پاکستان تے چین عالمی تے علاقائی امن تے استحکام، ترقی تے کثیر الجہتی نظام دی حمایت جاری رکھیسن، صدر آصف علی زرداری دا پاک چین سفارتی تعلقات دی 75ویں سالگرہ دی تقریب توں خطاب

اسلام آباد۔ 21 مئی (اے پی پی) صدرِ مملکت آصف علی زرداری پاکستان ولوں چین دی ’’ون چائنہ پالیسی‘‘ دی حمایت جاری رکھݨ دے عزم دا اعادہ کریندیں ہوئیں آکھیے جو پاکستان آپݨی خودمختاری، علاقائی سالمیت تے معاشی ترقی دے حوالے نال چین دی مسلسل حمایت کوں انتہائی قدر دی نگاہ نال ݙیکھدے، چین ہمیشہ مسئلہ کشمیر تے پاکستان دے اصولی تے منصفانہ موقف دی حمایت کیتی اے، پاکستان تے چین عالمی تے علاقائی امن تے استحکام، ترقی تے کثیر الجہتی نظام دی حمایت جاری رکھیسن۔ اے ڳالھیں انھاں خمیس کوں اتھاں پاکستان تے چین وچال سفارتی تعلقات دے قیام دی 75ویں سالڳنڈھ دے سلسلے اچ منعقدہ ہک شاندار تقریب توں خطاب کریندیں ہوئیں کیتا۔ وفاقی دارالحکومت اسلام آباد اچ تھیوݨ آلی تقریب اچ وزیراعظم محمد شہباز شریف، نائب وزیرِاعظم سینیٹر محمد اسحاق ڈار، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، چین دی نیشنل پیپلز کانگریس دی سٹینڈنگ کمیٹی دے نائب چیئرمین، وفاقی وزراء، اراکینِ پارلیمنٹ، چین دے سفیر جیانگ زیڈونگ سودھے اعلیٰ سفارتکاراں اتے ٻئی اہم شخصیات شرکت کیتی۔ تقریب اچ ݙوہیں ملکاں وچال دیرینہ تے مثالی دوستی کوں بھرپور انداز اچ خراجِ تحسین پیش کیتا ڳیا۔ صدرِ مملکت آصف علی زرداری تقریب توں خطاب کریندیں ہوئیں حکومت تے عوامِ پاکستان ولوں چین دی قیادت تے عوام بالخصوص چین دے صدر شی جن پنگ کوں سفارتی تعلقات دے 75 برس مکمل تھیوݨ تے دلی مبارکباد پیش کیتی۔ انھاں آکھیا جو ݙوہیں ملکاں وچال تجارت، سرمایہ کاری، بنیادی ڈھانچے، ٹیکنالوجی، دفاع تے عوامی روابط سودھے مختلف شعبہ جات اچ تعاون مسلسل فروغ پیندا پئے۔ صدرِ مملکت پاکستان تے چین دی سفارتی تعلقات دی 75 سالہ تقریباں دے انعقاد تے مشترکہ تقریب دے شرکاء دا شکریہ ادا کریندیں ہوئیں آکھیا جو ایں تقریب دا انعقاد پاک-چین دوستی دا عکاس اے۔ انھاں آکھیا جو ݙوہیں ملک آپسی احترام تے مبنی جئیں سفر دا آغاز کیتا جو دوستی دے نال نال ݙوپاسہ سٹرٹیجک تعاون تے پارٹنرشپ تے قائم اے، پاکستان تے چین ہک ٻئے دے بنیادی مفادات دا خیال رکھیے۔انھاں آکھیا جو آج اساݙا تعاون تجارت، سرمایہ کاری، بنیادی ڈھانچے دی ترقی، دفاع، سائنس و ٹیکنالوجی، زراعت, تعلیم، ثقافت تے عوامی روابط سمیت متعدد شعبیاں تے محیط اے۔ صدر آکھیا جو چین دے نال دوستی پاکستان دی خارجہ پالیسی دا بنیادی ستون اے جئیں کوں پاکستان اچ عوامی، سیاسی تے ادارہ جاتی سطح تے مکمل حمایت حاصل اے، ایں پاروں اے تعلق نسل در نسل تے مختلف حکومتاں دے باوجود تسلسل دے نال اڳوں ودھدا رہیے۔انھاں آکھیا جو صدر شی جن پنگ دی بصیرت افروز قیادت تے غیر متزلزل عزم پاکستان۔چین تعلقات کوں غیر معمولی بلندیاں تئیں پڄاوݨ اچ کلیدی کردار ادا کیتے۔  پاکستان چین دے عالمی امن تے ترقی دے فروغ اچ تعمیری کردار خصوصاً گلوبل ڈویلپمنٹ انیشیٹو، گلوبل سیکیورٹی انیشیٹو، گلوبل سویلائزیشن انیشیٹو تے گلوبل گورننس انیشیٹو جیہیں اقدامات کوں قدر دی نگاہ نال ݙیکھدے۔صدرِ مملکت آکھیا جو چین کیتے میݙی عقیدت تے احترام مسلسل ودھدا پئے، 2025 اچ، میں چین دے ݙو دورے کیتے تے ایں سال اپریل اچ وی چین ڳیا جتھ میں ہنان تے ہائینان صوبیاں دی قیادت نال ملاقات کیتی، کاروباری اداروں نال ڳالھ مہاڑ کیتی اتے شاوشان اچ چیئرمین ماؤزے تنگ دی جائے پیدائش تے آبائی شہر دا دورہ کیتا۔پاکستان تے چین وچال سفارتی تعلقات دے 75ویں یومِ تاسیس دی مناسبت نال پاکستان دے دورے تے آئے ہوئے چین دی نیشنل پیپلز کانگریس کیتے سٹینڈنگ کمیٹی دے وائس چیئرمین کائی ڈی فینگ تقریب توں خطاب کریندیں ہوئیں آکھیا جو چین تے پاکستان ہمیشہ ہک ٻئے دا ساتھ ݙتے۔ انھاں آکھیا جو ݙوہیں ملک 21 مئی 1951ء کوں باقاعدہ سفارتی تعلقات قائم کیتے، ایں طرح پاکستان چین دے نال سفارتی تعلقات قائم کرݨ آلا پہلا اسلامی ملک بݨ ڳیا۔ انھاں چین دی حمایت تے پاکستان دی عوام تے حکومت دے نال اظہارِ تشکر کریندیں ہوئیں آکھیا جو چین پاکستان دی خود مختاری، علاقائی سلامتی تے قومی وقار دی حمایت کریندے۔ انھاں پاکستان دے نال ݙوپاسہ تعلقات تے تعاون کوں اڳوں ودھاوݨ دے عزم دا اظہار کریندیں ہوئیں آکھیا جو چین تے پاکستان تعلیم، زراعت، مائننگ، صنعتوں، آئی ٹی، موسمیاتی تبدیلی، ذرائع ابلاغ تے ٻئے شعبیاں اچ تعاون ودھیسن۔انھاں آکھیا جو چین دہشت گردی دے خلاف پاکستان دی کوششاں دی حمایت کریندے اتے او پاکستان توں سٹرٹیجک تعاون جاری رکھیسی۔ انھاں آکھیا جو صدر شی جن پنگ 2015 اچ پاکستان دا دورہ کیتا ہئی اتے 2018 اچ ݙوہیں ملکاں آپسی تعاون ودھاوݨ تے اتفاق کیتا ہئی۔ انھاں آکھیا جو چین تے پاکستان آئندہ وی رل تے کم کرݨ کیتے پُرعزم ہن۔تقریب دے موقع تے منعقدہ ہک خصوصی تصویری نمائش اچ پاکستان تے چین دی ݙہاکیاں تے محیط دوستی، یکجہتی تے مشترکہ کامیابیاں دی یادگار جھلکیاں پیش کیتی ڳئی جنھاں ݙوہیں ممالک دے گہرے تعلقات کوں اجاگر کیتا۔ پہلے تقریب دا آغاز پاکستان تے چین دے قومی ترانیاں نال تھیا۔ صدر ایں موقع تے ہک خصوصی ڈاک ٹکٹ دی نقاب کشائی وی کیتی۔ تقریب دے دوران صدرِ مملکت وزیراعظم، چین توں آئے ہوئے معزز مزمان تے چینی سفیر دے رَلے کیک وی کٹیا۔ ایں موقع تے پاکستان تے چین توں تعلق رکھݨ آلے بالاں ہک رنگا رنگ شو وی پیش کیتا۔