بھارتی آرمی چیف دا بیان قابلِ مذمت، مودی دی مایوسی ظاہر کریندے، مشعال حسین ملک

اسلام آباد۔ 17 مئی (اے پی پی) چیئرپرسن پیس اینڈ کلچر آرگنائزیشن، خواتین کوں بااختیار بݨاوݨ تے انسانی حقوق بارے وزیرِاعظم دی سابق معاونِ خصوصی تے جیل اچ بند کشمیری حریت رہنما محمد یاسین ملک دی اہلیہ مشعال حسین ملک بھارتی آرمی چیف دے اڄوکےہ بیان دی شدید مذمت کریندے اینکوں مودی حکومت دی مایوسی تے سیاسی جذبات دی عکاسی قرار ݙتے۔ اپݨے ہک بیان اچ مشعال حسین ملک آکھیا پاکستان دی تاریخ قربانیاں، لچک، بہادری تے فتوحات نال جڑی ہوئی اے۔ انھاں خبردار کیتا پاکستان دے عوام دی طاقت تے اتحاد دے عزم کوں کمزور کرݨ دی کوشش کرݨ آلے ناکام رہسن۔ انھاں آکھیا ہندوستان کوں پڑوسی ملکاں دے خلاف اشتعال انگیز بیان بازی دا سہارا گھنݨ دے بجائے اپݨے وسیع داخلی بحراناں، ودھدی بدامنی تے تقسیم تے توجہ ݙیوݨی چاہیدی اے۔اڄوکی علاقائی کشیدگی دا حوالہ ݙیندے مشعال حسین ملک آکھیا پاکستان دیاں مسلح افواج معرکہِ حق دے دوران اپݨی پیشہ ورانہ صلاحیت تے عزم دا مظاہرہ کیتا جیں توں بھارت دا جارحانہ انداز تے تسلط دے غلط مفروضیں کوں بے نقاب کیتا ڳیا۔ انھاں آکھیا خطے اچ جنگ دیاں تڑیاں انتہائی غیر ذمہ دارانہ، خطرناک تے ناقص فیصلے دی عکاس ہن، ایں طرح دے اشتعال انگیز بیانات دا مقصد بین الاقوامی توجہ کوں بھارت دے غیر قانونی طور تے زیرِ تسلط جموں و کشمیر اچ جاری صورتحال توں ہٹاوݨ اے۔