وزیراعظم دی آئی ٹی تعلیم کوں عالمی تقاضیں نال ہم آہنگ کرݨ سانڳے جامع لائحہ عمل پیش کرݨ دی ہدایت

اسلام آباد۔ 13 مئی (اے پی پی) وزیراعظم محمد شہباز شریف انفارمیشن ٹیکنالوجی دی تعلیم کوں عالمی تقاضیں نال ہم آہنگ کرݨ سانڳے جامع لائحہ عمل پیش کرݨ دی ہدایت ݙیندے آکھیے حکومت نینگراں کوں تعلیم و تربیت، روزگار تے کاروبار دے بہترین موقع فراہم ݙیوݨ سانڳے پرعزم اے۔ انھاں اے ڳالھ اپݨی صدارت اچ وزیراعظم یوتھ پروگرام دے جاری منصوبیں تے پیش رفت تے آندے سال سانڳے نویں منصوبیں دی تجاویز تے جائزہ اجلاس نال خطاب کریندے آکھی ۔ اجلاس اچ وفاقی وزراء احسن اقبال، احد خان چیمہ، عطاء اللہ تارڑ، شزہ فاطمہ خواجہ، وزیرِ مملکت بلال اظہر کیانی، چیئرمین وزیراعظم یوتھ پروگرام رانا مشہود احمد خاں، چیئرمین ایچ ای سی ڈاکٹر نیاز احمد تے متعلقہ اعلیٰ حکام شرکت کیتی۔وزیراعظم دفتر دے میڈیا ونگ توں جاری بیان دے موجب وزیراعظم آکھیا حکومت نوجواناں کوں تعلیم، ہنر، روزگار تے کاروبار دے بہتر موقع ݙیوݨ سانڳے پرعزم اے، نوجواناں کوں آئی ٹی تے ٻئے شعبیں اچ عالمی معیار دی تعلیم و تربیت ݙیوݨ سانڳے اقدامات اچ ودھارا کریندے پیوں۔ انھاں ہائر ایجوکیشن کمیشن تے وزارتِ انفارمیشن ٹیکنالوجی کوں جامعات اچ انفارمیشن ٹیکنالوجی دی تعلیم کوں عالمی تقاضیں نال ہم آہنگ کرݨ سانڳے جامع لائحہ عمل پیش کرݨ دی ہدایت کیتی۔ انھاں وزیراعظم یوتھ پروگرام کوں نوجواناں دی تکنیکی تے فنی تربیت تے توجہ مرکوز کرݨ دی وی ہدایت کیتی جیندے نال نوجواناں سانڳے ملک تے ٻاہرلے ملک روزگار دے موقع یقینی ہوون۔ وزیراعظم نوجواناں کوں کاروبار شروع کراوݨ سانڳے مختلف سوکھے قرضیں دیاں سکیماں کوں ہک ای چھتری تلے چاوݨ دی ہدایت کیتی۔ انھاں گھٹ آݨ تے متوسط طبقے نال تعلق رکھݨ آلے نوجواناں کوں الیکٹرک بائیکس دی ݙیوݨ سانڳے یوتھ پروگرام کوں وزارتِ صنعت دے نال تعاون دی ہدایت کیتی۔ وزیراعظم نے چیئرمین وزیراعظم یوتھ پروگرام رانا مشہود احمد خاں تے انھاں دی ٹیم دی کارکردگی دی تعریف کیتی ۔اجلاس کوں وزیراعظم یوتھ پروگرام دے تحت جاری منصوبیں دی کارکردگی تے بریفنگ ݙتی ڳئی جیندے اچ ݙسایا ڳیا ڈیجیٹل یوتھ ہب دے قیام توں ہݨ تئیں 8 لکھ توں ودھ نوجوان تے 2 ہزار توں ودھ ادارے رجسٹرڈ تھئن جݙاں جو روز دی بنیاد تے 4800 توں ودھ درخواستاں موصول تھیندیاں پئن جنھاں دی کڑی جانچ پڑتال دے بعد انھاں دی شمولیت یقینی بݨائی ویندی اے۔ اجلاس کوں مزید ݙسایا ڳیا وزیراعظم یوتھ بزنس اینڈ ایگری لونز دے تحت ہݨ تیں 2 لکھ 87 ہزار توں ودھ نوجواناں کوں 122.5 ارب روپے کاروبار تے زراعت سانڳے سوکھے شرطاں تے بطور قرض ݙتے ڳئن جیندے پاروں 9 لکھ توں ودھ روزگار دے موقع پیدا تھئے۔ اجلاس کوں ݙسایا ڳیا قرض سکیم دے تحت ݙتے ونڄݨ آلے ہر قرض دے بدلے 3 توں ودھ نویں روزگار دے موقع پیدا تھیندے پئن۔بریفنگ موجب وزیراعظم دی قیادت اچ ملک دی پہلی یوتھ اینڈ ایڈالیسینٹ پالیسی تے پہلی یوتھ روزگار پالیسی تیار تھی چکی اے۔ ایں ای طریقے نال ملک اچ پہلی قومی یوتھ کونسل دا قیام، وزیراعظم سپورٹس اینڈ ٹیلنٹ ہنٹ پروگرام دا اجراء وی تھیا۔ سپورٹس اینڈ ٹیلنٹ ہنٹ پروگرام دے تحت اڄوکے سال 4 لکھ نوجواناں ایندے اچ حصہ ڳھدا جیندے اچ ملک دے محروم تے متوسط طبقیں دے نوجواناں کوں میرٹ تے اپݨا ہنر ݙکھاوݨ دا موقع ملیا جیندے عملی مظاہرہ اڄوکے سال پاکستان سپر لیگ اچ ایں ای پروگرام دے تحت ابھر تے سامݨے آوݨ آلے کئی کھلاڑیاں دی شمولیت دی صورت اچ تھیا۔ اجلاس کوں یوتھ پروگرام دے تحت ملک اچ مکس مارشل آرٹس، فیفا ایرینا تے ای-سپورٹس دے اقدامات تے وی بریفنگ ݙتی ڳئی۔ اجلاس کوں یوتھ پروگرام دے تحت نویں مجوزہ منصوبیں تے وی بریفنگ ݙتی ڳئی۔