پاکستان تے چین تعلیم، ٹیوٹ، مصنوعی ذہانت، ڈیجیٹل تعلیم تے صنعتی تعاون دے شعبیاں اچ تعاون کوں ٻیا ودھاوݨ تے اتفاق کیتے، وفاقی وزیرِ تعلیم و پیشہ ورانہ تربیت دی پریس کانفرنس

اسلام آباد۔ 18 مئی (اے پی پی) وفاقی وزیرِ تعلیم تے پیشہ ورانہ تربیت ڈاکٹر خالد مقبول صدیقی آکھیا جو پاکستان تے چین تعلیم، ٹیکنیکل اینڈ ووکیشنل ایجوکیشن اینڈ ٹریننگ (ٹیوٹ)، مصنوعی ذہانت، ڈیجیٹل تعلیم تے صنعتی تعاون دے شعبیاں اچ تعاون کوں ٻیا ودھاوݨ تے اتفاق کیتے۔ سنوار کوں وفاقی وزیرِ تعلیم خالد مقبول صدیقی چین دے دورے توں واپسی تے پریس کانفرنس توں خطاب کریندے پئے ہن۔ ڈاکٹر خالد مقبول صدیقی دی قیادت اچ پاکستان دے اعلیٰ سطحی وفد 13 توں 18 مئی 2026 تائیں عوامی جمہوریہ چین دا اہم دورہ کیتا۔ وفد اچ نیشنل ووکیشنل اینڈ ٹیکنیکل ٹریننگ کمیشن (نیوٹیک) دی چیئرپرسن گل مینہ بلال سمیت ٻئے اعلیٰ حکام شامل ہن۔ دورے دا آغاز 2026 ورلڈ ڈیجیٹل ایجوکیشن کانفرنس اچ شرکت توں تھیا جتھاں “آرٹیفیشل انٹیلی جنس پلس ایجوکیشن” دے موضوع تے عالمی ڈیجیٹل تعلیمی تبدیلی دے تناظر اچ پاکستان دے عزم کوں اجاگر کیتا ڳیا۔ انھاں ݙسایا جو دورے دے دوران پاکستانی وفد چین دے نائب وزیرِ تعلیم تے ٻئے اعلیٰ حکام نال تفصیلی مشاورتی اجلاس کیتے جنھاں اچ ݙوہائیں ممالک وچال تعلیمی تعاون کوں ٻیا ودھاوݨ تے اتفاق کیتا ڳیا۔ چینی حکام وزیراعظم پاکستان دے متوقع دورۂ چین توں پہلے مشترکہ تعلیمی منصوبہ بندی کوں حتمی شکل ݙیوݨ، پاکستان کوں ورلڈ ڈیجیٹل ایجوکیشن الائنس اچ شامل ہووݨ دی دعوت ݙیوݨ تے کنفیوشس انسٹی ٹیوٹس توں انڄ ڈیجیٹل چینی زبان کورس پلیٹ فارم قائم کرݨ دی تجاویز پیش کیتی۔ چینی فریق پاکستان اچ آرٹیفیشل انٹیلی جنس انوویشن ہبز دے قیام، مصنوعی ذہانت، سرحد پار ای کامرس تے سمارٹ کول مائننگ اچ سہ فریقی تعاون جݙاں جو پاکستان کوں انٹرنیشنل چائنیز ایجوکیشن کمیونٹی تے چین دے نیشنل سمارٹ ایجوکیشن پلیٹ فارم اچ شامل کرݨ دی وی تجویز ݙتی۔ انھاں آکھیا جو پاکستانی وفد چین پاکستان ٹی وی ای ٹی انڈسٹریل سینٹر آف ایکسیلینس (CPTICE) دی کارکردگی رپورٹ پیش کیتی جئیں کوں چینی حکام سراہیا۔ ݙوہائیں ممالک ایں امر دا وی جائزہ گھدا جو ایں ویلھے 38 ہزار 478 پاکستانی طلبہ چینی جامعات اچ زیرِ تعلیم ہن جنھاں دی اکثریت میڈیکل پروگرامز اچ داخل اے۔ فریقین انفارمیشن ٹیکنالوجی، آرٹیفیشل انٹیلی جنس، سائنس تے انجینئرنگ دے شعبیاں اچ پاکستانی طلبہ دی تعداد ودھاوݨ تے اتفاق کیتا۔ انھاں ݙسایا جو چین دے دورے دے دوران صوبہ آنہوئی اچ وی وفد جامع تعلیمی و صنعتی تعاون پروگرام اچ شرکت کیتی۔ 13 مئی کوں آنہوئی پراونشل ڈیپارٹمنٹ آف ایجوکیشن دے زیرِ اہتمام چین پاکستان انڈسٹری-ایجوکیشن کوآپریشن سمپوزیم منعقد تھیا جئیں اچ جنوری 2026 دے دورے دے نتائج دا جائزہ گھدا ڳیا اتے مستقبل دے تعاون دے فریم ورک کوں واضح کیتا ڳیا۔ اجلاس اچ سمارٹ مینوفیکچرنگ، نئی توانائی، مصنوعی ذہانت تے روایتی چینی طب اچ “چینی زبان پلس ووکیشنل سکلز” تعاون کوں فروغ ݙیوݨ، اوورسیز برانچ کیمپسز تے سکلز سینٹرز دے قیام، تعلیمی اسناد دے باہمی اعتراف تے مشترکہ معیارات دی تیاری تے اتفاق کیتا ڳیا۔ ایں تعاون کوں چین پاکستان اقتصادی راہداری (سی پیک) دے تحت قومی سطح دے ماڈل منصوبے دے طور تے فروغ ݙیوݨ دی تجویز وی ݙتی ڳئی۔ چین دے دورے اچ وفد ہیفئی ووکیشنل اینڈ ٹیکنیکل کالج تے آنہوئی آٹوموٹیو ووکیشنل اینڈ ٹیکنیکل کالج دا وی دورہ کیتا جتھاں “2+2” تے “3+1” مشترکہ تربیتی پروگرامز، فیکلٹی ایکسچینج، نئی توانائی گاݙیاں تے انٹیلی جنٹ کنیکٹڈ وہیکلز دے شعبیاں اچ مشترکہ صنعتی ادارے قائم کرݨ تے اتفاق کیتا ڳیا۔ انھاں منصوبیاں دے آغاز کیتے ستمبر 2026 دا ہدف مقرر کیتا ڳئے۔ ایں وچال چین پاکستان ٹی وی ای ٹی انڈسٹریل سینٹر آف ایکسیلینس تے چین اچ پاکستانی سفارتخانے دے اشتراک نال آئی سی ٹی و ٹیلی کام توں متعلق ٹی وی ای ٹی سمپوزیم وی منعقد تھیا جئیں اچ چینی اداریاں تے کمپنیاں ڈیجیٹل سکلز، سرمایہ کاری، ٹیکنالوجی منتقلی تے صنعتی ضروریات دے حوالے نال ڳالھ کیتی۔ سمپوزیم دے دوران چھی مفاہمتی یادداشتاں تے دستخط کیتے ڳئے جنھاں دا تعلق بین الاقوامی فنی تربیت، پیشہ ورانہ تعلیم، زبان تے ثقافتی تعاون تے ٹیکنیکل سرٹیفیکیشن توں اے۔ مزید برآں چین پاکستان میٹرولوجیکل سروس پروموشن بیس، چین پاکستان ایگریکلچرل سپیشل انٹرنیشنل چائنیز ایجوکیشن بیس تے پیری ورکشاپ دے منصوبیاں دا وی افتتاح کیتا ڳیا جئیں دی تقریب اچ چین اچ پاکستان دے سفیر شرکت کیتی۔اعلامیہ دے مطابق پاکستان-چین آئی سی ٹی و ٹیلی کام بی ٹو بی (B2B) انویسٹمنٹ کانفرنس 24 مئی 2026 کوں ہانگژو اچ وزیراعظم پاکستان دے دورۂ چین دے موقع تے تھیسی جݙاں جو جولائی 2026 اچ پاکستان اچ روایتی چینی طب توں بارے کانفرنس اچ آنہوئی وفد شرکت کریسی۔ وفد دے سربراہ ڈاکٹر خالد مقبول صدیقی آکھیا جو آنہوئی تے پاکستان وچال تعلیمی تعاون کوں ݙوہائیں ممالک دے باضابطہ تعلیمی عملدرآمد منصوبے دا حصہ بݨایا ویسی جݙاں جو چیئرپرسن نیوٹیک گل مینہ بلال مصنوعی ذہانت تے سمارٹ مینوفیکچرنگ اچ عملی تعاون کوں ٻیا وسعت ݙیوݨ تے زور ݙتا۔