قابلِ اعتماد تے قابلِ دسترس ڈیجیٹل رابطہ کاری مستقبل اچ معاشی ترقی کیتے ناگزیر اے، صدرِ مملکت آصف علی زرداری

اسلام آباد۔ 17 مئی (اے پی پی) صدرِ مملکت آصف علی زرداری آکھیے قابلِ اعتماد تے قابلِ دسترس ڈیجیٹل رابطہ کاری مستقبل اچ معاشی ترقی، عوامی خدمات تے سارے پاکستانیاں کیتے بہتر موقعیں تائیں رسائی کیتے ناگزیر اے۔ایوانِ صدر دے پریس ونگ توں جاری بیان موجب عالمی یومِ ٹیلی کمیونیکیشن و انفارمیشن سوسائٹی 2026 دے موقع تے اپݨے پیغام اچ صدرِ مملکت پاکستان دی ٹیلی کمیونیکیشن کمیونٹی تے ملک دے ڈیجیٹل انفراسٹرکچر کوں مضبوط بݨاوݨ آلے سارے لوکاں کوں مبارخ ݙتی اے۔ انھاں آکھیا ایں سال دا موضوع “ڈیجیٹل لائف لائنز: مربوط دنیا دی مضبوطی” روزمرہ زندگی اچ قابلِ اعتماد تے قابلِ رسائی رابطیں دی ودھدی اہمیت کوں اجاگر کریندے۔ ڈیجیٹل نیٹ ورکس تعلیم، صحت، تجارت، بینکاری تے عوامی خدمات کیتے بنیادی ضرورت بݨ چکن جݙاں جو پرے تے پسماندہ علاقیں اچ رہݨ آلے شہریاں کیتے اے رابطہ کاری روزگار تے معلومات تئیں رسائی دا اہم ذریعہ بݨ ڳئی اے۔صدرِ مملکت آکھیا پاکستان دا ٹیلی کمیونیکیشن شعبہ قومی ترقی اچ نمایاں کردار ادا کریندا پئے۔ انھاں ݙسایا مالی سال 25-2024 دے دوران ایں شعبے اچ 838 ملین ڈالر دی سرمایہ کاری تھئی جݙاں جو ایں ہک ہزار 75 ارب روپے دی آمدݨ پیدا کیتی۔ انھاں آکھیا ملک اچ 205 ملین توں زیادہ ٹیلی کام صارفین تے 161 ملین توں زیادہ براڈبینڈ صارفین موجود ہن جنھاں کوں فائبر آپٹک نیٹ ورک، سب میرین کیبل سسٹمز تے ملک گیر موبائل کوریج دی سہولت حاصل اے۔انھاں آکھیا مارچ 2026 اچ پاکستان دے آئی ایم ٹی/فائیو جی (5G) اسپیکٹرم آکشن دی کامیاب تکمیل ملک دے ڈیجیٹل مستقبل دی پاسے ہک اہم پیش رفت ثابت تھئی اے۔ انھاں آکھیا ایں نیلامی توں قومی خزانے کوں 509.6 ملین ڈالر حاصل تھئے تے موبائل آپریٹرز کیتے اسپیکٹرم دی دستیابی اچ اضافہ تھیا جیں توں تکھی رفتار تے قابلِ اعتماد معلوماتی رابطیں دی بنیاد ملی۔ انھاں آکھیا وفاقی حکومت صوبائی حکومتاں دے تعاون نال ملک بھر اچ ڈیجیٹل رسائی تے رابطہ کاری کوں بہتر بݨاوݨ دیاں پالیسیاں تے عمل پیرا اے۔انھاں آکھیا یونیورسل سروس فنڈ دے ذریعے براڈبینڈ تے وائس سروسز لکھاں ایجھے لوکاں تئیں پڄائیاں ڳئن جیہڑے پہلے انھاں سہولتاں توں محروم ہن جݙاں جو فائبر نیٹ ورک دی توسیع، سرمایہ کاری دے ودھارے تے پرے دے علاقیں کیتے سیٹلائٹ کمیونیکیشن ضوابط کوں حتمی شکل ݙیوݨ دے اقدامات وی جاری ہن۔ صدرِ مملکت وزارتِ انفارمیشن ٹیکنالوجی و ٹیلی کمیونیکیشن، پی ٹی اے (PTA)، سیلولر موبائل آپریٹرز تے ٻئے شراکت داراں دیاں کوششاں کوں چنڳاں اکھیندے آکھیے اے ادارے پاکستان دے ڈیجیٹل نظام کوں مضبوط بݨاوݨ اچ اہم کردار ادا کریندے پئن