پانڈا بانڈ دا اجراء پاکستان دی معاشی بحالی تے اصلاحاتی ایجنڈے تے عالمی اعتماد دا مظہر اے، وفاقی وزیرِ خزانہ محمد اورنگزیب

بیجنگ۔ 15 مئی (اے پی پی) وفاقی وزیرِ خزانہ و محصولات، سینیٹر محمد اورنگزیب آکھیے پانڈا بانڈ دا اجراء پاکستان دی معاشی بحالی تے اصلاحاتی ایجنڈے تے عالمی اعتماد دا مظہر اے ٻلکہ ݙوہیں دوست ملکاں وچال مالیاتی تعاون دے ہک نویں دور دا آغاز وی اے۔ بیجنگ اچ پاکستانی سفارتخانے اچ منعقدہ پانڈا بانڈ دے اجراء دی افتتاحی تقریب، جیندے اچ چین دی حکومت، کثیرالجہتی ترقیاتی بینکاں، ریٹنگ ایجنسیاں، مالیاتی اداریں دے نمائندے، سرمایہ کاراں تے ٻئے معزز مہماناں شرکت کیتی، نال خطاب کریندے وزیرِ خزانہ آکھیا اے کامیاب اجراء اعتماد، شراکت داری، جدت، مالی تعاون تے پائیدار ترقی و علاقائی رابطے دے سانجھے عزم دی عکاسی کریندے۔ وزیرِ خزانہ آکھیا اے موقع ایں اعتبار نال وی خصوصی اہمیت رکھیندے پاکستان تے چین سفارتی تعلقات دے 75 سال مکمل تھیوݨ دا جشن منیندے پئن، جیہڑا سانجھے احترام، اسٹریٹجک اعتماد تے ہک ݙوجھے دی ترقی کیتے غیر متزلزل حمایت تے مبنی اے۔ انھاں آکھیا پانڈا بانڈ دا اجراء ݙو پاسہ معاشی تعاون دی ودھدی ہوئی مضبوطی تے پاکستان دی معاشی سمت تے چینی اداریں تے سرمایہ کاراں دے اعتماد دا مظہر اے۔ انھاں مزید آکھیا پاکستان جنوبی ایشیاء دا پہلا ملک اے جیں پانڈا بانڈ جاری کیتے۔سینیٹر محمد اورنگزیب شرکاء کوں ݙسایا پاکستان ݙو سالہ وسیع تیاری تے چینی ریگولیٹرز، ترقیاتی شراکت داراں، مشیراں تے مارکیٹ دے شرکاء دے نال نیڑے تعاون دے بعد 7.2 ارب چینی یوآن دے پانڈا بانڈ پروگرام دا کامیاب قیام عمل اچ گھن آئے۔ انھاں ݙسایا 1.75 ارب چینی یوآن دے ابتدائی اجراء کوں غیرمعمولی مثبت ردعمل ملیا تے اے مقررہ حجم توں زیادہ سبسکرائب تھیا، جیہڑا پاکستان دی معاشی صورتحال تے اصلاحاتی ایجنڈے تے سرمایہ کاراں دے مضبوط اعتماد دا ثبوت اے۔ وزیرِ خزانہ چائنہ انٹرنیشنل کیپیٹل کوآپریشن دی بطور لیڈ انڈر رائٹر قیادت و معاونت دی تعریف کیتی ، جݙاں جو بینک آف چائینہ، سٹینڈرڈ چارٹرڈ تے ہونگٹا سیکیورٹیز (Hongta Securities) دی بطور مشترکہ لیڈ انڈر رائٹرز خدمات تے ایچ بی ایل دی بطور مالی مشیر معاونت تے وی شکریہ ادا کیتا۔ انھاں ایشیئن انفراسٹرکچر، ایشیائی ترقیاتی بینک تے انویسٹمنٹ بینک دی طرفوں ݙتے ڳئٖ کریڈٹ گارنٹیاں دی تعریف کیتی ، جنھاں پاکستان دے چینی آن شور بانڈ مارکیٹ اچ کامیاب داخلے کوں ممکن بݨایا۔اجراء دے پائیدار پہلو کوں اجاگر کریندے وزیرِ خزانہ آکھیا اے پاکستان دا پہلا پائیدار پانڈا بانڈ اے، جیندے توں حاصل تھیوݨ آلی رقم پاݨی، توانائی تے صحت دے شعبیں دے منصوبیں تے خرچ کیتی ویسی، جیہڑا حکومت دے جامع تے پائیدار ترقی دے عزم دا مظہر اے۔ پاکستان دی معاشی پیشرفت تے ڳالھ کریندے سینیٹر محمد اورنگزیب آکھیا ملکی معیشت اچ استحکام، نظم و ضبط تے مبنی اصلاحات تے مستقبل دی طرف پیشرفت دا نواں دور شروع تھی چکے ۔ انھاں معاشی اشاریں اچ بہتری دا ذکر کریندے آکھیا جی ڈی پی دی شرحِ نمو اچ ودھارا، مہانگ اچ نمایاں کمی، زرمبادلہ دے ذخیرء اچ بہتری، مالیاتی نظم و ضبط، برآمدات تے ترسیلاتِ زر پاروں ٻاہرلے شعبے اچ استحکام حاصل تھئے۔انھاں مزید آکھیا حکومت ڈیجیٹلائزیشن تے ٹیکس نیٹ اچ توسیع دے ذریعے ٹیکس اصلاحات تے عمل پیرا اے، توانائی شعبے اچ گردشی قرضے دے مکاوݨ تے کارکردگی اچ بہتری کیتے اصلاحات نافذ کیتیاں ویندیاں پئن، جݙاں جو سرکاری اداریں دی تنظیمِ نو تے نجکاری دے ذریعے اصلاحات کوں اڳوں ودھایا ویندا پئے۔ انھاں آکھیا ریگولیٹری آسانیاں، ڈیجیٹل گورننس تے مختلف شعبیں اچ ہدفی اصلاحات دے ذریعے سرمایہ کاری دے ماحول کوں بہتر بݨایا ویندا پئے۔ وزیرِ خزانہ آئی ایم ایف پروگرام دے نال پاکستان دے مضبوط عزم دا اعادہ کریندے آکھیا اصلاحاتی ایجنڈے تے عملدرآمد معیشت دی بنیاداں کوں مستحکم کیتا تے عالمی منڈیاں اچ پاکستان تے اعتماد کوں ٻیا تقویت ݙتی۔ انھاں عوامی جمہوریہ چین دی حکومت، خصوصاً چین دی وزارتِ خزانہ، پیپلز بینک آف چائنا تے National Association of Financial Market Institutional Investors دا ایں تمام عمل اچ بھرپور تعاون تے سہولت کاری تے شکریہ ادا کیتا۔ انھاں China Chengxin International Credit Rating، Fangda Partners، A&Q، وزارتِ خزانہ دی ٹیم تے بیجنگ اچ پاکستانی سفارتخانے دی خدمات دی تعریف کیتی ۔ سینیٹر محمد اورنگزیب آکھیا اے کامیاب اجراء اختتام کائنی ٻلکہ پاکستان تے چینی سرمایہ منڈی وچال طویل المدتی شراکت داری دا آغاز اے۔ انھاں ایں امید دا اظہار کیتا 7.2 ارب چینی یوآن دے پروگرام دا قیام مستقبل اچ ٻیا اجراء کیتے مضبوط بنیاد ݙیسی تے پاکستان و چین وچال مالی رابطیں تے پائیدار معاشی تعاون کوں ٻیا ودھارا ݙیسی۔