پاک-چین ہمہ موسمی سٹریٹجک تعاون تے مبنی شراکت داری ویلھے دی ہر آزمائش دا سامݨا کیتا، اسحاق ڈار

اسلام آباد۔ 21 مئی (اے پی پی) نائب وزیراعظم تے وزیرِ خارجہ سینیٹر محمد اسحاق ڈار آکھیے جو میں پاکستان تے چین دی قیادت کیتے آپݨی گہری ستائش دا اظہار کرینداں جنھاں پاک-چین دوستی دے مضبوط رشتے کوں ٻیا مستحکم بݨاوݨ اچ بصیرت افروز کردار ادا کیتا، ݙوپاسہ تعلقات کوں اڳوں بڑھاوݨ تے سٹریٹجک روابط کوں مضبوط بݨاوݨ اچ قیادت دی انتھک کوششاں نہایت قابلِ قدر رہین، گزشتہ 75 سالیں دے دوران پاک-چین ہمہ موسمی سٹریٹجک تعاون تے مبنی شراکت داری وقت دی ہر آزمائش دا سامنا کیتا اتے مختلف شعبیاں اچ مسلسل ترقی دی منازل طے کیتی۔ دفترِ خارجہ توں جاری بیان دے مطابق پاکستان تے چین وچال سفارتی تعلقات دے قیام دی 75ویں سالڳنڈھ تے نائب وزیراعظم /وزیرِ خارجہ آپݨے سنیھے اچ آکھیے جو میں پاکستان تے چین دے عوام کوں دل دی گہرائیاں توں مبارکباد پیش کرینداں۔ انھاں آکھیا جو 75 سال پہلے اساݙی ݙو قوماں باہمی احترام تے مشترکہ امنگاں تے مبنی ہک سفر دا آغاز کیتا ہئی، آج اے سفر ہک منفرد سٹریٹجک تعاون تے مبنی شراکت داری اچ تبدیل تھی ڳئے، اساݙا تعلق بین الاقوامی سفارتکاری اچ ہک منفرد مثال دی حیثیت رکھیندے، ایجھا تعلق جو وقتی مفادات نئی بلکہ فولادی اعتماد تے برادرانہ رشتے تے قائم اے۔ انھاں آکھیا جو ایں اہم سنگِ میل تے اساں اوں تاریخ دا جشن منیندے پئیوں جئیں اچ پاکستان تے چین ہر اوکھ اچ ہک ٻئے دا ساتھ ݙتا اتے غیر متزلزل یکجہتی دے نال ہک ٻئے دے بنیادی مفادات دا تحفظ کیتا۔ انھاں آکھیا جو چین پاکستان اقتصادی راہداری (سی پیک) اساݙی اقتصادی شراکت داری دا مرکزی ستون اتے بیلٹ اینڈ روڈ انیشیٹو دا نمایاں منصوبہ اے۔ گزریل ہک دہائی دے دوران ایں پاکستان دے بنیادی ڈھانچے تے توانائی دے شعبے اچ انقلابی تبدیلیاں پیدا کیتن، مستقبل آلے پاسے ودھدے ہوئے میکوں سی پیک دے ݙوجھے مرحلے تے اساݙی مشترکہ توجہ حوصلہ افزاء محسوس تھیندی اے جئیں اچ صنعتی ترقی، زرعی جدیدکاری تے سماجی و اقتصادی ترقی کوں ترجیح ݙتی ویندی پئی اے تانجو عوام دی زندگیاں اچ ٻئی بہتری آوے اتے مشترکہ خوشحالی دا خواب حقیقت بݨ سڳے۔