پاکستان دی متحدہ عرب امارات دے براکہ جوہری توانائی پلانٹ تے ڈرون حملے دی مذمت

اسلام آباد۔ 18 مئی (اے پی پی) پاکستان نے متحدہ عرب امارات دے براکہ جوہری توانائی پلانٹ تے ڈرون حملے دی شدید مذمت کیتی اے۔ سنوار کوں ترجمان وزارتِ خارجہ آپݨے بیان اچ آکھیا جو پاکستان 17 مئی 2026 کوں متحدہ عرب امارات دے براکہ جوہری توانائی پلانٹ تے تھیوݨ آلے ڈرون حملے دی شدید مذمت کریندے۔ انھاں آکھیا جو پاکستان متحدہ عرب امارات دے برادر عوام تے حکومت دے نال مکمل یکجہتی دا اظہار کریندے، جوہری تنصیبات کوں دانستہ طور تے نشانہ بݨاوݨ بین الاقوامی قانون بشمول بین الاقوامی انسانی قانون، اقوامِ متحدہ دے منشور تے بین الاقوامی جوہری توانائی ایجنسی (IAEA) دے دستور تے قرارداداں اچ درج جوہری تحفظ تے سلامتی دے بنیادی اصولاں دی سنگین خلاف ورزی اے۔ انھاں دا آکھݨ ہئی جو جوہری تنصیبات کوں کہیں صورت نشانہ نئی بݨایا ونڄݨا چاہیدا، ایجھی غیر ذمہ دارانہ کارروائیاں انسانی جاناں، ماحولیات تے علاقائی تے عالمی امن و سلامتی کیتے ممکنہ طور تے تباہ کن تے ناقابلِ تلافی نتائج دا باعث بݨ سڳدن۔ ترجمان آکھیا جو شہری جوہری بنیادی ڈھانچے دے تقدس تے ناقابلِ تعرض ہووݨ دا اصول ہک تسلیم شدہ بین الاقوامی ضابطہ اے جئیں کوں بلا امتیاز ہر صورت برقرار رکھیا ونڄݨا چاہیدے۔ انھاں آکھیا جو پاکستان سارے فریقاں تے زور ݙیندے جو او زیادہ توں زیادہ تحمل دا مظاہرہ کرن، بین الاقوامی قانون تے بین الاقوامی انسانی قانون دے تحت آپݨی ذمہ واریاں کوں پورا کرن اتے ایجھے اقدامات توں گریز کرن جیہڑے خطے اچ ٻئی کشیدگی دا سبب بݨن اتے جنھاں دے اثرات خطے توں کہیں ودھ تھئی سڳدن۔ انھاں دا آکھݨ ہئی جو اقوامِ متحدہ دے منشور دے اصولاں تے مقاصد دے مطابق ڳالھ مہاڑ تے سفارت کاری ای خطے اچ پائیدار امن، استحکام تے کشیدگی اچ ڳھٹکی دا واحد قابلِ عمل راہ اے۔