وسیلے تے آبادی اچ توازن ای پائیدار ترقی دی ضمانت اے، وزیر اعظم دا اجلاس نال خطاب

اسلام آباد۔ 14 مئی (اے پی پی) وزیراعظم محمد شہباز شریف ودھدی آبادی کیتے موثر تے مربوط قومی حکمتِ عملی تشکیل ݙیوݨ دی ہدایت ݙیندے قومی سطح تے آبادی متعلق پالیسی سازی کیتے نیشنل پاپولیشن کونسل قائم کرݨ دا فیصلہ کیتے۔ وزیراعظم دی زیرِ صدارت ودھدی آبادی دے مسئلیں تے اہم اجلاس منعقد تھیا جیندے اچ وفاقی وزیر منصوبہ بندی احسن اقبال، وفاقی وزیر اقتصادی امور احد خان چیمہ، وفاقی وزیر موسمیاتی تبدیلی مصدق ملک، وفاقی وزیراطلاعات و نشریات عطاء اللہ تارڑ، وفاقی وزیر قومی صحت سید مصطفیٰ کمال، وزیر مملکت قومی صحت ملک مختاراحمد بھرتھ تے متعلقہ اعلیٰ سرکاری افسراں شرکت کیتی۔وزیراعظم دفتر دے میڈیا ونگ توں جاری بیان موجب وزیراعظم اجلاس اچ ودھدی آبادی کیتے موثر تے مربوط قومی حکمتِ عملی تشکیل ݙیوݨ دی ہدایت کیتی۔ انھاں قومی سطح تے آبادی متعلق پالیسی سازی کیتے نیشنل پاپولیشن کونسل قائم کرݨ دا فیصلہ کیتا جیندی سربراہی او خود کریسن۔ نیشنل پاپولیشن کونسل اچ چارے صوبیں دے وزرائے اعلیٰ، وزیراعظم آزاد کشمیر تے وزیراعلیٰ گلگت بلتستان شامل ہوسن۔ وزیراعظم اجلاس نال خطاب کریندے آکھیا وسیلے تے آبادی اچ توازن ای پائیدار ترقی دی ضمانت اے، تکھے ودھدی آبادی توں قومی وسیلیں تے دٻاؤ ودھدا پئے تے ترقی کیتے وݙا چیلنج اے۔انھاں آکھیا حکومت دی بھرپور کوشش اے آگاہی مہم، صحت و تعلیم دی سہولتاں اچ بہتری تے متوازن ترقی دے ذریعے آبادی دی ودھدی رفتار تے قابو پاتا ونڄ سڳے، آبادی دے بہتر نظم و نسق کیتے ’’ہول آف دی گورنمنٹ اپروچ‘‘ اپنائی ونڄے۔ وزیراعظم عوامی آگاہی مہم اچ علمائے کرام تے کمیونٹی رہنماواں دی شمولیت یقینی بݨاوݨ دی ہدایت کیتی۔ اجلاس کوں ملک دی ودھدی ہوئی آبادی تے کنٹرول و بہبود دے حوالے نال اقدامات تے بریفنگ ݙتی ڳئی جیندے اچ ݙسایا ڳیا ملک اچ آبادی دی شرح نمو 2.55 فیصد تئیں پڄ چکی اے جیڑھی ہک وݙا چیلنج اے۔ سارے ہیلتھ مراکز تے خاندانی منصوبہ بندی دی سہولتاں ݙیوݨ نال آبادی تے کنٹرول اچ مدد ملسی۔ بریفنگ موجب سماجی تحفظ دے پروگراماں کوں خاندانی منصوبہ بندی نال جوڑیا ویسی۔ اجلاس اچ ݙسایا ڳیا کہ تریمتاں کوں معاشی طور تے بااختیار بݨاوݨ دا آبادی تے قابو پاوݨ اچ اہم کردار اے، خاندانی منصوبہ بندی تے آگاہی مہم چلائی ویندی پئی اے۔