وزیراعظم محمد شہباز شریف دی چین دے صدر شی جن پنگ، وزیراعظم لی چیانگ تے چینی عوام کوں سفارتی تعلقات دی 75ویں سالگرہ دے موقع تے دلی مبارکباد

اسلام آباد۔ 20 مئی (اے پی پی) وزیراعظم محمد شہباز شریف چین دے صدر شی جن پنگ، وزیراعظم لی چیانگ تے چینی عوام کوں سفارتی تعلقات دی 75ویں سالگرہ دے موقع تے دلی مبارکباد ݙیندیں ہوئیں چین دے بنیادی قومی مفادات کیتے پاکستان دی مکمل حمایت دا اعادہ کیتا اتے پاکستان دی خودمختاری تے علاقائی سالمیت کیتے چین دی مسلسل حمایت کوں سراہیا۔ بدھ کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف نال چین دے ہک اعلیٰ سطحی وفد ملاقات کیتی جئیں دی قیادت قومی نیشنل پیپلز کانگریس (این پی سی) دی سٹینڈنگ کمیٹی دے نائب چیئرمین تسائی دافنگ کریندے پئے ہن۔ وفد پاکستان تے چین وچال سفارتی تعلقات دے قیام دی 75ویں سالگرہ دی تقریباں اچ شرکت کیتے پاکستان دے دورے تے اے۔ ملاقات اچ سپیکر قومی اسمبلی سردار ایاز صادق، نائب وزیراعظم و وزیرِ خارجہ سینیٹر محمد اسحاق ڈار، وفاقی وزیرِ منصوبہ بندی احسن اقبال، وفاقی وزیرِ اطلاعات تے نشریات عطا اللہ تارڑ، وزیرِ اعظم دے معاونِ خصوصی طارق فاطمی تے سیکرٹری خارجہ آمنہ بلوچ وی شریک ہن۔ چینی وفد کوں پاکستان آوݨ تے خوش آمدید آکھیندے ہوئیں وزیراعظم پاکستان تے چین وچال تاریخی تے سٹریٹجک تعاون تے مبنی شراکت داری کوں سراہیا۔ انھاں آکھیا جو گزشتہ 75 سالیں اچ پاکستان تے چین آپسی اعتماد تے ݙوپاسہ تے علاقائی اہمیت دے حامل امور تے سٹریٹجک ہم آہنگی دی بنیاد تے دوستی دا ہک منفرد رشتہ قائم کیتے۔وزیراعظم صدر شی جن پنگ، وزیراعظم لی چیانگ تے چینی عوام کوں سفارتی تعلقات دی 75ویں سالگرہ دے موقع تے دلی مبارکباد پیش کیتی اتے چین دے بنیادی قومی مفادات کیتے پاکستان دی مکمل حمایت دا اعادہ کیتا۔ انھاں پاکستان دی خودمختاری تے علاقائی سالمیت کیتے چین دی مسلسل حمایت کوں سراہیا۔ وزیراعظم چین پاکستان اقتصادی راہداری (سی پیک) کوں پاکستان دی سماجی تے اقتصادی ترقی کیتے ہک گیم چینجر قرار ݙیندیں ہوئیں ایں دے اڳلے مرحلے دی کامیابی کیتے پاکستان دے پختہ عزم دا اعادہ کیتا جئیں اچ زراعت، آئی ٹی، صنعت تے معدنیات دے شعبیاں تے خصوصی توجہ ݙتی ڳئی اے۔ انھاں آکھیا جو او آپݨے آندے سرکاری دورہِ چین دے منتظر ہن۔نائب چیئرمین تسائی دافنگ وزیراعظم دا پرتپاک استقبال تے میزبانی تے شکریہ ادا کیتا اتے ݙوہیں ممالک دے سفارتی تعلقات دی 75ویں سالگرہ تے مبارکباد دا تبادلہ کیتا۔ انھاں آکھیا جو چینی قیادت پاکستان چین تعلقات کوں ٻیا مضبوط بݨاوݨ کیتے پُرعزم اے۔ نائب چیئرمین آکھیا جو چین پاکستان دی حمایت جاری رکھیسی اتے چین پاکستان مشترکہ مستقبل دی حامل برادری دی تعمیر کیتے پاکستان دے نال قریبی تعاون جاری رکھیسی۔