سینیٹرشیری رحمان دی بھارتی آرمی چیف دے پاکستان مخالف ریمارکس دی مذمت

اسلام آباد۔ 17 مئی (اے پی پی) پاکستان پیپلز پارٹی دی نائب صدر سینیٹر شیری رحمان بھارتی آرمی چیف دی طرفوں پاکستان دے خلاف “مخالفانہ تے اشتعال انگیز ریمارکس” دی شدید مذمت کریندے خبردار کیتے جو ایجھے بیانات نال علاقائی امن تے استحکام کوں شدید خطرہ لاحق اے۔ اپݨے ہک بیان اچ شیری رحمان آکھیا عالمی سطح تے پاکستان دی مسلسل سفارتی، سیاسی تے دفاعی کامیابیاں بھارت کوں مایوس تے بے چین کر ݙتے۔ انھاں آکھیا عالمی برادری ہݨ پاکستان کوں ہک ذمہ وار، باوقار تے نمایاں ایٹمی طاقت دے طور تے تسلیم کریندی اے۔ پی پی پی رہنما آکھیا وݙیاں عالمی طاقتاں علاقائی امن، جھیڑے دے حل تے سفارتی پیش رفت متعلق معاملات تے پاکستان دے نال سرگرمِ عمل ہن۔ بھارت دی جنگی ذہنیت تے تنقید کریندے انھاں آکھیا نئی دہلی اکثر جارحانہ اقدامات شروع کریندے تے بعد اچ کشیدگی اچ کمی کیتے بین الاقوامی برادری نال رجوع کریندے۔شیری رحمان آکھیا امن تے مذاکرات دی وکالت کرݨ آلیاں آوازاں بھارت دے اندروں وی ابھردیاں پئن، جنھاں اچ سابق فوجی حکام، آر ایس ایس نال منسلک حلقے تے کشمیر دے گروپ شامل ہن۔ انھاں آکھیا جاری عالمی جھیڑیں دے اثرات وچال ہندوستانی عوام پہلے ہی مہانگ تے معاشی مشکلات دا سامݨا کریندے پئن۔ شیری رحمان بھارتی وزیراعظم نریندر مودی دی حکومت تے زور ݙتا او محاذ آرائی دیاں پالیسیاں تے عمل کرݨ دے بجائے امن کیتے اپݨے عوام دیاں امنگاں دا احترام کرے۔