پرائیویٹ ایجوکیشنل انسٹی ٹیوشنز ریگولیٹری اتھارٹی دا اجلاس، اہم فیصلے

اسلام آباد۔ 13 مئی (اے پی پی)پرائیویٹ ایجوکیشنل انسٹی ٹیوشنز ریگولیٹری اتھارٹی (ICT-PEIRA) چیئرمین ڈاکٹر غلام علی ملاح دی صدارت اچ تھیوݨ آلے اجلاس اچ طلبہ دے مستقبل، صحت تے والدین دے حقوق دے تحفظ کیتے اہم تے سخت فیصلے کیتن۔ اتھارٹی فیصلہ کیتے اسلام آباد اچ بغیر رجسٹریشن غیر قانونی طور تے چلدے پئے نجی تعلیمی اداریں دے خلاف سخت قانونی کارروائی عمل اچ گھن آئی ویسی۔ ٻہوں سارے نوٹساں، قانونی یاددہانیاں تے عوامی انتباہات دے باوجود قوانین دی خلاف ورزی کرݨ آلے اداریں دے خلاف جرمانے، چھاپے تے ادارے سیل کرݨ سودھے سخت اقدامات کیتے ویسن۔ ایں مقصد کیتے ضلعی انتظامیہ تے متعلقہ قانون نافذ کرݨ آلے اداریں دے تعاون نال خصوصی انفورسمنٹ کارروائیاں کیتیاں ویسن۔اتھارٹی اے وی واضح ہدایت جاری کیتی اے جو کوئی وی نجی تعلیمی ادارہ ہک مہینے توں زیادہ پیشگی فیس وصول کائناں کر سڳسی تے فیس صرف ماہانہ بنیاد تے وصول کیتی ویسی۔ مزید اے جو کہیں وی ادارے کوں منظور شدہ 12 مہینے دے تعلیمی سیشن توں زیادہ فیس وصول کرݨ دی اجازت کائنی ہوندی۔ خلاف ورزی دی صورت اچ قانونی کارروائی، جرمانے تے فرانزک آڈٹ کیتا ونڄ سڳسی۔طلبہ دی صحت دے تحفظ کیتے ICT-PEIRA ہلکے اسکول بیگز پالیسی نافذ کرݨ دا وی فیصلہ کیتے تاں جو ٻالاں کوں بارے بستیں دے پاروں چیل دا درد، جسمانی دباؤ، پوسچر دے مسئلیں تے ٻئے صحت دے خطرات توں محفوظ رکھیا ونڄ سڳے۔ سارے نجی اسکولاں کوں ہدایت کیتی ڳئی اے اسکول بیگ دا وزن ٻار دے جسمانی وزن دے 10 فیصد توں زیادہ نہ ہووے۔ ایں مقصد کیتے غیر ضروری کتاباں اچ کمی، بہتر ٹائم ٹیبل تے جتھاں ممکن ہووے لاکرز دی سہولت ݙتی ونڄے۔ والدین تے شہریاں دی سہولت کیتے ہک خصوصی شکایات مرکز وی قائم کیتا ڳئے جتھاں غیر قانونی فیس وصولی، زائد چارجنگ تے ٻیاں خلاف ورزیاں دیاں شکایات درج کرائیاں ونڄ سڳسن۔