ٻاہرلے ملک توں چلائی ونڄݨ آلی پاکستان مخالف بدنیتی تے مبنی مہم امن کیتے پاکستان دے کردار کوں ضیان پڄاوݨ دی غیر پیشہ وارانہ کارستانی اے، عطاء اللہ تارڑ

اسلام آباد۔ 14 مئی (اے پی پی) وفاقی وزیر اطلاعات و نشریات عطاء اللہ تارڑ آکھیے پاکستان دے خلاف ٻاہرلے ملک توں چلائی ونڄݨ آلی بدنیتی تے مبنی منفی مہم دا مقصد غلط معلومات تے کنفیوژن پیدا کرݨ اے، خطے اچ پائیدار امن کیتے پاکستان دے کردار کوں ضیان پڄاوݨ دی غیر پیشہ وارانہ کارستانی امن توں بیزار عناصر دی مایوسی کوں ظاہر کریندی اے۔ سماجی رابطے دے پلیٹ فارم ”ایکس“ تے اپݨی ہک پوسٹ اچ وفاقی وزیر اطلاعات آکھیا گزریل کجھ ݙینہاں توں پاکستان دے خلاف مربوط منفی مہم چلائی ویندی پئی اے، مخصوص مقصد دے کیتے بدنیتی تے مبنی اے مہم ٻاہرلے ملک توں چلائی ویندی پئی اے جیندا مقصد نامعلوم ذرائع تے حکام دے حوالے نال جاݨ ٻجھ تے مس انفارمیشن کوں ہوا ݙیوݨ تے کنفیوژن پیدا کرݨ اے۔ انھاں آکھیا خطے اچ پائیدار امن کیتے پاکستان دے کردار کوں ضیان پڄاوݨ دی اے غیر پیشہ وارانہ کوشش انھاں عناصر دی مایوسی کوں ظاہر کریندی اے جیڑھے امن توں بیزار ہن۔عطاء اللہ تارڑ آکھیا معتبر مقامی میڈیا ذرائع سودھے کئی فیکٹ چیک فورمز دی طرفوں حقائق تے تصدیق دے ذریعے ایں پروپیگنڈے کوں پہلے ہی مسترد کر ݙتا ڳئے۔ انھاں آکھیا اساں چنڳی طرح سمجھدوں جو ایجھی خبراں دے پچھوں کجھ عناصر بالخصوص امن دے مخالفین سرگرم ہن جیہڑے خطے اچ امن کیتے پاکستان دے کردار، ٻاہرلی سرپرستی تے معاونت نال تھیوݨ آلی دہشت گردی دے خلاف پاکستان دی مسلسل تے کامیاب جنگ کوں تسلیم کرݨ توں قاصر ہن۔ عطاء اللہ تارڑ آکھیا دہشت گردی دا خاتمہ، جھیڑیں دا حل تے امن دا قیام شاید انھاں لوکاں کوں پسند کائنی جیہڑے ایں مذموم مہم دے پچھوں کم کریندے پئن۔ انھاں آکھیا پاکستان تے ایندا ذمہ وار میڈیا ایں مذموم مہم دے پچھوں موجود عناصر دے مذموم عزائم کوں بے نقاب کریندا رہسی۔ انھاں آکھیا ایں مذموم مہم کوں بے نقاب کرݨ کیتے پاکستانی میڈیا تے انفلوئنسرز دی کوششاں تے کردار قابلِ تحسین اے۔