پاکستان تے آذربائیجان وچال بھرپی دے ویلھے نال مزید تکڑے تھیندے پئن ، چیئرمین سینیٹ

اسلام آباد۔14 مئی (اے پی پی) چیئرمین سینیٹ سید یوسف رضا گیلانی آکھیے جو پاکستان تے آذربائیجان وچال بھرپی دے تعلقات ویلھے نال مزید تکڑے تھیندے پئن ۔ آذربائیجان دے یومِ آزادی دی تقریب نال خطاب کریندے انھاں آکھیے جو ݙوہیں ملک مذہبی، ثقافتی تے تاریخی رشتے اچ ڳھنڈئے ہوئن تے مختلف عالمی و پارلیمانی فورمز تے ہک ٻئے دے موقف دی بھرپور حمایت کریندن۔ چیئرمین سینیٹ آکھیے جو بھارتی جارحیت دے خلاف پاکستان دی کامیابی تے آذربائیجان اچ وی بھرپور جشن منایا ڳیا، جیڑھا ݙوہیں ملکاں دے عوام وچال گھاٹی یاری تے یکجہتی دا مظہر اے۔ انھاں آکھیے جو بین الپارلیمانی یونین تے ایشین پارلیمانی اسمبلی اچ پاکستان تے آذربائیجان دے موقف اچ نمایاں ہم آہنگی پاتی ویندی اے۔سید یوسف رضا گیلانی آکھیے جو آذربائیجان اسلام آباد اچ جدید فنِ تعمیر تے ترقیاتی وژن متعارف کرویندا پئے جݙاں جو ݙوہیں ملکاں وچال عوامی، ثقافتی تے تجارتی رابطے وی تکھے ودھدے پئن۔ انھاں ݙسایا جو پاکستان کیتے آذربائیجان دی ہفتہ وار 11 پروازاں شروع کیتیاں ڳئن، جنھاں دے ذریعے اسلام آباد تے لاہور توں سفری سہولتاں میسر ہن، جݙاں جو پاکستان توں آذربائیجان دا سفر ترائے گھنٹے توں گھٹ ویلھے اچ مکمل تھی ویندے۔ چیئرمین سینیٹ آکھیے جو مستقبل اچ ݙوہیں ملکاں وچال پروازاں اچ مزید ودھارا کیتا ویسے تاںجو عوامی رابطیں تے سیاحت کوں مزید ودھارا مل سڳے۔انھاں باکو اچ موجود تاریخی “ملتانی کارواں سرائے” کوں برصغیر تے آذربائیجان دے صدیاں پراݨے تعلقات دی علامت قرار ݙیندے آکھیے جو UNESCO وی ایں تاریخی مقام کوں خصوصی اہمیت ݙے رکھی اے۔ انھاں پاکستان تے آذربائیجان دی دوستی کوں مزید مستحکم بݨاوݨ دے عزم دا اعادہ کریندے آکھیے جو ݙوہیں ملک سانجھے تعاون دے ذریعے خطے اچ امن، ترقی تے خوشحالی دے ودھارے کیتے مشترکہ کردار ادا کریندے رہسن۔