اسپیکر قومی اسمبلی سردار ایاز صادق دا سینئر صحافی الطاف حسن قریشی دے انتقال تے اظہارِ تعزیت

اسلام آباد۔ 17 مئی (اے پی پی) اسپیکر قومی اسمبلی سردار ایاز صادق ممتاز صحافی، معروف کالم نگار، دانشور تے اردو ڈائجسٹ دے بانی الطاف حسن قریشی دے انتقال تے ݙکھ تے افسوس اظہار کیتے۔قومی اسمبلی سیکرٹریٹ توں جاری اپݨے تعزیتی پیغام اچ اسپیکر سردار ایاز صادق مرحوم الطاف حسن قریشی دی صحافت، ادب تے قومی شعور دی بیداری کیتے خدمات کوں خراجِ تحسین پیش کریندے آکھیا الطاف حسن قریشی اپݨیاں تحریراں، فکری بصیرت تے اصولی صحافت دے ذریعے کئی نسلاں دی رہنمائی کیتی اے۔ انھاں دا شمار پاکستان دی صحافت دے انھاں معتبر ناویں اچ تھیندے جنھاں قومی تے ملی اقدار دے ودھارےاچ اہم کردار ادا کیتا۔اسپیکر سردار ایاز صادق آکھیا الطاف حسن قریشی دے انتقال نال صحافت تے علمی دنیا ہک مدبر، بااصول تے صاحبِ فکر شخصیت توں محروم تھی ڳئی اے۔ مرحوم دی صحافتی، ادبی تے فکری خدمات کوں ہمیشہ قدر تے احترام دی نگاہ نال یاد رکھیا ویسی۔ انھاں مرحوم دے اہلِ خانہ نال دلی تعزیت تے ہمدردی دا اظہار کیتا۔ انھاں آکھیا ݙکھ دی ایں گھڑی اچ او ݙکھی خاندان دے ݙکھ اچ برابر دے شریک ہن۔ اسپیکر قومی اسمبلی اللہ تعالیٰ توں مرحوم دے درجات دی بلندی تے ݙکھی خاندان کوں ایں ناقابلِ تلافی ضیان کوں برداشت کرݨ کیتے صبرِ جمیل عطا فرماوݨ دی دعا کیتی اے۔