بلوچستان اچ محفوظ ماحول فراہم کرݨ معدنیات نال منسلک منصوبیاں تے کام کرݨ آلی مقامی تے بین الاقوامی کمپنیاں دا پاکستان تے اعتماد برقرار رکھݨ کیتے ضروری اے، وزیراعظم شہباز شریف

کوئٹہ۔ 19 مئی (اے پی پی) وزیر اعظم محمد شہباز شریف آکھیے جو بلوچستان اچ محفوظ ماحول فراہم کرݨ معدنیات نال منسلک منصوبیاں تے کام کرݨ آلی مقامی تے بین الاقوامی کمپنیاں دا پاکستان تے اعتماد برقرار رکھݨ کیتے ضروری اے، دہشت گردی دے عفریت دے مکمل خاتمے کیتے پولیس تے ٻئی فورسز دی بہترین ٹریننگ تے نویں ٹیکنالوجی انتہائی اہم اے، رخشان ڈویژن اچ فرنٹیئر کور تعیناتی توں بلوچستان اچ معدنیات دے تحفظ کیتے راہداری قائم تھیسی، حکومتِ بلوچستان صوبے دے نوجوانوں کوں قومی دھارے اچ موثر انداز اچ شامل کرݨ، انھاں کوں بااختیار بݨاوݨ تے مثبت سرگرمیاں دی جانب راغب کرݨ کیتے مختلف اقدامات کریندی پئی اے۔ منگل کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت کوئٹہ اچ نیشنل ایکشن پلان دی صوبائی ایپکس کمیٹی دا اجلاس تھیا۔ اجلاس اچ آرمی چیف و چیف آف ڈیفنس فورسز فیلڈ مارشل سید عاصم منیر، وزیر اعلٰی بلوچستان میر سرفراز بگٹی، وفاقی وزراء خواجہ آصف، احسن اقبال، سید محسن رضا نقوی، عطاء اللہ تارڑ، خالد مگسی، جام کمال خان، وزیراعظم دے مشیر رانا ثناء اللہ تے متعلقہ اداریاں دے اعلیٰ افسراں شرکت کیتی۔ اجلاس اچ وزیراعظم کوں بلوچستان اچ سکیورٹی، ترقیاتی منصوبیاں دی پیشرفت، منصوبہ بندی تے دیگر امور تے بریفنگ ݙتی ڳئی۔ وزیراعظم آپݨے خطاب اچ بلوچستان سمیت ملک دے ٻئے حصیاں اچ انسدادِ دہشت گردی کیتے اقدامات تے چیف آف آرمی سٹاف و چیف آف ڈیفنس فورسز سید عاصم منیر تے پاک افواج کوں خراجِ تحسین پیش کیتا۔ وزیراعظم بلوچستان اچ عوامی فلاح تے بہبود کیتے متعدد اقدامات تے وزیر اعلٰی میر سرفراز بگٹی تے انھاں دی ٹیم دی تعریف کیتی۔ وزیراعظم بلوچستان دے رخشان ڈویژن اچ فرنٹیئر کور تعینات کرݨ دی ہدایت کریندیں ہوئیں آکھیا جو ایں توں بلوچستان اچ معدنیات دے تحفظ کیتے ہک راہداری قائم تھیسی، ایں سکیورٹی راہداری اچ فرنٹیئر کور دے اضافی ونگز، شاہراہواں تے سکیورٹی چیک پوسٹس، سرویلنس گرڈ، سرحدوں تے پوسٹس وغیرہ شامل تھیسن۔ وزیر اعظم آکھیا جو پاکستان قدرتی وسائل بالخصوص معدنیات نال مالامال اے، بلوچستان اچ محفوظ ماحول فراہم کرݨ معدنیات نال منسلک منصوبیاں تے کام کرݨ آلی مقامی تے بین الاقوامی کمپنیاں دا پاکستان تے اعتماد برقرار رکھݨ کیتے ناگزیر اے۔ وزیراعظم حکومتِ بلوچستان ولوں ضلعی انتظامیہ اچ تعیناتیاں کیتے شفافیت تے میرٹ برقرار رکھݨ دی کوششاں کوں سراہیا۔ انھاں آکھیا جو دہشت گردی دے عفریت دے مکمل خاتمے کیتے پولیس تے دیگر فورسز دی بہترین ٹریننگ تے نویں ٹیکنالوجی انتہائی اہم اے، حکومتِ بلوچستان صوبے دے نوجوانوں کوں قومی دھارے اچ موثر انداز اچ شامل کرݨ، انھاں کوں بااختیار بݨاوݨ تے مثبت سرگرمیاں دی جانب راغب کرݨ کیتے مختلف اقدامات کریندی پئی اے۔ انھاں اقدامات اچ تعلیمی مواقع اچ اضافہ، فنی و پیشہ ورانہ تربیت، روزگار دے مواقع دی فراہمی، سپورٹس تے یوتھ پروگرامز دا فروغ، سکالرشپس، ڈیجیٹل سکلز ٹریننگ تے نوجوانوں دی فیصلہ سازی دے عمل اچ شمولیت شامل ہن۔ وزیر اعظم آکھیا جو بلوچستان اچ انفراسٹرکچر، تعلیم، صحت تے مواصلات دے شعبیاں اچ ترقیاتی منصوبیاں تے خصوصی توجہ ݙتی ویندی پئی اے تانجو نوجوانوں کوں بہتر سہولیات تے ترقی دے مساوی مواقع فراہم کیتے ونڄ سڳن، حکومت نوجوانوں دے نال تعمیری رابطے تے موثر شمولیت دے ذریعے انھاں کوں قومی ترقی اچ فعال کردار ادا کرݨ دے مواقع فراہم کرݨ کیتے وی کوشاں اے۔ اجلاس اچ وزیراعظم کوں بلوچستان اچ سکیورٹی صورتحال، انسدادِ دہشت گردی کیتے اقدامات دی پیشرفت، گورننس دے نظام اچ بہتری کیتے اقدامات، ڈیجیٹائزیشن، کیش لیس اکانومی کیتے اقدامات تے دیگر امور تے بریفنگ ݙتی ڳئی۔ اجلاس کوں ݙسایا ڳیا جو دہشت گردی دے مکمل خاتمے کیتے سارےادارے سرگرمِ عمل ہن، بلوچستان اچ نوجوانوں دی فلاح و بہبود کیتے یوتھ سکلز پروگرام تے دیگر منصوبیاں تے کام جاری اے، نومبر 2024ء توں اب تائیں ہک وی پولیو کیس رپورٹ نہیں تھیا، کینسر انسٹیٹیوٹ، ڈائلیسس سینٹر، ٹراما سینٹر تے ایں جیہیں شعبہِ صحت دے متعدد منصوبے فعال تھی ڳئن اتے مزید دی تعمیر تے کام جاری اے، بلوچستان اچ ایں ویلھے 99% سکول کھلے ہن تے تعلیمی سرگرمیاں جاری ہن، شمسی توانائی دے منصوبے توں بلوچستان اچ 15000 توں زائد گھراں کوں فیدہ تھیے جئیں پاروں ہݨ تئیں تقریباً 105 ارب روپے دی بچت رپورٹ تھی چکی اے۔