پاکستان تے چین وچال سفارتی تعلقات دے 75 سال مکمل تھیوݨ تے چینی وفد قومی اسمبلی دا دورہ کیتا اتے اجلاس دی کارروائی ݙٹھی

اسلام آباد۔ 20 مئی (اے پی پی) پاکستان تے چین وچال سفارتی تعلقات دے 75 سال مکمل تھیوݨ تے چینی وفد قومی اسمبلی دا دورہ کیتا اتے اجلاس دی کارروائی ݙٹھی، ایں موقع تے ساری پارلیمانی جماعتاں چینی وفد دا پرتپاک خیرمقدم کریندیں ہوئیں چین تے پاکستان دی دوستی کوں ہمالیہ توں بلند تے سمندر توں گہری قرار ݙتا۔ بدھ کوں قومی اسمبلی اجلاس دی کارروائی ݙیکھݨ کیتے جݙاں وفد مہماناں دی گیلری اچ آیا تاں ارکان ڈیسک وڄا تے ایںدا استقبال کیتا۔ سپیکر قومی اسمبلی سردار ایاز صادق چینی وفد دا خیرمقدم کریندیں ہوئیں آکھیا جو پاک چین تعلقات کوں 75 سال تھی ڳئن، اساں چینی وفد کوں قومی اسمبلی آوݨ تے خوش آمدید آکھدوں۔ اپوزیشن لیڈر محمود خان اچکزئی چینی وفد دا خیرمقدم کریندیں ہوئیں آکھیا جو اساݙے تے حکومت وچال شدید اختلافات ہن جنھاں کوں بالائے طاق رکھ تے اساں اتھاں آیوں، چینی وفد دی آمد تے اساں اسمبلی اجلاس دا بائیکاٹ ختم کیتا۔ انھاں آکھیا جو اساں چینی وفد کوں قومی اسمبلی آوݨ تے خوش آمدید آکھدوں، پاکستان چین دے احسانات کݙاہیں نہ بھلسی۔ پیپلز پارٹی دے سینئر رہنما سید نوید قمر آکھیا جو پی پی پی ولوں چینی وفد کوں خوش آمدید آکھینداں، ذوالفقار علی بھٹو دا چینی قیادت دے نال ٻہوں خاص تعلق ہئی۔ انھاں آکھیا جو آصف علی زرداری چین دے ہر علاقے دا دورہ کیتا، پاکستان تے چین وچال کوئی معمولی تعلقات کائنی، ہر پاکستانی ولوں چینی وفد کوں خوش آمدید آکھداں۔