ای سی سی پاکستان نیشنل شپنگ کارپوریشن دی تنظیمِ نو دی اصولی منظوری ݙے ݙتی، کئی وزارتاں تے ڈویژنز کیتے تکنیکی ضمنی گرانٹس دی وی منظوری

اسلام آباد۔ 19 مئی (اے پی پی) کابینہ دی اقتصادی رابطہ کمیٹی (ای سی سی) پاکستان نیشنل شپنگ کارپوریشن دی تنظیمِ نو دی اصولی منظوری ݙے ݙتی اے جئیں دے تحت کارپوریشن دے 30% حصص فروخت کیتے ویسن، اجلاس اچ پاکستان دے قیمتی پتھراں دی صلاحیت توں استفادہ کرݨ دی قومی پالیسی 2026-2030 سمیت کئی وزارتاں تے ڈویژنز کیتے تکنیکی ضمنی گرانٹس دی منظوری وی ݙتی ڳئی۔ اقتصادی رابطہ کمیٹی دا اجلاس منگل کوں اتھاں وفاقی وزیرِ خزانہ تے محصولات سینیٹر محمد اورنگزیب دی زیرِ صدارت تھیا۔ اجلاس اچ وزارتِ وفاقی تعلیم و پیشہ ورانہ تربیت ولوں وزیراعظم یوتھ سکل ڈویلپمنٹ پروگرام دے تحت نیوٹیک دے ذریعے مہارتاں دی ترقی تے آزاد جموں و کشمیر، گلگت بلتستان تے بلوچستان اچ دانش سکولاں دے قیام کیتے پیش کیتی ڳئی سمری دا جائزہ گھدا ڳیا، کمیٹی تکنیکی ضمنی گرانٹ دی صورت اچ 3 ارب 91 کروڑ 52 لاکھ 40 ہزار روپے مختص کرݨ دی منظوری ݙے ݙتی۔ اجلاس اچ وزارتِ داخلہ تے انسدادِ منشیات ولوں پیش کیتیاں ڳئیاں ݙو سمریاں دی وی منظوری ݙتی ڳئی جنھاں اچ جاری مالی سال دے دوران وزیراعظم آفس دی مرمت تے ݙیکھ بھال کیتے 16 کروڑ روپے دی تکنیکی ضمنی گرانٹ تے ضلع خیبر دے علاقے شاکس اچ فرنٹیئر کور خیبر پختونخوا (شمالی) ہسپتال دی جاری آپریشنل ضروریات کیتے 48 کروڑ روپے دی منظوری شامل اے۔ کمیٹی کوں ݙسایا ڳیا جو پاکستان پبلک ورکس ڈیپارٹمنٹ (پاک پی ڈبلیو ڈی) دے خاتمے دے بعد وزیراعظم آفس دی ݙیکھ بھال دی ذمہ واری کیپیٹل ڈویلپمنٹ اتھارٹی (سی ڈی اے) کوں منتقل کر ݙتی ڳئی اے۔ اجلاس اچ ݙسایا ڳیا جو ایف سی کے پی (شمالی) ہسپتال کیتے منظور شدہ فنڈز ایف سی اہلکاراں، شہداء دے اہل خانہ تے زخمی جوانوں کوں بلا تعطل طبی تے آپریشنل سہولیات دی فراہمی اچ معاون ثابت تھیسن۔ اجلاس اچ وزارتِ قومی صحت خدمات، ضوابط و کوآرڈی نیشن دی جانبوں جاری مالی سال دے پی ایس ڈی پی اچ وزیراعظم قومی صحت پروگرام (چوتھا نظرِ ثانی شدہ) کیتے 1 ارب 50 کروڑ روپے دی تکنیکی ضمنی گرانٹ توں متعلق سمری دی منظوری ݙتی ڳئی، اے پروگرام جو پہلے صحت سہولت پروگرام دے نام نال جاݨیا ویندا ہئی، مکمل طور تے سرکاری فنڈنگ تے مبنی سماجی صحت تحفظ دا منصوبہ اے جئیں دا مقصد صحت دی سہولیات تائیں رسائی کوں وسعت ݙیوݨ تے طبی خدمات دی فراہمی کوں بہتر بݨاوݨ اے۔ اجلاس اچ وزارتِ امورِ کشمیر و گلگت بلتستان ولوں پیش کیتی ڳئی سمری دی وی منظوری ݙتی ڳئی، ایں دے تحت 1989ء دے جموں و کشمیر مہاجرین کیتے ماہانہ گزارہ الائونس 3 ہزار 500 روپے توں ودھار تے 6 ہزار روپے فی کس کرݨ دی منظوری ݙتی ڳئی جئیں دا اطلاق یکم فروری 2026ء توں تھیسی۔ ایں مقصد کیتے 30 جون 2026ء تائیں دے عرصے کیتے 57 کروڑ 88 لاکھ 38 ہزار روپے دی تکنیکی ضمنی گرانٹ وی منظور کیتی ڳئی۔ کمیٹی متعلقہ وزارت کوں آئندہ بجٹ سائیکل دے دوران مستقبل دی مالی ضروریات وزارتِ خزانہ دے نال نبیڑݨ دی ہدایت کیتی۔اجلاس اچ وزارتِ ریلوے ولوں وزیراعظم اسسٹنس پیکیج دے تحت واجب الادا ذمہ واریاں دی ادائیگی کیتے اضافی گرانٹ بارے سمری دا جائزہ گھدا ڳیا، تفصیلی غور و خوض دے بعد کمیٹی وزیراعظم اسسٹنس پیکیج کیتے 1 ارب روپے دی منظوری ݙتی اتے ریلوے ڈویژن کوں آپݨی پنشن واجبات دا جامع جائزہ گھنݨ دی ہدایت کیتی۔ ای سی سی اسٹیبلشمنٹ ڈویژن کوں وی وزیراعظم اسسٹنس پیکیج توں متعلق مجموعی پالیسی فریم ورک دا جائزہ گھنݨ دی ہدایت کیتی۔ اجلاس اچ وزارتِ قومی غذائی تحفظ و تحقیق دی سمری تے نیشنل ایگری ٹریڈ اینڈ فوڈ سیفٹی اتھارٹی (نافسا) کوں فعال بݨاوݨ کیتے 1 ارب روپے دی تکنیکی ضمنی گرانٹ دی منظوری وی ݙتی ڳئی، اے اتھارٹی خوراک دے تحفظ، نباتاتی صحت، لائیو سٹاک تے زرعی کیمیکلز توں متعلق ریگولیٹری نگرانی کوں بین الاقوامی معیارات تے تجارتی تقاضوں دے مطابق مضبوط بݨاوݨ کیتے قائم کیتی ڳئی اے۔ اجلاس اچ وزارتِ بحری امور ولوں پاکستان نیشنل شپنگ کارپوریشن (پی این ایس سی) دی تنظیمِ نو توں متعلق سمری دی اصولی منظوری وی ݙتی ڳئی جئیں دے تحت 30% حصص فروخت کیتے ویسن تے انتظامی کنٹرول نیشنل لاجسٹکس کارپوریشن (این ایل سی) کوں منتقل کیتا ویسی۔ کمیٹی متعلقہ حکام کوں ابھردے ہوئے بحری تے ٹرانس شپمنٹ مواقع توں فائدہ چاوݨ کیتے ایں عمل کوں تیز کرݨ دی ہدایت کیتی۔ اجلاس اچ صنعت تے پیداوار ڈویژن ولوں پیش کردہ پاکستان دے قیمتی پتھراں دی صلاحیت توں استفادہ کرݨ دی قومی پالیسی 2026-2030 دی وی منظوری ݙتی ڳئی، ایں پالیسی دا مقصد قیمتی پتھراں دے شعبے کوں باضابطہ بݨاوݨ، ویلیو ایڈیشن تے جدید کان کنی دے طریقیاں کوں فروغ ݙیوݨ، برآمدات اچ اضافہ کرݨا تے خصوصاً گلگت بلتستان، خیبر پختونخوا تے آزاد جموں و کشمیر اچ علاقائی اقتصادی ترقی کوں فروغ ݙیوݨ اے۔ اجلاس اچ وفاقی وزیرِ سرمایہ کاری قیصر احمد شیخ، وفاقی وزیرِ توانائی سردار اویس احمد خان لغاری، وفاقی وزیرِ پٹرولیم علی پرویز ملک، وفاقی وزیرِ قومی غذائی تحفظ و تحقیق رانا تنویر حسین، وزیراعظم دے معاونِ خصوصی برائے صنعت و پیداوار ہارون اختر خان سودھے متعلقہ وزارتاں، ڈویژنز تے ریگولیٹری اداریاں دے وفاقی سیکرٹریز تے سینئر حکام شرکت کیتی۔