پاکستان اچ آئی بی آئی دے ڈیجیٹل اکانومی ہیڈکوارٹرز دا قیام مثبت ثابت تھیسی، وزیراعظم محمد شہباز شریف

اسلام آباد۔ 15 مئی (اے پی پی) وزیراعظم محمد شہباز شریف آئی بی آئی گروپ دی طرفوں پاکستان اچ اپݨے ڈیجیٹل اکانومی ہیڈکوارٹرز دے قیام دے فیصلے دی تعریف کریندے پاکستان تے چین وچال کاروباری سطح تے ودھدے تعاون تے اطمینان دا اظہار کیتے۔وزیر اعظم محمد شہباز شریف نال چین دے 11 رکنی وݙے کاروباری وفد وزیراعظم ہاؤس اچ ملاقات کیتی جیندی سربراہی آئی بی آئی بیجنگ یونائیٹڈ ٹیکنالوجی دے بانی، صدر تے کنٹرولنگ شیئر ہولڈر چیان شیاو جون کریندے پئے ہن۔ وزیراعظم دفتردے میڈیا ونگ توں جاری بیان موجب وزیراعظم وفد کوں پاکستان آوݨ تے خوش آمدید آکھیندے پاکستان تے چین وچال تاریخی تعلقات دا ذکر کیتا۔ انھاں صدر شی جن پنگ دی مدبرانہ قیادت اچ چین دی شاندار ترقی دی تعریف کیتی تے آکھیا او ایں مہینے دے چھیکڑ اچ اپݨے دورۂ چین دے منتظر ہن۔وزیرِاعظم آئی بی آئی گروپ دے پاکستان اچ اپݨے ڈیجیٹل اکانومی ہیڈکوارٹرز قائم کرݨ دے فیصلے دی تعریف کیتی تے پاکستان و چین وچال کاروباری سطح تے ودھدے تعاون تے اطمینان دا اظہار کیتا۔ انھاں آکھیا اے ڳالھ ٻہوں حوصلہ افزا اے جو آئی بی آئی ڈیجیٹل، معیشت اچ تعاون، سرمایہ کاری دے ودھارے تے صنعتی اشتراک کوں ودھارا ݙیسی۔ پاکستانی معیشت تے اعتماد دا اظہار کریندے چیان شیاو جون آکھیا آئی بی آئی پاکستان دی معیشت اچ ڈیجیٹل اصلاحات اچ معاونت چاہندے۔ انھاں آکھیا پاکستان اچ آئی بی آئی دے ڈیجیٹل اکانومی ہیڈکوارٹرز دا قیام ایں ضمن اچ انتہائی مثبت ثابت تھیسی تے پاکستان دے چھوٹے و درمیانے درجے دے کاروباری اداریں (ایس ایم ایز) کوں چینی مارکیٹ تئیں رسائی ݙے تے ٻہوں سارے موقع ݙیسی۔بیان دے موجب اے وفد وزیر اعظم دے ستمبر 2025 اچ دورۂ بیجنگ دے دوران منعقدہ پاکستان-چین بزنس ٹو بزنس سرمایہ کاری کانفرنس دے تسلسل اچ پاکستان دا دورہ کریندا پئے۔ ملاقات اچ وفاقی وزیرِ سرمایہ کاری قیصر احمد شیخ، وفاقی وزیرِ تجارت جام کمال خان، وفاقی وزیر آئی ٹی و ٹیلی کام شزہ فاطمہ خواجہ، وفاقی وزیرِ پیٹرولیم علی پرویز ملک، معاونِ خصوصی صنعت و پیداوار ہارون اختر، معاونِ خصوصی طارق فاطمی تے ٻئے اعلیٰ حکام وی موجود ہن