پاکستان دی آئی ٹی برآمدات اچ مسلسل ودھارا تھیندا پئے، شزہ فاطمہ خواجہ

اسلام آباد۔ 14 مئی(اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے حکومت دی سرپرستی اچ کیتی ونڄݨ آلی اصلاحات، ڈیجیٹل سکلز پروگراماں تے پالیسی سپورٹ دی پاروں پاکستان دی آئی ٹی برآمدات اچ مسلسل ودھارا تھیندا پئے جیڑھا ملک دے ٹیکنالوجی شعبہ کوں تکڑا بݨاوݨ کیتے اہم اے۔ قومی اسمبلی اچ وقفہ سوالات دے دوران مختلف ارکان دے سوالات دے جواب ݙیندے انھاں آکھیا گزریل کئی سالاں توں پاکستان دی آئی ٹی برآمدات سالانہ تقریباً 20 فیصد دی شرح نال ودھدیاں پئن۔ انھاں ایوان کوں ݙسایا موجودہ حکومت دے اقتدار سنبھالݨ ویلھے آئی ٹی برآمدات تقریباً 2.4 ارب ڈالر ہن تے موجودہ مالی سال اچ اے برآمدات 4.5 ارب ڈالر توں ٹپ ونڄݨ دی توقع اے۔ شزہ فاطمہ ایں ترقی دا سہرا وزیراعظم شہباز شریف دی قیادت اچ حکومت کوں ݙیندے آکھیا جو ایں حکومت آئی ٹی سکیٹر کوں ترجیح ݙتی تے پالیسی مراعات دے ذریعے برآمد کنندگان دی سہولت ݙتی۔وفاقی وزیر آکھیا آئی ٹی سیکٹر واحد برآمد تے مبنی انڈسٹری اے جیڑھی فائنل ٹیکس رجیم دے تحت کم کریندی پئی اے۔ پاکستان سافٹ ویئر ایکسپورٹ بورڈ (پی ایس ای بی) دے نال رجسٹرڈ کمپنیاں تے برآمدات تے صرف 0.5 فیصد ٹیکس لڳدے جݙاں جو غیر رجسٹرڈ ادارے ہک فیصد ٹیکس ادا کریندن۔ انھاں آکھیا حکومت سالانہ 5 لکھ توں ودھ نوجواناں کوں ڈیجیٹل تے ہائی ٹیک سکلز دی تربیت ݙیندی پئی اے تے ملک دی ودھدی انسانی وسائل دی صلاحیت آئی ٹی برآمدات اچ ودھارے دی کلیدی وجہ اے۔ انھاں آکھیا تربیتی پروگراماں اچ وی اصلاحات کیتیاں ڳئن۔ انھاں آکھیا تربیتی اقدامات کیتے انٹرنیشنل سرٹیفیکیشنز تے تھرڈ پارٹی ایویلیویشنز کوں لازمی قرار ݙتا ڳئے جیندے نتیجے اچ بہتر نتیجے سامݨے آندے پئن، ایڈوانسڈ ٹریننگ پروگراماں دی تھرڈ پارٹی ایویلیویشن توں پتہ لڳے جو انھاں دی مناسبت نال حصولِ روزگار دی اہلیت دی شرح 82 فیصد اے جینکوں انھاں بین الاقوامی معیار توں زیادہ قرار ݙتا۔آئی ٹی انڈسٹری کیتے سہولتاں دے اقدامات تے روشنی پیندے انھاں آکھیا حکومت پی ایس ای بی دے ذریعے 24/7 فیسیلیٹیشن سینٹر قائم کیتن تے کاروباری رجسٹریشن دے طریقے کوں سوکھا بݨائے۔ انھاں آکھیا پی ایس ای بی رجسٹریشن کیتے درکار ویلھا 90 ݙینھ توں گھٹ کرتے صرف نو منٹ کر ݙتا ڳئے۔ وفاقی وزیر ݙسایا آئی ٹی کمپنیاں کوں سپیشل فارن کرنسی اکاؤنٹس اچ 50 فیصد ڈالر ریٹینشن دی اجازت ݙتی ڳئی اے جݙاں جو سٹیٹ بینک آف پاکستان فارم ای توں متعلق ٻہوں ساریاں ریگولیٹری رکاوٹاں کوں ختم کر ݙتے۔شزہ فاطمہ آکھیا وزیراعظم دے ہدایات تے کمپنیاں کوں روشن ڈیجیٹل اکاؤنٹس دے ذریعے سرمایہ کاری کرݨ دی وی اجازت ݙتی ڳئی اے۔ انھاں ݙسایا گزریل ݙو سالاں اچ 250 توں زیادہ آئی ٹی کمپنیاں بین الاقوامی روڈ شوز اچ حصہ ڳھدا جݙاں جو ملک بھر اچ 10 سپیشل ٹیکنالوجی پارکس تے 50 ای روزگار سینٹرز قائم کیتے ڳئن۔ انھاں آکھیا آزاد جموں و کشمیر اچ تریمتاں کیتے مخصوص ٹیکنالوجی پارکس وی قائم کیتے ڳئن تاں جو ڈیجیٹل معیشت اچ تریمتاں دی شرکت کوں ودھارا ݙتا ونڄ سڳے۔