صدرِ مملکت آصف علی زرداری نال چین دی قومی عوامی کانگریس دی قائمہ کمیٹی دے نائب چیئرمین سائی دا فینگ دی ملاقات، تزویراتی شراکت داری کوں ٻیا مستحکم بݨاوݨ دے عزم دا اعادہ

اسلام آباد۔ 21 مئی (اے پی پی) صدرِ مملکت آصف علی زرداری چین دی قومی عوامی کانگریس دی قائمہ کمیٹی دے نائب چیئرمین سائی دا فینگ نال ملاقات دے دوران چین دے نال پاکستان دی تزویراتی شراکت داری کوں ٻیا مستحکم بݨاوݨ دے غیر متزلزل عزم دا اعادہ کیتے۔ ایوانِ صدر دے پریس ونگ توں جاری بیان دے مطابق صدرِ مملکت چینی وفد دا خیرمقدم کریندیں ہوئیں صدر شی جن پنگ، وزیراعظم لی چیانگ تے چینی عوام کیتے نیک تمنائوں دا اظہار کیتا۔ انھاں آکھیا جو پاکستان تے چین بھائی تے ہر موسم دے تزویراتی تعاون تے مبنی شراکت دار ہن۔ انھاں آکھیا جو چین دے نال دوستی پاکستان دی خارجہ پالیسی دا بنیادی ستون اے اتے ایں کوں سیاسی، ادارہ جاتی تے سماجی سطح تے وسیع قومی اتفاقِ رائے حاصل اے۔ صدرِ مملکت آکھیا جو پاکستان صدر شی جن پنگ دے ’’انسانیت دے مشترکہ مستقبل دی حامل برادری‘‘ دے وژن تے ایں توں وابستہ اقدامات جنھاں اچ بیلٹ اینڈ روڈ منصوبہ، عالمی ترقیاتی اقدام، عالمی سلامتی اقدام، عالمی تہذیبی اقدام تے عالمی نظم و نسق اقدامات شامل ہن، دی مکمل حمایت کریندے۔ انھاں 25 اپریل توں یکم مئی 2026ء آپݨے حالیہ دورہِ چین دا حوالہ ݙیندیں ہوئیں آکھیا جو پاکستان ݙوہائیں ملکاں وچال اعلیٰ سطحی روابط تے ادارہ جاتی تعاون کوں ٻہوں اہمیت ݙیندے۔ انھاں آکھیا جو او آپݨے ݙوہائیں صدارتی ادوار اچ ݙوپاسہ تعلقات کوں مضبوط بݨاوݨ کیتے ذاتی طور تے فعال کردار ادا کیتے۔ ملاقات اچ پاکستان تے چین وچال سفارتی تعلقات دے قیام دی 75ویں سالگرہ تے وی ڳالھ کیتی ڳئی۔ صدرِ مملکت ایں موقع کوں ݙوپاسہ تعلقات اچ ہک اہم سنگِ میل قرار ݙیندیں ہوئیں آکھیا جو پاکستان دی پارلیمنٹ ایں مناسبت نال یادگاری قرارداداں وی منظور کیتین۔ صدرِ مملکت چین کوں ’’دو اجلاس‘‘ دے کامیاب انعقاد تے 15ویں پانچ سالہ منصوبے دی منظوری تے مبارکباد ݙتی۔ انھاں توانائی، زراعت, صنعت، ٹیکنالوجی، معدنیات تے بحری وسائل سمیت مختلف شعبیاں اچ پاکستان اچ ودھدی ہوئی چینی سرمایہ کاری دا خیرمقدم کیتا۔ انھاں چین پاکستان اقتصادی راہداری (سی پیک) دی اہمیت کوں اجاگر کریندیں ہوئیں آکھیا جو سی پیک پاکستان دی اقتصادی تبدیلی تے بنیادی ڈھانچے دی ترقی اچ نمایاں کردار ادا کیتے۔ سائی دا فینگ صدر شی جن پنگ ولوں صدر آصف علی زرداری کیتے نیک تمناواں دا سنیھا پڄایا اتے پاکستان چین دوستی دے فروغ کیتے صدرِ مملکت تے انھاں دے خاندان دی دیرینہ حمایت کوں سراہیا۔ انھاں آکھیا جو سفارتی تعلقات دی 75ویں سالگرہ دی تقاریب ݙوہیں ملکاں وچال پائیدار دوستی کوں نویں نسل تئیں منتقل کرݨ اچ معاون ثابت تھیسن۔ ملاقات اچ سپیکر قومی اسمبلی سردار ایاز صادق، سینیٹر شیری رحمان، سینیٹر سلیم مانڈوی والا، رکنِ قومی اسمبلی نوید قمر تے رکنِ قومی اسمبلی تے پاکستان چین پارلیمانی دوستی گروپ دی کنوینر رومینہ خورشید عالم وی شریک ہن۔ چینی وفد اچ پاکستان اچ چین دے سفیر جیانگ زائی دونگ، قومی عوامی کانگریس دی قائمہ کمیٹی دے نائب سیکریٹری جنرل ژانگ شن من، قومی عوامی کانگریس دی امورِ خارجہ کمیٹی دی نائب چیئرپرسن وانگ کے، قومی عوامی کانگریس دی مالیاتی تے اقتصادی امور کمیٹی دے رکن سائی جی منگ، وزارتِ خارجہ توں سفیر یوے شیاو یونگ تے قومی عوامی کانگریس دی قائمہ کمیٹی دے دفتر برائے امورِ خارجہ دی نائب ڈائریکٹر جنرل شین ژے ای شامل ہن۔