چیئرمین سینیٹ سید یوسف رضا گیلانی دی زیرِ صدارت ادارہ پارلیمانی خدمات دے بورڈ آف گورنرز دا اجلاس

اسلام آباد۔ 14 مئی (اے پی پی) چیئرمین سینیٹ سید یوسف رضا گیلانی پاکستان انسٹی ٹیوٹ فار پارلیمانی سروسز (پی آئی پی ایس) دے بورڈ آف گورنرز دے صدر دی حیثیت نال ادارے دے بورڈ آف گورنرز دے اجلاس دی صدارت کیتی۔اجلاس اچ ڈپٹی سپیکر قومی اسمبلی سید غلام مصطفیٰ شاہ، سپیکر بلوچستان اسمبلی عبدالخالق خان، سپیکر پنجاب اسمبلی ملک محمد احمد خان، سپیکر سندھ اسمبلی سید اویس قادر شاہ بذریعہ زوم، سینیٹ و قومی اسمبلی دے اراکین، آزاد جموں و کشمیر تے گلگت بلتستان دی قانون ساز اسمبلیاں دے سپیکرز، سینیٹ و قومی اسمبلی سیکرٹریٹس دی سینئر قیادت تے ایگزیکٹو ڈائریکٹر پی آئی پی ایس شرکت کیتی۔چیئرمین سینیٹ سارے معزز شرکاء کوں خوش آمدید آکھیا تے پی آئی پی ایس کوں ملک دے ہک ممتاز پارلیمانی ادارے دے طور تے مستحکم بݨاوݨ اچ بورڈ دے سابقہ تے موجودہ اراکین دی قیمتی خدمات دی تعریف کیتی ۔ انھاں نو منتخب رکن بورڈ و رکن قومی اسمبلی شیر علی ارباب دی شمولیت دا خیرمقدم کریندے انھاں دی مثبت تے تعمیری خدمات دے حوالے نال نیک توقعات دا اظہار کیتا۔ چیئرمین سینیٹ آکھیا پی آئی پی ایس عالمی سطح تے ہک اہم سنگ میل عبور کیتے تے 24 مارچ 2026ء کوں اکرا، گھانا اچ بین الپارلیمانی یونین (آئی پی یو) دے زیرِ اہتمام منعقدہ افتتاحی کانفرنس اچ پنج ٻئے ملکاں دے نال ’’گلوبل نیٹ ورک آف پارلیمانی ٹریننگ انسٹی ٹیوٹس‘‘ دی سٹیئرنگ کمیٹی دے بانی رکن دی حیثیت حاصل کیتی۔انھاں مزید ݙسایا آئی پی یو ، پی آئی پی ایس کوں 3 توں 5 فروری 2027ء منعقد تھیوݨ آلی پارلیمانی تربیتی اداریں دی ݙوجھی عالمی کانفرنس دی میزبانی وی سونپی اے جیہڑی پاکستان کیتے اعزاز تے ادارے دی عالمی سطح تے ودھدی ہوئی ساکھ دا واضح اعتراف اے۔ چیئرمین سینیٹ آکھیا جولائی 2025ء توں ہݨ تئیں پی آئی پی ایس مختلف اورینٹیشن پروگرامز، ورکشاپس، سیمینارز تے راؤنڈ ٹیبل مباحثیں دا انعقاد کیتا جنھاں توں 540 توں زیادہ پارلیمنٹیرینز تے 798 افسراں فیدہ چاتا جݙاں جو 525 توں ودھ اراکینِ پارلیمنٹ کوں تکنیکی معاونت تے پارلیمانی خدمات وی ݙتیاں ڳئیاں۔انھاں ݙسایا ایں عرصے دے دوران ادارے 50 توں ودھ پیشہ وارانہ پروگرامز منعقد کیتے، 224 تحقیقی مقالے تیار کیتے، ترائے کتب شائع کیتیاں تے پبلک اکاؤنٹس کمیٹی کوں آڈٹ تجزیہ و جانچ پڑتال متعلق 28 توں زیادہ اجلاساں اچ خصوصی تکنیکی معاونت ݙتی۔ انھاں مزید آکھیا پی آئی پی ایس سول سوسائٹی، جامعات، طلبہ تے عوامی حلقیں دے نال وی فعال رابطے استوار کیتے تے پارلیمانی مطالعاتی سرگرمیاں اچ 918 توں زیادہ لوکاں دی شمولیت دے ذریعے جمہوری شعور تے پارلیمانی آگاہی کوں فروغ ݙتا۔چیئرمین سینیٹ صوبائی اسمبلیاں کیتے خصوصی تربیتی پروگراموں دے انعقاد دی تعریف کیتی جنھاں اچ سندھ اسمبلی دے افسراں کیتے تاریخی سی پی اے کانفرنس توں پہلے بین الاقوامی کانفرنساں دے انعقاد تے پارلیمانی پروٹوکول توں متعلق تربیت شامل اے۔ انھاں بلوچستان تے سندھ اسمبلیوں دے لائبریری سٹاف کیتے عملی تربیت جݙاں جو سینیٹ، قومی اسمبلی تے خیبرپختونخوا اسمبلی دے افسراں کیتے قومی پارلیمانی ترقیاتی فریم ورک دے تحت پیشہ وارانہ تربیتی کورسز کوں وی قابلِ تحسین قرار ݙتا۔ چیئرمین سینیٹ ایگزیکٹو ڈائریکٹر پی آئی پی ایس عاصم خان گورائیہ دی کوششاں دی تعریف کریندے آکھیا انھاں پاروں سارے صوبائی اسمبلیاں، آزاد جموں و کشمیر، گلگت بلتستان دی قانون ساز اسمبلیاں تے خود پی آئی پی ایس کوں اسٹیبلشمنٹ ڈویژن دے تحت سینئر مینجمنٹ کورس تے نیشنل مینجمنٹ کورس اچ شامل کیتا ڳئے۔چیئرمین سینیٹ ایں اعتماد دا اظہار کیتا بورڈ اچ شامل تجربہ کار قانون سازاں دی رہنمائی اچ پی آئی پی ایس اپݨی آئینی و ادارہ جاتی ذمہ واریاں ٻیا مؤثر انداز اچ ادا کریندا رہسی تے قانون سازی، تحقیق، تربیت تے ادارہ جاتی ترقی دے شعبیں اچ جدید اقدامات دے ذریعے پارلیمانی جمہوریت کوں ٻیا مضبوط بݨیسی۔ ایگزیکٹو ڈائریکٹر پی آئی پی ایس عاصم خان گورائیہ دی طرفوں پیش کیتے ڳئے مختلف ایجنڈا نکات تے تفصیلی غور کیتا ڳیا۔ بورڈ آندے مالی سال دے مجوزہ بجٹ تخمینیں دی منظوری ݙتی جݙاں جو سالانہ رپورٹ 2024-25ء کوں وی متفقہ طور تے منظور کر ڳھدا ڳئے۔