پاک فوج دے آرمی راکٹ فورس کمانڈ دا مقامی طور تے تیار کیتا ڳیا ”فتح-4“ گراؤنڈ لانچڈ کروز میزائل دا کامیاب تربیتی تجربہ

راولپنڈی۔ 14 مئی (اے پی پی) پاک فوج دے آرمی راکٹ فورس کمانڈ مقامی طور تے تیار کیتا ڳیا ”فتح-4“ گراؤنڈ لانچڈ کروز میزائل دا کامیاب تربیتی تجربہ کیتے۔ پاک فوج دے شعبہ تعلقات عامہ (آئی ایس پی آر) توں جاری بیان موجب جدید ایویانکس تے جدید ترین نیویگیشنل نظام نال لیس اے میزائل سسٹم طویل فاصلے تئیں اہداف کوں ٻہوں درستی دے نال نشانہ بݨاوݨ دی صلاحیت رکھیندے۔ آئی ایس پی آر ݙسایا ایں تربیتی تجربے دا مقصد فوجی دستیں دی آپریشنل استعداد اچ ودھارا تے بہتر درستی و بقاء دی صلاحیت کیتے شامل مختلف ذیلی نظاماں دے تکنیکی پہلوؤاں دی جانچ کرݨ ہئی۔ایں تجربے دا مشاہدہ پاک فوج دے آرمی راکٹ فورس کمانڈ دے سینئر افسران دے علاوہ میزائل تیار کرݨ آلے ادارے دے سائنسداناں تے انجینئرز وی کیتا۔ آئی ایس پی آر موجب صدرِ مملکت، وزیراعظم، چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، سربراہ پاک بحریہ تے سربراہ پاک فضائیہ ”فتح-4“ دے کامیاب تجربے تے اطمینان دا اظہار کیتے۔ انھاں ”فتح“ سیریز دے میزائل پروگرام اچ حصہ گھنݨ آلے  سارے لوکاں دی فنی مہارت، محنت تے عزم دی تعریف کیتی اے۔