پاکستان تے آذربائیجان دے تعلقات ہر گزردے ݙینھ دے نال ٻئے تکڑے تھیندے پئن ، وزیراعظم شہبازشریف دی آزری وزیرِانصاف نال ڳالھ مہاڑ

اسلام آباد۔ 14 مئی (اے پی پی) وزیراعظم محمد شہباز شریف آکھیے پاکستان تے آذربائیجان بھرا ملک ہن جنھاں دے تعلقات ہرگزردے ݙینھ دے نال ٻئے تکڑے تھیندے پئن۔ انھاں اے ڳالھ آذربائیجان دے وزیرِ انصاف فرید تراب اووعلو احمدوف کوں آکھی جنہاں اتھاں وزیراعظم ہاؤس اچ انھاں نال ملاقات کیتی۔وزیراعظم دفتر دے میڈیا ونگ توں جاری بیان موجب ملاقات اچ وفاقی وزیر قانون، انصاف و انسانی حقوق اعظم نذیر تارڑ، اٹارنی جنرل منصورعثمان اعوان، وزیرمملکت قانون و انصاف بیرسٹر عقیل ملک، وزیراعظم دے معاون خصوصی طارق فاطمی تے سیکریٹری خارجہ آمنہ بلوچ وی موجود ہن۔ گرمجوشی تے دوستانہ ماحول اچ ملاقات دے دوران وزیراعظم آذربائیجان دے وزیر دا خیرمقدم کیتا تے آکھیا پاکستان تے آذربائیجان بھرا ملک ہن جنھاں دے تعلقات ہرگزردے ݙینھ نال بئے تکڑے تھیندے پئن ۔انھاں آذربائیجان دے صدر الہام علیوف کیتے اپݨی نیک خواہشات دا اظہار کیتا تے انھاں نال ایں ہفتے دے شروع اچ تھیوݨ آلی اپݨی ٹیلی فونک ڳالھ مہاڑ دا وی ذخر کیتا۔وزیر اعظم دا شکریہ ادا کریندے آذربائیجان دے وزیرمہمان نوازی تے پاکستان دا شکریہ ادا کیتا۔ انھاں وزیراعظم کوں ݙوہیں ملکاں وچال قانونی تے عدالتی تعاون دے شعبے اچ جاری تعاون دے بارے ݙسایا۔ ݙوہیں فریق سانجھی قانونی معاونت دے طریقے کوں ودھاوݨ دے نال نال ݙوہیں ملکاں دے عدالتی نظام دی استعداد کار کوں یقینی بݨاوݨ کیتے رل تے فعال طور تے کم کریندے پئن۔ وزیراعظم فریقین دی کوششاں دی تعریف کریندے آکھیے او اپݨے بھرا صدر الہام علیوف نال وقتی ملاقات دے منتظر ہن تاں جو ݙوہیں فریقاں وچال سارے شعبیں اچ بہترین ݙوطرفہ تعاون کوں جاری رکھیا ونڄ سڳے۔