وفاقی وزیرِ داخلہ دی پاک چین سفارتی تعلقات دے 75 سال مکمل ہتھیوݨ تے ݙوہیں ممالک دی قیادت تے عوام کوں مبارکباد

اسلام آباد۔ 21 مئی (اے پی پی) وفاقی وزیرِ داخلہ محسن نقوی پاک چین سفارتی تعلقات دے 75 سال مکمل تھیوݨ تے ݙوہیں ممالک دی قیادت تے عوام کوں مبارکباد ݙتی اتے چینی صدر شی جن پنگ، کمیونسٹ پارٹی آف چائنا تے عوام کیتے نیک خواہشات دا اظہار کیتے۔ خمیس کوں وزارتِ داخلہ توں جاری بیان دے مطابق وزیرِ داخلہ محسن نقوی آپݨے خصوصی سنیھے اچ آکھیے جو پاک چین دوستی دے 75 سال بے مثال اعتماد، لازوال محبت تے مخلصانہ تعاون دی داستان ہن، پاک چین سفارتی تعلقات دے 75 سال دی بے مثال تکمیل تاریخ ساز سنگِ میل اے۔ چین پاکستان دا سب توں قابلِ اعتماد تے ہر آزمائش تے پورا لہݨ آلا سٹریٹجک پارٹنر اے۔ عالمی منظرنامے اچ تبدیلیاں آئن لیکن پاک چین فولادی عزم تے لازوال دوستی اچ کوئی تبدیلی کائنی آئی۔ دفاعی تعاون توں اقتصادی شراکت داری تئیں پاک چین تعلقات خطے اچ استحکام تے ترقی دی روشن مثال بݨ ڳئن۔ سی پیک ݙوہیں ملکاں وچال معاشی تعاون تے پائیدار ترقی دا منہ بولیندا ثبوت اے۔ وزیرِ داخلہ آکھیا جو خطے اچ امن، خوشحالی تے استحکام کیتے پاکستان تے چین دا موقف ہمیشہ ہکو رہیے، قدرتی آفات ہوون یا عالمی وبائیں، چین ہمیشہ پاکستان دے نال کھڑے تھی تے بھائی چارے دا حق ادا کیتا۔ پاک چین دوستی پہلے توں زیادہ مضبوط، گہری تے ناقابلِ شکست بݨ ڳئی اے۔ وفاقی وزیرِ داخلہ آکھیا جو پاک چین دوستی ہر آوݨ آلے ݙینھ ٻئے مضبوط، پائیدار تے بلندیاں تے ویندی پئی اے۔ پاک چین تاریخی تے مثالی دوستی اچ دراڑ پاوݨ دی کوئی سازش کامیاب نہ تھیوݨ ݙیسوں۔