پاکستان میرین اکیڈمی کوں ڈگری ݙیوݨ آلا ادارہ بݨاوݨ کیتے ٻل وقتی قومی اسمبلی اچ پیش کیتا ویسی، محمد جنید انوار چوہدری

اسلام آباد۔ 14 مئی (اے پی پی) وفاقی وزیر بحری امور محمد جنید انوار چوہدری آکھیے جو پاکستان میرین اکیڈمی کوں ڈگری ݙیوݨ balance آلا ادارہ بݨاوݨ کیتے ٻل وقتی قومی اسمبلی اچ پیش کیتا ویسی جیڑھا ملک اچ بحری تعلیم دے ودھارے دے پاسے اہم پیشرفت تھیسی۔وزارت توں جاری پریس ریلیز موجب اے ڳالھ انھاں کراچی اچ پاکستان میرین اکیڈمی دے دورے دے موقع تے آکھی جتھاں قائم مقام کمانڈنٹ محمد آصف فاروق انھاں کوں ادارے دی ترقی تے تربیتی اقدامات بارے بریفنگ ݙتی۔ وفاقی وزیر آکھیا اکیڈمی کوں ڈگری ایوارڈنگ انسٹیٹیوٹ دا درجہ ݙیوݨ دے حوالے نال سارے متعلقہ سٹیک ہولڈرز نال مشاورت مکمل کر ڳھدی ڳئی اے، ٻل حتمی منظوری کیتے مناسب ویلھے تے قومی اسمبلی اچ پیش کیتا ویسی۔قائم مقام کمانڈنٹ ݙسایا وزیراعظم محمد شہباز شریف دے میری ٹائم سیکٹر اصلاحاتی اقدامات دے تحت کراچی پورٹ ٹرسٹ، پورٹ قاسم اتھارٹی تے گوادر پورٹ اتھارٹی دے اہلکاراں کوں خصوصی تربیت ݙتی ڳئی جیندے اچ بنیادی فائر فائٹنگ تے نومبر 2025 اچ منعقد تھیوݨ آلا نیوی ٹرینر پروفیشنل 5000 کورسز شامل ہن۔ انھاں ݙسایا جو اکیڈمی دے 14 انسٹرکٹرز کوں کوالیفائیڈ ٹرینرز دا درجہ ݙتا ڳئے جیندے نال ادارے دی تربیتی صلاحیت اچ نمایاں ودھارا تھئے۔کمانڈنٹ موجب اکیڈمی اچ جاری ترقیاتی منصوبیں کیتے 42 کروڑ 10 لکھ روپے دی مالی معاونت کراچی پورٹ ٹرسٹ، پورٹ قاسم اتھارٹی تے پاکستان نیشنل شپنگ کارپوریشن دی کارپوریٹ سوشل رسپانسبلٹی فنڈنگ دے ذریعے ملسی ۔ وفاقی وزیر شمولیتی پالیسی تے زور ݙیندے ہدایت کیتی اکیڈمی اپݨے تربیتی پروگراماں کوں بلوچستان دے طلبہ تئیں وی توسیع ݙیوے، ایں مقصد کیتے نیشنل ووکیشنل اینڈ ٹیکنیکل ٹریننگ کمیشن تے بینظیر انکم سپورٹ پروگرام توں وی معاونت حاصل کیتی ونڄے۔ انھاں آکھیا اکیڈمی کوں اپ گریڈ کرݨ دا اقدام میری ٹائم شعبے کوں جدید خطوط تے استوار کرݨ تے علاقائی و عالمی ضرورتاں موجب ہنر مند افرادی قوت تیار کرݨ دی وسیع تر حکمتِ عملی دا حصہ اے