وفاقی وزیرداخلہ محسن نقوی، وزیرِمملکت داخلہ طلال چوہدری نال میجر جنرل مجدی ہلال دی قیادت اچ مصری وزارتِ داخلہ دے وفد دی ملاقات

اسلام آباد۔ 16 مئی (اے پی پی) وفاقی وزیر داخلہ محسن نقوی تے وزیرِ مملکت داخلہ طلال چوہدری نال میجر جنرل مجدی ہلال دی قیادت اچ مصر دی وزارتِ داخلہ دے وفد ملاقات کیتی اے۔ وفد اچ بریگیڈیئرعصام ابوالخیر، بریگیڈیئر انجینئر محمد راضی تے بریگیڈیئر ڈاکٹر محمد منیر شامل ہن۔ ملاقات اچ ݙوہیں ملکاں دی وزارتِ داخلہ وچال تعاون ودھاوݨ تے اتفاق کیتا ڳیا۔وزارتِ داخلہ توں جاری اعلامیہ موجب ایں موقع تے سکیورٹی، انسدادِ دہشت گردی، انسدادِ منشیات، سائبر کرائم تے سیف سٹی دے شعبیں اچ اشتراک دے ودھارے تے ڳالھ مہاڑ کیتی ڳئی۔ ایں موقع تے نیشنل پولیس اکیڈمی تے مصر دی پولیس اکیڈمی وچال افسراں دی مشترکہ ٹریننگ کیتے تعاون ودھاوݨ دا وی فیصلہ کیتا ڳیا۔ملاقات اچ وفاقی وزیر داخلہ آکھیا مصری وفد دا دورہ ݙو پاسے تعاون دے نویں رستے ڳولݨ اچ معاون ثابت تھیسی، مصر دے نال تعلقات کوں تکڑابݨاوݨ کیتے عملی اقدامات کیتے ویسن۔ وفاقی وزیر داخلہ محسن نقوی آکھیا سانجھے مفادات دے شعبیں اچ تعاون دے نویں موقع تلاش کرݨ کیتے پاکستانی وفد وقتی مصر دا دورہ کریسی، ݙوہیں ملکاں دی وزارتِ داخلہ وچال تعاون ودھاوݨ نال ݙو پاسے تعلقات مستحکم تھیسن۔وزیرِ مملکت داخلہ طلال چوہدری ملاقات دے دوران آکھیا ݙوہیں ملکاں وچال انسدادِ دہشت گردی، انسدادِ منشیات تے داخلی سلامتی دے شعبیں اچ تعاون دے وسیع موقع موجود ہن۔ مصری وفد آکھیا اینٹی نارکوٹکس فورس، این پی اے سودھے مختلف اداریں دے دورے ٻہوں سود مند رہین تے ݙوہیں ملک مختلف شعبیں اچ ہک ݙوجھے دے تجربے توں فیدہ چا سڳدن۔ وزیر داخلہ محسن نقوی اپݨے مصری ہم منصب کیتے نیک خواہشات دا پیغام ݙتا۔ ایں موقع تے سیکرٹری داخلہ تے اعلیٰ حکام وی موجود ہن۔