چین تے پاکستان دی دوستی منفرد مثال تے وقت دی ہر آزمائش تے پورا لتھی اے، مشترکہ کوششاں نال ترقی دا رستہ طے کریسوں، وزیرِ اعظم شہباز شریف دا پاک چین سفارتی تعلقات دی 75ویں سالڳنڈھ دی تقریب توں خطاب

اسلام آباد۔ 21 مئی (اے پی پی) وزیراعظم محمد شہباز شریف چین کوں پاکستان دا سب توں قابلِ اعتماد دوست قرار ݙیندیں ہوئیں آکھیے جو دنیا اچ ݙوہائیں ممالک دی دوستی ہک منفرد مثال تے وقت دی ہر آزمائش تے پورا اتری اے، چین دی اقتصادی تے فوجی قوت دنیا کیتے مثال اے، سی پیک 2.0 اچ زراعت، آئی ٹی، مصنوعی ذہانت، کان کنی تے معدنیات ترجیح ہن، مشترکہ کوششاں نال ترقی دا رستہ طے کریسوں۔ اے ڳالھیں انہاں خمیس کوں اتھاں چین تے پاکستان وچال سفارتی تعلقات دے قیام دی 75ویں سالڳنڈھ تے منعقدہ تقریب توں خطاب کریندے ہوئیں کیتا۔ ایں موقع تے صدرِ مملکت آصف علی زرداری، نائب وزیرِ اعظم و وزیرِ خارجہ محمد اسحاق ڈار، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، وفاقی وزراء، ارکانِ اسمبلی تے سینیٹ، پاکستان اچ چین دے سفیر دے علاوہ چین دی نیشنل پیپلز کانگریس دی سٹینڈنگ کمیٹی دے وائس چیئرمین وی موجود ہن۔ وزیرِ اعظم تقریب توں خطاب کریندیں ہوئیں آکھیا جو چینی بھراواں دی تقریب اچ موجودگی باعثِ مسرت اے۔ انھاں سفارتی تعلقات دی 75ویں سالگرہ تے صدر شی چن پنگ، وزیراعظم لی تے چینی قیادت کوں دلی مبارکباد پیش کیتی۔ وزیرِ اعظم یاد ݙوایا جو پاکستان سب توں پہلے مسلم ملک تے دنیا دے اولین ملکاں اچ شامل ہئی جئیں چین کوں تسلیم کیتا، 75 سال پہلے اساݙے بانیان انھاں تعلقات دی بنیاد رکھی، ایںدے بعد اساں مڑ تے نہیں ݙٹھا۔ وزیرِ اعظم آکھیا جو دنیا اچ منفرد مثال دی حامل پاکستان-چین دوستی وقت دی ہر آزمائش تے پورا اتری اے، زلزلے، سیلاب سمیت کہیں وی مشکل اچ چین پاکستان دے نال چٹان دی کار کھڑا رہیا، کوئی وی آفت ہووے، چین اساݙا بے مثال ساتھ ݙتا۔ وزیرِ اعظم آکھیا جو پاکستان کوں اے اعزاز وی حاصل اے جو سٹھ دی دہائی اچ پہلی پرواز جو بیجنگ ایئرپورٹ تے لتھی او پاکستانی ہئی، اساں ہنری کسنجر دے دورے دا بندوبست کیتا، پاکستان ہمیشہ ون چائنہ پالیسی دی حمایت کیتی اے اتے کریندے رہسوں۔ وزیرِ اعظم آکھیا جو وقت گزرݨ دے نال ݙوہائیں ملکاں دی دوستی مضبوط توں مضبوط تر تھئی، مشترکہ مقاصد تے سوچ دی بنیاد تے ݙوہیں ممالک قریب توں قریب تر تھیندے ڳئے، تعاون دے نتیجے اچ نہ صرف ݙوہائیں ملک بلکہ خطے اچ وی امن تے ترقی آوے تھیسی۔ وزیرِ اعظم آکھیا جو سی پیک صدر شی چن پنگ دے بیلٹ اینڈ روڈ وژن دا عملی مظہر اے، سی پیک پاکستان دی معیشت تے روزگار دی فراہمی کیتے اہم اے۔ انھاں آکھیا جو پاکستان اچ پاور پلانٹس ڈیمز جو اساݙے کیتے روشنی تے توانائی دا ذریعہ ہن، اچ وی چین دا ٻہوں وݙا کردار اے۔ چین پاکستان دا سب توں مضبوط تے قابلِ اعتماد دوست اے۔ تاریخ دان اساݙی دوستی دی گہرائی تے طاقت دا فیصلہ کریسن، اساݙا اے پندھ جاری رہسی۔وزیرِ اعظم آکھیا جو پاکستان دی آبادی دا وݙا حصہ نوجوانوں تے مشتمل اے، اے چیلنج وی اے تے موقع وی، چینی تعاون نال ایں کوں موقع اچ بدلݨ کیتے کوشاں ہیسے۔ انھاں آکھیا جو پاکستان اچ چینی شہریاں دی سلامتی اولین ترجیح اے، پاکستان اچ موجود ہر چینی شہری کوں بہترین سکیورٹی فراہم کریندے پئیوں۔