مشرقِ وسطیٰ اچ کشیدگی، پاکستان دا خطے اچ امن کیتے متحرک سفارتی روابط دا سلسلہ جاری اے، دفترِ خارجہ دی بریفنگ

اسلام آباد۔ 22 مئی (اے پی پی) دفترِ خارجہ دے ترجمان طاہر حسین اندرابی آکھیے جو مشرقِ وسطیٰ تے خلیجی خطے اچ جاری کشیدگی دے تناظر اچ امن، مذاکرات تے پائیدار حل کیتے پاکستان دی سفارتی کوششاں ایں ہفتے وی جاری رہیاں۔ جمعہ کوں اتھاں ہفتہ وار پریس بریفنگ اچ انھاں آکھیا جو گزشتہ ہک ہفتے دے دوران وزیراعظم محمد شہباز شریف قطر دے امیر شیخ تمیم بن حمد آل ثانی نال ݙو واری ٹیلیفونک رابطہ کیتا۔ ترجمان آکھیا جو ݙوہائیں رہنماواں ݙوپاسہ تعاون، خطے تے عالمی صورتحال خصوصاً مشرقِ وسطیٰ دی تازہ پیشرفت تے پاکستان ولوں کشیدگی اچ ڳھٹکی تے امن دے فروغ کیتے کیتیاں ونڄݨ آلیاں کوششاں تے ڳالھ مہاڑ کیتی، ݙوہیں پاسوں ایں ڳالھ تے اتفاق کیتا جو دیرپا امن تے استحکام کیتے مذاکرات تے سفارت کاری ای واحد موثر راہ ہن۔ ترجمان آکھیا جو نائب وزیراعظم و وزیرِ خارجہ سینیٹر محمد اسحاق ڈار وی امن دے فروغ تے سفارتی ذرائع دے ذریعے مسائل دے حل کیتے آپݨے ہم منصباں نال مسلسل رابطے اچ رہے۔ نائب وزیراعظم قطر دے وزیرِ مملکت برائے امورِ خارجہ محمد بن عبدالعزیز الخلیفی نال ٹیلیفونک ڳالھ مہاڑ کیتی جئیں اچ خطے دی صورتحال تے آپسی دلچسپی دے امور زیرِ بحث آئے، انھاں مصر دے وزیرِ خارجہ بدر عبدالعاطی نال وی ٹیلیفون تے رابطہ کیتا اتے خطے دی بدلدی صورتحال تے جاری کثیرالجہتی سفارتی سرگرمیاں تے ڳالھ کیتی۔ ترجمان آکھیا جو نائب وزیراعظم ازبکستان دے وزیرِ خارجہ بختیار سعیدوف نال وی ڳالھ مہاڑ کیتی جئیں اچ ݙوپاسہ تعلقات تے علاقائی پیشرفت تے ڳالھ مہاڑ تھئی۔ ترجمان طاہر حسین اندرابی آکھیا جو وفاقی وزیرِ داخلہ محسن نقوی وی ایں ہفتے ایران دے ݙو اہم دورے کیتے، انھاں 16 مئی تے بعد ازاں 20 مئی کوں ایران دا دورہ کیتا جتھ ایرانی قیادت نال اہم ملاقاتاں تھیاں۔ ترجمان سعودی عرب تے متحدہ عرب امارات تے اڄوکے ڈرون حملیاں دی مذمت کیتی اتے ݙوہائیں برادر ممالک نال مکمل یکجہتی دا اظہار کیتا۔ انھاں آکھیا جو جوہری تنصیبات کوں نشانہ بݨاوݨ بین الاقوامی قانون، اقوام متحدہ دے چارٹر تے بین الاقوامی ایٹمی توانائی ایجنسی دے اصولاں دی سنگین خلاف ورزی اے اتے ایجھی تنصیبات کوں کہیں وی صورت نشانہ نئی بݨایا ونڄݨا چاہیدا۔