چیئرمین سینیٹ سید یوسف رضا گیلانی دی چین دے اعلیٰ سطحی وفد نال اہم ملاقات، پاک-چین پارلیمانی شراکت داری دے فروغ دے عزم دا اعادہ

اسلام آباد۔ 20 مئی (اے پی پی) چیئرمین سینیٹ پاکستان سید یوسف رضا گیلانی چینی نیشنل پیپلز کانگریس (این پی سی) دی قائمہ کمیٹی دے نائب چیئرمین Cai Dafeng دی قیادت اچ آئے ہوئے اعلیٰ سطحی چینی وفد دا پارلیمنٹ ہاؤس اچ پرتپاک استقبال کیتا۔ ملاقات دے دوران پاک چین ݙوپاسہ تعلقات، پارلیمانی تعاون، علاقائی صورتحال تے مختلف شعبیاں اچ مستقبل دے اشتراکِ عمل تے تفصیلی ڳالھ کیتی ڳئی۔ چیئرمین سینیٹ سید یوسف رضا گیلانی آکھیا جو پاکستان تے چین وچال لازوال دوستی خطے اچ امن, استحکام، ترقی تے خوشحالی دی مضبوط بنیاد اے۔ انھاں آکھیا جو ݙوہیں ملکاں وچال سفارتی تعلقات دے 75 سال مکمل ہووݨ ایں تاریخی، آزمودہ تے عوامی سطح تے مضبوط رشتے دا مظہر اے جو ویلھے دے نال ٻیا مستحکم تھیے۔ چیئرمین سینیٹ ایں امر دا اعادہ کیا جو چین پاکستان دا سب توں قابلِ اعتماد سٹریٹجک شراکت دار تے مخلص دوست اے جݙاں جو پاکستان علاقائی تے عالمی فورمز تے چین دی مسلسل حمایت کوں بے حد قدر دی نگاہ نال ݙیکھدے۔  انھاں چین پاکستان اقتصادی راہداری (سی پیک) دے تحت تعاون کوں ٻیا وسعت ݙیوݨ دے عزم دا اظہار کریندیں ہوئیں آکھیا جو پاکستان زراعت، توانائی، معدنیات، تعلیم، انفارمیشن ٹیکنالوجی، گرین ٹیکنالوجی، قابلِ تجدید توانائی، مصنوعی ذہانت، فن ٹیک، ایگری ٹیک تے ڈیجیٹل سی پیک سمیت مختلف شعبیاں اچ چین دے نال تعاون کوں ٻیا ودھاوݨ چاہندے۔علاقائی تے عالمی صورتحال تے ڳالھ کریندیں ہوئیں چیئرمین سینیٹ آکھیا جو پاکستان امن، مذاکرات تے سفارتی حل تے یقین رکھیندے تے خطے اچ استحکام دے فروغ کیتے تعمیری کردار ادا کریندا رہسی بالخصوص مشرقِ وسطیٰ اچ کشیدگی دے خاتمے کیتے پاکستان دی کوششاں جاری ہن۔ ایں موقع تے چینی نیشنل پیپلز کانگریس دی قائمہ کمیٹی دے نائب چیئرمین سائی دافنگ چیئرمین سینیٹ سید یوسف رضا گیلانی تے سینیٹ اراکین ولوں پرتپاک استقبال تے شکریہ ادا کیتا۔ انھاں آکھیا جو چین پاکستان دے نال برادرانہ تعلقات کوں بے حد اہمیت ݙیندے تے سفارتی، پارلیمانی، اقتصادی تے ترقیاتی شعبیاں اچ تعاون کوں مزید وسعت ݙیوݨ کیتے پُرعزم اے۔ انھاں پاکستان دی ایوانِ بالا ولوں پاک چین دوستی دے حق اچ متفقہ حمایت کوں سراہیندے ہوئیں آکھیا جو پارلیمانی فورمز عالمی چیلنجز نال نٻڑݨ اچ مکالمے تے تعاون دے ذریعے اہم کردار ادا کر سڳدن۔ملاقات اچ سینیٹرز شیری رحمان، سلیم مانڈوی والا، رانا ثناء اللہ، منظور احمد کاکڑ، چیئرمین سینیٹ دی مشیر تے سفیر برائے بین الپارلیمانی سپیکرز کانفرنس مصباح کھر، ڈپٹی سپیکر قومی اسمبلی سید غلام مصطفیٰ شاہ، رکنِ قومی اسمبلی رومینہ خورشید عالم، پاکستان اچ تعینات چین دے سفیر جیانگ زیڈونگ تے وفد دے ٻئے اراکین شامل ہن۔