سعودی حکومت نال معاہدہ نہ تھیوݨ دے پاروں ایں سال عازمین ٹرین دے بجائے بساں دے ذریعے مکہ توں مدینہ سفر کریسن، ہݨ وی پاکستان خطے اچ سب توں سستا ترین حج کرویندا پئے، وفاقی وزیر سردار محمد یوسف دی میڈیا نال ڳالھ مہاڑ

مکہ مکرمہ۔ 18 مئی (اے پی پی) وفاقی وزیر برائے مذہبی امور سردار محمد یوسف آکھیا جو سعودی حکومت دے نال معاہدہ طے نہ تھیوݨ پاروں ایں سال پاکستانی عازمینِ حج مکہ مکرمہ تے مدینہ منورہ وچال ٹرین تے سفر نہ کر سڳسن اتے انھاں دی نقل و حمل بساں دے ذریعے کیتی ویسی۔ حکومتِ پاکستان دی کاوشوں تے انتھک محنت دے باعث پچھلے چار سال توں حج اخراجات اچ کوئی اضافہ نہیں کیتا ڳیا اتے ایں ویلھے پاکستان پورے خطے اچ سب توں سستا حج پیکیج فراہم کریندا پئے جݙاں جو ہمسایہ ملک بھارت اچ حج پیکیج پاکستان توں 6 لاکھ روپے مہانگا اے اتے اتھاں ایں معیار دی سہولیاں وی میسر کائنی۔ او مکہ مکرمہ اچ حج انتظامات دا جائزہ گھنݨ دے بعد صحافیاں نال ڳالھ مہاڑ کریندے پئے ہن۔ وفاقی وزیر آکھیا جو رواں سال حج کیتے رجسٹریشن دا تجربہ انتہائی کامیاب رہیا اتے آئندہ حج دی پالیسی تے انتظامات دا سلسلہ سعودی حکومت ولوں باقاعدہ اعلان دے نال ای فوری طور تے شروع کر ݙتا ویسی۔ انھاں ݙسایا جو پچھلے سال رجسٹریشن دے اشتہار تے ساݙھے چار لاکھ توں ودھ درخواستاں موصول تھیاں ہن۔ سردار محمد یوسف  مکہ مکرمہ، مدینہ منورہ تے مشاعرِ مقدسہ اچ رہائش تے ٻئے انتظامات تے اطمینان دا اظہار کریندیں ہوئیں آکھیا جو مکہ مکرمہ اچ پاکستان حج مشن تے ہاؤسنگ شعبے بہترین خدمات فراہم کیتن۔ عازمینِ حج دی سہولت کیتے سرکاری اسکیم اچ پہلی واری انڄ کمرے دی سہولت متعارف کرائی ڳئی اے، جئیں دے تحت تقریباً 8 ہزار عازمین اضافی ادائیگی (ݙو لاکھ روپے فی بیڈ) کر تے اے سہولت حاصل کیتی اے اتے او ایں انتظام توں مکمل مطمئن ہن۔ پیکیج دی تفصیلات ݙسیندیں ہوئیں انھاں آکھیا جو سرکاری سکیم دے تحت ساݙھے 11 لاکھ تے 12 لاکھ روپے دے ݙو پیکیجز (شارٹ تے لانگ) ݙتے ڳئن جنھاں اچ ٻئے ممالک دے مقابلے اچ کہیں بہتر سہولتاں فراہم کیتی ڳئن، جیہڑے لوگ زیادہ اخراجات برداشت کر سڳدن، انھاں کیتے پرائیویٹ سیکٹر وی موجود اے جتھاں 20 توں 30 لاکھ روپے تائیں دے پیکیجز دستیاب ہن، تاہم سرکاری پیکیج دے معیار کوں برقرار رکھیا ڳئے ۔ انھاں ݙسایا جو انڈین عازمینِ حج کوں اتھاں دی کرنسی دے لحاظ نال پاکستانی 18 لاکھ روپے تائیں ادا کرݨے پوندے پئن اتے سہولیاں نہ ہووݨ پاروں او کافی پریشان ہن، جئیں دا اظہار انھاں پاکستانی خدام الحجاج نال وی کیتے۔ انھاں ایں عزم دا اظہار کیتا جو حاجیاں دی خدمت کوں اساں ہک سرکاری ڈیوٹی نئی ٻھل عبادت سمجھدوں کیونجو اے اللہ دے مہمان ہن، تے اساݙا حج مشن ایں جذبے دے تحت خدمات سرانجام ݙیندا پئے تانجو اللہ دے سارے مہمان اتھاں توں مطمئن تھی تے واپس آون۔