پاک فوج دے افسراں تے جواناں کوں بہادری تے نمایاں خدمات تے 50 ستارہِ امتیاز (ملٹری) تے 12 تمغہِ بسالت نال نوازا ڳیا

راولپنڈی۔ 21 مئی (اے پی پی) پاک فوج دے افسراں تے جواناں کوں آپریشنز اچ غیر معمولی بہادری تے وطن کیتے نمایاں خدمات دے اعتراف اچ 50 ستارہِ امتیاز (ملٹری) تے 12 تمغہِ بسالت نال نوازا ڳیا۔  خمیس کوں پاک فوج دے شعبہ تعلقاتِ عامہ (آئی ایس پی آر) توں جاری بیان دے مطابق پاک فوج دے افسراں تے جواناں کوں عسکری اعزازات ݙیوݨ دی تقریب جنرل ہیڈ کوارٹرز راولپنڈی اچ تھئی۔ چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر بطور مہمانِ خصوصی شہداء دے اہل خانہ، افسراں تے جواناں کوں آپریشنز اچ غیر معمولی بہادری تے وطن کیتے نمایاں خدمات دے اعتراف اچ اعزازات نال نوازا۔ تقریب اچ 50 ستارہِ امتیاز (ملٹری) تے 12 تمغہِ بسالت عطا کیتے ڳئے۔ بعد از شہادت ݙتے ونڄݨ آلے اعزازات شہداء دے اہل خانہ فخر تے وقار دے نال وصول کیتے۔ شہداء تے غازیاں کوں خراجِ عقیدت پیش کریندیں ہوئیں فیلڈ مارشل سید عاصم منیر آکھیا جو شہداء تے غازی قوم دا دائمی فخر ہن، انھاں دی عزت تے قربانی ہر پاکستانی کیتے ہک مقدس امانت اے، اساݙے وطن دا امن تے سلامتی انھاں دی عظیم قربانیاں تے فرض شناسی دا مرہونِ منت اے۔ فیلڈ مارشل شہداء دے اہل خانہ دی استقامت، وقار تے ثابت قدمی کوں وی زبردست خراجِ تحسین پیش کیتا اتے انھاں دی بے مثال قربانیاں تے وطن توں غیر متزلزل وابستگی کوں سراہیا۔ پاکستان آرمی تے قانون نافذ کرݨ آلے اداریاں دی آپریشنل تیاری تے غیر متزلزل عزم کوں سراہیندیں ہوئیں فیلڈ مارشل سید عاصم منیر دہشت گرداں دے خلاف انھاں دی مسلسل کوششاں دی تعریف کیتی اتے ایں عزم دا اعادہ کیتا جو ملک بھر اچ پائیدار امن و استحکام دے حصول تئیں دہشت گردی دے خلاف جنگ قومی عزم دے نال جاری رہسی۔