پاکستان دی ترقی کوں پراکسیز تے منفی پروپیگنڈے دے ذریعے سبوتاژ کرݨ دی کوشش کرݨ آلیاں دشمن قوتاں بالآخر ناکام تھیسن، فیلڈ مارشل سید عاصم منیر

راولپنڈی۔ 19 مئی (اے پی پی) چیف آف آرمی اسٹاف اتے چیف آف ڈیفنس فورسز فیلڈ مارشل سید عاصم منیر پاکستان دی مسلح افواج دی عوام دی بھرپور حمایت دے نال ہر قسم دی دہشت گردی دے مکمل خاتمے دے پختہ عزم دا اعادہ کیتے تے آکھیے جو پاکستان دی ترقی کوں پراکسیز تے منفی پروپیگنڈے دے ذریعے سبوتاژ کرݨ دی کوشش کرݨ آلیاں دشمن قوتاں ریاست دی مضبوطی تے عوام دے اتحاد دے باعث بالآخر ناکام تھیسن۔منگل کوں پاک فوج دے شعبہ تعلقات عامہ (آئی ایس پی آر) توں جاری بیان دے مطابق چیف آف آرمی اسٹاف تے چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرات کوئٹہ گیریژن دا دورہ کیتا۔ دورے دے دوران فیلڈ مارشل کمانڈ اینڈ اسٹاف کالج کوئٹہ اچ زیرِ تربیت افسراں تے فیکلٹی ممبران توں خطاب کیتا۔آپݨے خطاب اچ انھاں کمانڈ اینڈ اسٹاف کالج کوئٹہ دے اعلیٰ تربیتی معیار، فکری صلاحیت تے پیشہ ورانہ مہارت کوں سراہیا، جو ایں ادارے دی نمایاں سنڄاݨ ہن۔ انھاں اطمینان دا اظہار کیتا جو کالج دے فارغ التحصیل افسر آپݨی غیر معمولی کارکردگی تے پیشہ ورانہ لگن دے ذریعے مسلسل نمایاں خدمات انجام ݙیندے پئن۔چیف آف آرمی اسٹاف تے چیف آف ڈیفنس فورسز جدید جنگ دے تیزی نال بدلدے ہوئے انداز تے روشنی پیندیں ہوئیں ابھردی ہوئی ٹیکنالوجیز، ملٹی ڈومین آپریشنز، تینویں افواج دے آپسی اشتراک تے مستقبل دے میدانِ جنگ دے چیلنجز توں باخبر رہوݨ دی اہمیت تے زور ݙتا۔ انھاں افسراں کوں ہدایت کیتی جو او خود کوں تے آپݨی افواج کوں مسلسل تربیت ݙیون تانجو جنگ دی بدلدی نوعیت دا مؤثر انداز اچ مقابلہ کیتا ونڄ سڳے، جݙاں جو پیشہ ورانہ مہارت، تیاری تے آپریشنل برتری دے اعلیٰ ترین معیار برقرار رکھیے ونڄن۔ بعد اچ، فیلڈ مارشل بلوچستان اچ تعینات فارمیشنز دے افسراں تے جواناں نال ملاقات کیتی۔ موجودہ سکیورٹی صورتحال دے مختلف پہلواں تے روشنی پیندیں ہوئیں انھاں ایں عزم دا اعادہ کیتا جو پاکستان دی مسلح افواج عوام دی بھرپور حمایت دے نال ہر قسم دی دہشت گردی دے مکمل خاتمے کیتے پرعزم ہن۔ فیلڈ مارشل زور ݙتا جو پاکستان دی تقدیر اچ شامل ترقی کوں پروپیگنڈا، جھوٹی خبراں یا بیرونی سرپرستی اچ تھیوݨ آلی دہشت گردی دے ذریعے روکیا نئی ونڄ سڳدا۔ انھاں آکھیا جو پاکستان دی ترقی کوں پراکسیز تے منفی پروپیگنڈے دے ذریعے سبوتاژ کرݨ دی کوشش کرݨ آلیاں دشمن قوتاں ریاست دی مضبوطی تے عوام دے اتحاد دے باعث بالآخر ناکام تھیسن۔ بلوچستان اچ پائیدار امن و استحکام دی اہمیت کوں اجاگر کریندیں ہوئیں فیلڈ مارشل آکھیا جو دیرپا ترقی کیتے عوام دوست پالیسی، جامع ترقی تے بہتر طرزِ حکمرانی ناگزیر ہن، جو سکیورٹی اقدامات دے نال نال ہووݨے چاہیدن۔ انھاں حکومتِ بلوچستان دی انھاں کوششوں کوں سراہیا جو عوامی فلاح، سماجی و معاشی ترقی تے ریاست تے عوام وچال تعلق کوں مضبوط بݨاوݨ کیتے کیتی ویندی پئن۔ فیلڈ مارشل بلوچستان اچ امن، استحکام تے ریاستی رٹ برقرار رکھݨ کیتے افسراں تے جوانوں دے بلند حوصلے، آپریشنل تیاری تے پیشہ ورانہ عزم کوں وی سراہیا۔ایں توں پہلے، کوئٹہ پجݨ تے چیف آف آرمی اسٹاف تے چیف آف ڈیفنس فورسز دا استقبال کورکمانڈر کوئٹہ کیتا۔