پاکستان تے چین دی دوستی 75 سالیں توں ہر آزمائش تے پوری اتری اے، ݙوہائیں ملکاں وچال تعلقات آپسی اعتماد، احترام تے سانجھے مفادات تے مبنی ہن، نائب وزیراعظم محمد اسحاق ڈار

اسلام آباد۔ 20 مئی (اے پی پی) نائب وزیراعظم تے وزیرِ خارجہ محمد اسحاق ڈار آکھیے جو پاکستان تے چین دی دوستی گزریل 75 برسوں توں 75 سالیں توں ہر آزمائش تے پوری اتری اے، ݙوہائیں ملکاں وچال تعلقات آپسی اعتماد، احترام تے سانجھے مفادات تے مبنی ہن۔بدھ کوں سینیٹ اجلاس اچ چین دی نیشنل پیپلز کانگریس دی قائمہ کمیٹی دے وائس چیئرمین کائی ڈافنگ دی سربراہی اچ آوݨ آلے پارلیمانی وفد دا خیرمقدم کریندیں ہوئیں اسحاق ڈار آکھیا جو پاکستان تے چین وچال ہر موسم دی اسٹریٹجک تعاون تے مبنی شراکت داری قائم اے۔ انھاں آکھیا جو پاکستان آپݨی خودمختاری تے علاقائی سالمیت دے حوالے نال چین دی غیر متزلزل حمایت کوں قدر دی نگاہ نال ݙیکھدے، جڈانجو پاکستان وی ون چائنا پالیسی تے مستقل طور تے کاربند اے اتے چین دے بنیادی مفادات توں متعلق امور تے ایں دی حمایت جاری اے۔ نائب وزیراعظم آکھیا جو پاکستان تے چین علاقائی تے عالمی معاملات تے یکساں مؤقف رکھیندن اتے اقوامِ متحدہ، شنگھائی تعاون تنظیم سمیت مختلف عالمی فورمز تے قریبی تعاون جاری رکھیا ہوئے تانجو امن دے فروغ تے ترقی پذیر ممالک دے مفادات دا تحفظ یقینی بݨایا ونڄ سڳے۔ انھاں خلیجی خطے تے مشرقِ وسطیٰ دی اڄوکی کشیدہ صورتحال دا حوالہ ݙیندیں ہوئیں آکھیا جو پاکستان تے چین خطے اچ امن تے استحکام کیتے مسلسل سفارتی رابطے اچ ہن۔ اسحاق ڈار ݙسایا جو او 31 مارچ کوں چینی وزیرِ خارجہ وانگ یی دی دعوت تے بیجنگ دا دورہ کیتا ہئی جہاں ݙوہائیں ممالک علاقائی تنازعے دے حل کیتے پنج نکاتی امن منصوبہ پیش کیتا جئیں کوں بعد اچ درجناں ممالک دی حمایت حاصل تھئی۔ انھاں چین پاکستان اقتصادی راہداری کوں بیلٹ اینڈ روڈ انیشی ایٹو دا فلیگ شپ منصوبہ تے پاک چین دوستی دی روشن علامت قرار ݙیندیں ہوئیں آکھیا جو سی پیک پاکستان دے معاشی منظرنامے کوں تبدیل کر ݙتے۔ انھاں دا آکھݨ ہئی جو سی پیک دے اڳلے مرحلے اچ صنعتکاری، زراعت، انفارمیشن ٹیکنالوجی تے سماجی تے اقتصادی ترقی تے توجہ ݙتی ویسے۔ انھاں ݙسایا جو وزیراعظم شہباز شریف 23 توں 26 مئی تئیں اعلیٰ سطحی وفد دے ہمراہ چین دا سرکاری دورہ کریسن۔ دورے دے دوران پاک چین سفارتی تعلقات دے 75 سال مکمل تھیوݨ دی تقریباں منعقد تھیسن جڈانجو چینی قیادت بشمول صدر شی جن پنگ تے وزیراعظم لی چیانگ نال ملاقاتاں وی تھیسن۔ نائب وزیراعظم ایں عزم دا اعادہ کیتا جو پاکستان، چین دے نال تعلقات کوں ٻیا مضبوط بݨاوݨ کیتے پُرعزم اے اتے ݙوہائیں ممالک دی دیرینہ دوستی خطے اچ امن، خوشحالی تے ترقی دے فروغ اچ اہم کردار ادا کریندی رہسی۔