پاکستان قابلِ عمل، آزاد تے جغرافیائی طور تے مربوط فلسطینی ریاست دے قیام دی حمایت جاری رکھیسی، صدرِ مملکت آصف علی زرداری دا عالمی یومِ نکبہ تے پیغام

اسلام آباد۔ 16 مئی (اے پی پی) صدرِ مملکت آصف علی زرداری آکھیے پاکستان دے عوام فلسطینی عوام دے حقِ خودارادیت، آزادی تے وقار دی منصفانہ جدوجہد دے نال اپݨی غیر متزلزل یکجہتی دا اعادہ کریندن، اے ݙینہہ 1948 دے انھاں المناک واقعات دی یاد ݙویندے جیندے نتیجے اچ لکھاں فلسطینی اپݨے گھراں تے زمیناں توں بے دخل تھئے تے انھاں کوں طویل عرصے تئیں مصائب و اوکھ دا سامݨا کرݨا پیا۔چھݨچھن وار  دے ݙینہہ عالمی یومِ نکبہ دے موقع تے اپݨے پیغام اچ صدر زرداری آکھیا فلسطینی عوام کیتے نکبہ محض تاریخ دا ہک بند باب کائنی ہک مسلسل حقیقت اے، جیڑھی قبضے، بے دخلی، محرومی تے بنیادی حقوق توں انکار دی صورت اچ اڄ وی جاری اے۔ پاکستان ہمیشہ فلسطینی عوام دے نال کھڑا رہیے تے اقوامِ متحدہ سودھے ٻئے بین الاقوامی فورمز تے انھاں دے جائز تے ناقابلِ تنسیخ حقوق کیتے آواز چیندا رہیے۔ پاکستان دا مؤقف انصاف، بین الاقوامی قانون تے اقوامِ متحدہ دیاں متعلقہ قرارداداں دے اصولاں تے مبنی اے۔ایوانِ صدر دے پریس ونگ توں جاری بیان دے مطابق صدرِ مملکت آکھیا ایں اہم ݙینہہ تے پاکستان عالمی برادری توں مطالبہ کریندے فلسطینی عوام، خصوصاً فلسطینی مہاجرین دی مسلسل حمایت کوں یقینی بݨایا ونڄے۔ قرارداد 194 دے تحت تسلیم شدہ فلسطینی مہاجرین دے حقِ واپسی کوں ہݨ تئیں عملی جامہ کائنی پواایا ڳیا جینکوں یقینی بݨایا ونڄݨا چاہیدے۔ پاکستان غزہ اچ فوری، غیر مشروط تے پائیدار جنگ بندی، فلسطینی عوام تئیں بلا رکاوٹ انسانی امداد ݙیوݨ تے اسرائیل دے اقدامات دے احتساب دے اپݨے مطالبے دا اعادہ کریندے۔پاکستان ہک قابلِ عمل، آزاد تے جغرافیائی طور تے مربوط فلسطینی ریاست دے قیام دی حمایت جاری رکھیسی جیہڑی 1967 توں پہلے دیاں سرحداں تے مبنی ہووے تے القدس الشریف ایندا دارالحکومت ہووے۔ صدر آکھیا ایں ݙینہہ پاکستان ساری اقوام توں مطالبہ کریندے او بین الاقوامی قانون دا احترام کرن، فلسطینی عوام دے جائز حقوق دی حمایت کرن تے مسئلہ فلسطین دے منصفانہ، پائیدار تے جامع حل کیتے مشترکہ کوششاں کرن۔ پاکستان فلسطینی عوام دے ناقابلِ تنسیخ حقوق، بشمول حقِ خودارادیت تے آزاد ریاست دے قیام، دے حصول تئیں انھاں دے نال مکمل یکجہتی جاری رکھیسی