وفاقی کابینہ حج پالیسی 2030-2027 تے کابینہ کمیٹی دی سفارشات دی منظوری ݙے ݙتی

اسلام آباد۔ 14 مئی (اے پی پی) وفاقی کابینہ حج پالیسی 2030-2027 تے کابینہ کمیٹی دیاں سفارشات دی منظوری ݙیندے حجاج کرام دے حقوق دے تحفظ کیتے وزارتِ مذہبی امور تے پرائیویٹ حج آپریٹرز دے احتساب دا نظام بݨاوݨ دی ہدایت کیتی اے۔ کابینہ فراش ٹائون، اسلام آباد اچ اسلام آباد دیاں کچی آبادیاں دے رہائشیاں کیتے گھٹ قیمت ہائوسنگ منصوبہ دی تعمیر و ترقی وفاقی ترقیاتی ادارے (سی ڈی اے) دے سپرد کرݨ دی وی منظوری ݙے ݙتی۔وفاقی کابینہ دا اجلاس وزیراعظم محمد شہباز شریف دی زیرِ صدارت وزیراعظم ہائوس اچ تھیا۔ وزیراعظم دفتردے میڈیا ونگ توں جاری بیان موجب وفاقی کابینہ ملک اچ کݨک دی خریدو فروخت دے حوالے نال درپیش مسئلیں دا نوٹس گھندے معاملے تے کابینہ کمیٹی بݨا ݙتی اے۔وفاقی کابینہ کوں وزارتِ مذہبی امور و بین المذاہب ہم آہنگی دی طرفوں حج پالیسی 2030-2027 دی جانچ دے حوالے نال بݨائی ڳئی کابینہ کمیٹی دیاں سفارشات پیش کیتیاں ڳئیاں۔ وفاقی کابینہ کمیٹی دیاں سفارشات دی منظوری ݙیندے ہدایت کیتی جو وزارتِ مذہبی امور تے پرائیوٹ حج آپریٹرز دے احتساب دا نظام بݨایا ونڄے تاں جو حجاج کرام دے حقوق دا تحفظ کیتا ونڄ سڳے۔وفاقی کابینہ وزارتِ داخلہ و انسدادِ منشیات دی سفارش تے فراش ٹائون، اسلام آباد اچ اسلام آباد دیاں کچی آبادیاں دے رہائشیاں کیتے گھٹ قیمت ہائوسنگ منصوبہ دی تعمیر و ترقی وفاقی ترقیاتی ادارے (سی ڈی اے) دے سپرد کرݨ دی وی منظوری ݙتی۔ وفاقی کابینہ ریونیو ڈویژن دی سفارش تے پاکستان کسٹمز دے انسپکٹرز، انٹیلیجنس آفیسرز، پریوینٹو آفیسرز، اپریزرز تے ایویلیو ایشن آفیسرز دے محکمانہ ترقی دے امتحان فیڈرل پبلک سروس کمیشن دے ذریعے کراوݨ دی وی منظوری ݙتی۔وفاقی کابینہ کابینہ کمیٹی لیجسلیٹو کیسز دے 29 اپریل 2026ء کوں تھئے اجلاس اچ کیتے ڳئے فیصلیں دی منظوری وی ݙے ݙتی اے، البتہ ہدایت کیتی جو ٹوبیکو مارکیٹنگ کنٹرول رولز 2016 اچ ترمیم دے حوالے نال اقتصادی رابطہ کمیٹی دی رائے ڳھدی ونڄے۔