دہشت گردی دی حمایت یا سہولت ݙیوݨ آلے کہیں وی بندے دے خلاف سخت کارروائی کیتی ویسی، ڈاکٹر طارق فضل چوہدری

اسلام آباد۔ 15 مئی (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے دہشت گردی دیاں سرگرمیاں دی حمایت یا سہولت ݙیوݨ آلے کہیں وی بندے دے خلاف سخت کارروائی کیتی ویسی، ریاست امن برقرار رکھݨ کیتے پوری طرح پرعزم اے تے اپݨی خودمختاری دے کہیں وی خطرے کوں برداشت کائناں کریسی۔ قومی اسمبلی اچ اراکین دے نکتہ اعتراض تے انھاں حکومت دی دہشت گردی دے خلاف پالیسی دا اعادہ کریندے آکھیا بلوچستان لبریشن آرمی (بی ایل اے) بین الاقوامی سطح تے نامزد دہشت گرد تنظیم اے جیندے نال سختی نال نبڑیا ویسی۔ انھاں میڈیا اچ ساحلی محافظاں (کوسٹ گارڈز) متعلق اڄوکے واقعات بارے اچ ریکارڈ دی درستگی کریندے ݙسایا ہک ہفتہ پہلے فائرنگ دے ہک واقعے اچ کوسٹ گارڈ اہلکار شہید تھئے، نقصان دے باوجود فورسز صبر و تحمل دا مظاہرہ کیتا۔ انھاں واضح کیتا فائرنگ دہشت گرداں دی طرفوں شروع کیتی ڳئی ہئی تے کوسٹ گارڈز ایں دے مطابق جواب ݙتا۔ انھاں آکھیا او بلوچستان دے وزیراعلیٰ سرفراز بگٹی نال ذاتی طور تے رابطہ کریسن تاں جو صوبے دے قانون سازاں دے نال رسمی ملاقات دا اہتمام کیتا ونڄ سڳے۔ انھاں آکھیا جے وزیراعلیٰ اسلام آباد اچ ہوون تاں او وفد دے نال خود ویسن تاں جو مکالمے اچ سہولت ݙتی ونڄ سڳے۔پی ٹی آئی بانی نال ممکنہ ملاقات دے حوالے نال بحث دا ذکر کریندے انھاں آکھیا ایں معاملے کوں صرف سیاسی مسئلے دے طور تے نی ݙیکھݨا چاہیدا اے قانونی تے انتظامی طریقہ کار موجب چلݨ آلا معاملہ اے۔ پی ٹی آئی بانی دی صحت خاص طور تے اکھیں متعلق سوال تے انھاں آکھیا حراست اچ موجود لوکاں کوں سارے ضروری طبی نگہداشت ݙیوݨ حکومت دی ذمہ واری اے، ماضی اچ وی اے ذمہ واری پوری کیتی ڳئی اے تے آندے وقت اچ وی پوری کیتی ویسی۔ ایمرجنسی اچ ہسپتال منتقلی بارے تحفظات دا جواب ݙیندے انھاں آکھیا کہیں وی طبی ایمرجنسی اچ مریض کوں فوری طور تے ہسپتال منتقل کرݨ معیاری طریقہ کار اے، ایں توں کوئی فرق کائنی پوندا جو ویلھا کیا اے یا حالات کیا ہن۔ انھاں تاخیر دے الزاماں کوں مسترد کریندے آکھیا جݙاں وی ضرورت پئی، وقتی طبی ݙتی ڳئی۔ انھاں آکھیا جݙاں تئیں پی ٹی آئی بانی حراست اچ ہن جیل انتظامیہ کوں انھاں دی صحت، خوراک تے ٻیاں بنیادی سہولتاں ݙیوݨ دی ذمہ واری اے۔ انھاں واضح کیتا ساریاں ذمہ واریاں بغیر کہیں غفلت دے پوریاں کیتیاں ویندیاں پئن۔