ملک بھر اچ نقلی تے غیر رجسٹرڈ دوائیں دے خلاف بھرپور کریک ڈاؤن جاری اے، وفاقی وزیرِ صحت مصطفیٰ کمال

اسلام آباد۔ 15 مئی (اے پی پی) وفاقی وزیرِ صحت مصطفیٰ کمال دی ہدایت تے ملک اچ نقلی تے غیر رجسٹرڈ دوائیں دے خلاف بھرپور کریک ڈاؤن جاری اے، کراچی اچ گزریل ݙینھ ترائے مہینے دے دوران ڈرگ ریگولیٹری اتھارٹی آف پاکستان (ڈریپ) تے وفاقی تحقیقاتی ادارہ (ایف آئی اے) دی مشترکہ کارروائیاں اچ نقلی دوائیں دے نیٹ ورکس، غیر قانونی فیکٹریاں تے غیر رجسٹرڈ انجیکشن تیار کرݨ آلے مرکزاں کوں بے نقاب کریندے وݙی مقدار اچ غیر قانونی دوائیں، خام مال تے مشینری ضبط کر ڳھدی۔ترجمان وزارتِ صحت موجب ڈریپ کراچی ایف آئی اے دے نال رل تے فروری توں مئی 2026 دے دوران کراچی دے مختلف علاقیں اچ 10 وݙیاں مشترکہ چھاپہ مار کارروائیاں کیتیاں، جنھاں اچ غیر قانونی دوائیں دی تیاری اچ ملوث نیٹ ورکس، نقلی دوائیں دے کارخانے تے چھاپے مارئے ڳئن، ٹیماں وݙی مقدار اچ غیر رجسٹرڈ دوائیں، ٹراماڈول جیھے کنٹرولڈ ڈرگز دا خام مال قبضے اچ ڳھدا جݙاں جو مشینری، پیکنگ میٹریل تے نقلی برانڈز ضبط کیتے جݙاں جو کئی ملزمان کوں گرفتار وی کیتا ڳیا۔جاری بیان اچ وزیرِ صحت مصطفیٰ کمال آکھیے جو انسانی جاناں نال کھیݙݨ آلے عناصر دے نال کہیں قسم دی رعایت کائناں ورتی ویسی، نقلی دوائیں دا خاتمہ ناگزیر اے، نقلی تے غیر رجسٹرڈ دوائیں دا خاتمہ حکومت دی اولین ترجیح اے۔ انھاں آکھیا غیر قانونی دوائیں دے کاروبار اچ ملوث عناصر دا گھیرا تنگ کیتا ویندا پئے، کئی جہیں تے چھاپیں دے دوران نقلی تے غیر رجسٹرڈ دوائیں برآمد کر تے ضبط کیتیاں ڳئن۔ مصطفیٰ کمال آکھیا ایں مکروہ کاروبار اچ ملوث لوکاں دے خلاف ڈرگ ایکٹ دے تحت سخت قانونی کارروائی عمل اچ گھن آئی ویسی، کہیں کوں وی انسانی زندگیاں نال کھیݙݨ دی اجازت کائناں ݙتی ویسی، معیاری تے محفوظ دوائیں دی بلا تعطل فراہمی اساݙی اولین ترجیح اے۔