موسمیاتی تبدیلی تے رہائشی ناانصافی دا ساریں توں ودھ ٻوجھ غریب طبقے چیندے پئن، ڈاکٹر مصدق ملک

باکو، آذربائیجان۔ 17 مئی (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو موسمیاتی تبدیلی، غربت تے رہائشی ناانصافی ہک ٻئے نال جڑئے مسئلے ہن جنھاں دا ساریں توں ودھ ٻوجھ غریب تے کمزور طبقے چیندے پئن۔ انھاں عالمی برادری تے زور ݙتا جو محفوظ، جامع تے مساوی شہراں دی تعمیر کیتے انصاف تے مبنی شہری پالیسیاں کوں ترجیح ݙتی ونڄے۔اے ڳالھ انہاں باکو اچ منعقدہ ورلڈ اربن فورم 13 توں خطاب کریندے آکھی۔ وزارت توں جاری بیان موجب وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک آذربائیجان دے دارالحکومت باکو اچ منعقدہ ورلڈ اربن فورم (WUF13) دے تیرہویں اجلاس اچ پاکستان دی طرفوں قومی وزارتی بیان ݙتا۔ فورم دا موضوع “دنیا کوں رہائش ݙیوݨ: محفوظ تے مضبوط شہر تے کمیونٹیز” ہئی۔ایں موقع تے خطاب کریندے ڈاکٹر مصدق ملک موسمیاتی تبدیلی، شہری عدم مساوات، غربت تے رہائشی ناانصافی دے سانجھے تعلق کوں اجاگر کیتا۔ انھاں آکھیا موسمیاتی آفات دا ساریں توں ودھ ٻوجھ انھاں کمزور تے پسماندہ طبقےتے پوندے جنھاں دا ایں بحران اچ ساریں توں گھٹ کردار ہوندے۔ وفاقی وزیر آکھیا کہیں خاندان کوں غربت توں نکلݨ اچ ݙو نسلاں لڳ ویندن پر غیر محفوظ تے غیر پائیدار رہائشی ڈھانچیں پاروں چھل جیھے موسمیاتی آفتاں کجھ ݙینہاں اچ انھاں دی ݙھاکیں دی محنت کوں تباہ کر ݙیندن تے او ول غربت دی دلدل اچ چلے ویندن۔ انھاں آکھیا اے صرف رہائش دا بحران نی بنیادی طور تے انصاف دا بحران اے۔ڈاکٹر مصدق ملک شہری منصوبہ بندی تے رہائشی پالیسیاں اچ انصاف تے شمولیت کوں مرکزی حیثیت ݙیوݨ تے زور ݙیندے آکھیا اساکوں انصاف کیتے اپݨیاں آوازاں ہک ٻئے نال ملاوݨیاں ہوسن تاں جو غریباں دیاں آوازاں دب نہ ونڄن۔ جیڑھے لوک چھل، ہیٹ ویوز تے صحت و تعلیم دیاں سہولتاں توں محرومی پاروں جان ونڄیندن ، او شہر ڈیزائن نی کریندے اساں کریندوں۔ او اساݙیاں پالیسیاں تے حکمتِ عملیاں دا شکار بݨدن۔انھاں آکھیا پاکستان دی تقریباً 24 کروڑ آبادی اچوں قریب 50 فیصد شہری علاقیں اچ رہندی اے جݙاں جو شہری آبادی دا تقریباً 55 فیصد غیر رسمی آبادیاں تے کچی وستیاں اچ رہندے ۔ انھاں آکھیا کچی آبادیاں محض ہک پالیسی دی اصطلاح نی ہک طرزِ زندگی ہن۔ انھاں وستیاں اچ حقیقی انسان رہندن۔موسمیاتی تبدیلی دے شہری علاقیں تے ودھدے اثرات دا ذکر کریندے ڈاکٹر مصدق ملک کراچی اچ 2024 دے شدید ہیٹ ویو دا حوالہ ݙتا جتھاں درجہ حرارت 47 ڈگری سینٹی گریڈ تئیں پڄ ڳیا ہئی۔ انھاں آکھیا ہک اندازے موجب صرف ست ݙینھ اچ تقریباً 560 لوک ہیٹ ویو پاروں جاں بحق تھئے۔ انھاں آکھیا متاثرین اچ زیادہ تر او غریب تے محروم طبقات شامل ہن جیہڑے غیر رسمی آبادیاں اچ بنیادی ڈھانچے، کولنگ سسٹمز، صحت دیاں سہولتاں تے موسمی تحفظ دے بغیر زندگی گزریندے پئن ۔ وفاقی وزیر آکھیا بحراناں دا ساریں توں ودھ ٻوجھ ہمیشہ غریب طبقہ چیندے۔ ائیر کنڈیشنڈ گھراں تے اپارٹمنٹس اچ رہݨ آلے خوشحال طبقے محفوظ رہندن جݙاں جو کمزور طبقے ساریں توں ودھ متاثر تھیندن۔پاکستان اچ چھل دے دے تباہ کن اثرات دا ذکر کریندے ڈاکٹر مصدق ملک آکھیا ملک اچ پچھلے چار وݙے چھل دے دوران تقریباً 6 ہزارلوک جان دی بازی ہار چکن جݙاں جو تقریباً 20 ہزار لوک زخمی یا معذور تھئے تے تقریباً 4 کروڑ لوک بے گھر تھئے۔ انھاں آکھیا موسمیاتی آفتاں توں تھیوݨ آلی تباہی کئی جنگاں تے جھیڑے توں وی زیادہ انسانی نقصان دا سبب بݨی اے۔ ڈاکٹر مصدق آکھیا اساں سستی رہائش کوں ہک فلاحی سہولت دے طور تے ݙیکھدوں، حق دے طور تے نی ، تے اے سوچ بدلݨی ہوسی۔وفاقی وزیر آکھیا پائیدار تے ماحول دوست شہری ترقی کوں محض خوبصورتی، نعریں یا سرمایہ کاری تئیں محدود نی ہووݨا چاہیدا۔ انھاں آکھیا گرین تے پائیدار ترقی کوں صرف ہک اصطلاح یا ظاہری خوبصورتی نی بݨݨا چاہیدا۔ اساکوں سرمایہ کاراں کیتے نی لوکاں کیتے رہائش تعمیر کرݨی چاہیدی اے۔ اساکوں غریباں دی آواز سݨنی ہوسی کیوں جو اڄ انہاں دی آواز اتھاں موجود کائنی۔ اپݨے خطاب دے اختتام تے ڈاکٹر مصدق ملک مطالبہ کیتا “باکو کال فار ایکشن” کوں انصاف تے مبنی شہری حل، کمزور طبقات دے تحفظ تے رہائش دے شعبے اچ قیاس آرائیاں دی حوصلہ شکنی تے توجہ ݙیوݨی چاہیدی اے۔ انھاں ایں امر تے زور ݙتا عالمی برادری کوں ایجھے محفوظ، جامع، مضبوط تے مساوی شہر تعمیر کرݨ کیتے سانجھے اقدامات کرݨے ہوسن جتھاں ہر بندے کوں باوقار زندگی میسر ہووے۔