سعودی عرب، زائرین کیتے تھری ڈی انٹرایکٹو نقشیاں دی سہولت دا آغاز

ریاض۔ 18 مئی (اے پی پی) حرمین شریفین دے امور دی نگرانی کرݨ آلی جنرل اتھارٹی زائرین دی خدمت کیتے حرمین شریفین کیتے تھری ڈی (3D) انٹرایکٹو نقشیاں دا اجرا شروع کیتے تانجو مقدس ڄہیں تے المسجد الحرام آلے پاسے ونڄݨ آلے رستیاں، ہوٹلاں تے نیڑے دی سہولتاں وچال براہِ راست رابطہ قائم کیتا ونڄ سڳے۔ العربیہ اردو دے مطابق جنرل اتھارٹی آکھیا جو ایں اقدام نال زائرین دے تجربے کوں بہتر بݨایا ونڄ سڳسی اتے نقل و حمل نال جڑے چیلنجز کوں ڳھٹ کیتا ونڄ سڳسی، خاص طور تے رش دے اوقات دے دوران مشکلات اچ ڳھٹکی کیتی ونڄ سڳسی۔ تھری ڈی انٹرایکٹو نقشے استعمال اچ آسان تے فوری جواب ݙیوݨ الے انٹرفیس دے ذریعے مقدس مقام دے اندر صارف دے تجربے کوں بہتر بݨیندن۔ انھاں نقشیاں توں مستفید تھیوݨ آلے انتہائی بہتر کارکردگی دے نال معلومات تے خدمات تائیں رسائی حاصل کر سڳدن۔ اے اقدام زائرین دی خدمت کیتے جدید ٹیکنالوجیز کوں بروئے کار گھن آوݨ کیتے حرمین شریفین دا انتظام کرݨ آلی جنرل اتھارٹی دی کوششاں دا حصہ اے۔ ایں اقدام اچ کئی تکنیکی فیدے شامل ہن جنھاں اچوں سب توں نمایاں سرکاری چینلز تے سوشل media پلیٹ فارمز دے ذریعے میڈیا دی تشہیر کوں تیز کرݨ اے۔ ٻاہرلے ملک توں آوݨ آلے زائرین تے توجہ مرکوز کیتی ڳئی اے تانجو ایں سروس دی زیادہ توں زیادہ ممکنہ طبقے تائیں رسائی کوں یقینی بݨایا ونڄ سڳے۔ ایں نویں اقدام اچ علمی دروس تے حفظ دے حلقیاں دے مقامات دے نال نال افتا تے رہنمائی دے دفاتر دے مقامات وی شامل ہن جیہڑے زائرین دے مذہبی تے علمی تجربے کوں بھرپور بݨیندن۔ ایں دے علاوہ موسم دی معلومات، نماز دے مقامات تے رش دی صورتحال، طواف تے سعی دے علاقے تے بیت الخلا دی معلومات وی شامل ہن جیہڑیاں حرکت کوں منظم کرݨ تے رش کوں تقسیم کرݨ اچ معاون ثابت تھیندن۔ جنرل اتھارٹی آکھیا جو ایں سروس کوں “نسک” کارڈ اچ ضم کیتا ویسی جئیں نال ضیوف الرحمن کوں فراہم کیتی ونڄݨ آلی ڈیجیٹل خدمات دے انضمام کوں فروغ ملسی اتے خدمات دے معیار اچ اضافہ تھیسی۔ اے اقدام حرمین شریفین دے زائرین کیتے ہک مربوط تے سوکھا تجربہ فراہم کرݨ کیتے اتھارٹی دی کوششاں دا تسلسل اے جیہڑا ضیوف الرحمن کیتے مملکت دی ݙیکھ بھال دی عکاسی کریندے اتے حج و عمرہ دے زائرین دی خدمت اچ مملکت دے “وژن 2030” دے اہداف کوں حاصل کرݨ اچ تعاون کریندے۔