ پل رنگو توں پل برکت آباد تئیں سڑک دی اپ گریڈیشن تھیسی۔ کبیر والا اچ جنرل بس اسٹینڈ دی اپ گریڈیشن تے تلمبہ میونسپل کمیٹی آفس دی اپ گریڈیشن تھیسی۔ وہاڑی اچ رتا ٹبہ روڈ تے بورے والا اچ معصوم شاہ روڈ دی لنکنگ تھیسی۔ میلسی اچ جلا جیم اسپورٹس اسٹیڈیم کوں اپ گریڈ کیتا ویسی۔ لودھراں اچ 6 ترقیاتی اسکیماں سودھے سپر چوک دی بہتری تے گیٹ دی تعمیر کیتی ویسی۔ کہروڑ پکا اچ اسٹریٹ لائٹس دی تنصیب تے قاسم پارک دی اپ گریڈیشن تھیسی۔ دنیا پور اچ وی جدید اسٹریٹ لائٹس لاتیاں ویسن۔ انھاں سارے منصوبیں اچ کم دے معیار تے کوئی سمجھوتہ نہ کرݨ دا سخت حکم ݙتا۔