پائیدار ترقی اوں ویلھے تئیں ممکن کائنی جݙاں تئیں تریمتاں کوں قومی ترقی دے مرکزی دھارے اچ مکمل طور تے شامل نہ کیتا ونڄے، وفاقی وزیراحسن اقبال

اسلام آباد۔ 14 مئی(اے پی پی) وفاقی وزیرمنصوبہ بندی ترقی، اصلاحات و خصوصی اقدامات پروفیسر احسن اقبال آکھیے اے محض ہک پالیسی کائنی، ہک قومی شعور دی بیداری اے جو جݙاں تریمتاں  کوں تعلیم، موقع تے اعتماد ݙتا ویندے تاں قوماں ترقی دیاں نویاں منزلاں طے کریندین، ’’اُڑان پاکستان‘‘ دا وژن دراصل ایجھے پاکستان دی تشکیل اے جتھاں دھیریں صرف خواب نہ ݙیکھن ٻھل انھاں خواباں دی تعبیر وی خود بݨن۔وفاقی وزیر منصوبہ بندی و ترقی تریمتاں دی معاشی خودمختاری تے صنفی مساوات متعلق قومی مشاورتی اجلاس نال خطاب کریندے واضح کیتا پائیدار ترقی اوں ویلھے تئیں ممکن کائنی جݙاں تئیں تریمتاں کوں قومی ترقی دے مرکزی دھارے اچ مکمل طور تے شامل نہ کیتا ونڄے۔ انھاں آکھیا دنیا دی کامیاب معیشتاں اچ تریمتاں دی فعال معاشی شمولیت بنیادی کردار ادا کریندی اے جݙاں جو پاکستان اچ تریمتاں دی ورک فورس اچ شرکت تقریباً 22 فیصد اے جیندے اچ ودھارا ویلھے دی لوڑھ اے۔انھاں ݙسایا ’’اُڑان پاکستان‘‘ دے پنجویں E دے تحت حکومت تریمتاں کوں تعلیم، روزگار، کاروبار تے قیادت دے شعبیں اچ مساوی موقع ݙیوݨ کیتے عملی اقدامات کریندی پئی اے، پاکستانی تریمتاں اڄ طب، تحقیق، تعلیم، کاروبار تے انتظامی قیادت سودھے مختلف میداناں اچ نمایاں کامیابیاں حاصل کریندیاں پئن جݙاں جو میڈیکل کالجز اچ طالبات دی وݙی تعداد ہک مثبت سماجی تبدیلی دی علامت اے۔پروفیسر احسن اقبال آکھیا تریمتاں کوں اعلیٰ تعلیم تئیں سوکھی رسائی ݙیوݨ کیتے ملک بھر دے ضلعیں اچ یونیورسٹی کیمپس قائم کیتے ویندے پئن تاں جو صلاحیتاں جغرافیائی رکاوٹاں دیاں محتاج نہ رہن۔ انھاں صنفی امتیاز تے تریمتاں دے خلاف تشدد کوں اسلامی تعلیمات تے قومی اقدار دے منافی قرار ݙیندے ہوئیں آکھیا اسلام تریمتاں کوں تعلیم، تجارت تے معاشی سرگرمیاں اچ مکمل حقوق ݙتن تے حضرت خدیجۃ الکبریٰؓ اسلامی تاریخ اچ کامیاب کاروباری قیادت دی روشن مثال ہن۔وفاقی وزیر ایں عزم دا اعادہ کیتا ’’اُڑان پاکستان‘‘ دے ہر ترقیاتی منصوبے اچ تریمتاں کوں بااختیار بݨاوݨ، انھاں کوں قومی دھارے اچ مؤثرکردار ݙیوݨ تے ترقی دے ثمرات اچ مساوی شراکت یقینی بݨاوݨ حکومت دی بنیادی ترجیح رہسی۔