عالمی ادارہِ صحت کانگو تے یوگنڈا اچ اڄوکی ایبولا وبا دی صورتحال کوں عالمی ہنگامی صورتحال قرار ݙے ݙتے، ترجمان وزارتِ قومی صحت

اسلام آباد۔ 23 مئی (اے پی پی) عالمی ادارہِ صحت کانگو تے یوگنڈا اچ اڄوکی ایبولا وبا دی صورتحال کوں عالمی ہنگامی صورتحال قرار ݙے ݙتے، اے ایبولا وائرس دی وبا دا موجودہ پھیلاؤ صرف افریقی ممالک کانگو تے یوگنڈا تئیں محدود اے۔ ترجمان وزارتِ قومی صحت ہفتہ کوں جاری بیان اچ آکھیا جو ڈبلیو ایچ او دے مطابق افریقہ توں باہر کہیں ٻئے ملک اچ ایبولا وائرس دا کوئی مریض رپورٹ نئی تھیا، متاثرہ افریقی ممالک نال محدود سفری روابط دے باعث پاکستان اچ خطرہ انتہائی ڳھٹ اے۔ ترجمان وزارتِ صحت آکھیا جو پاکستان یا ہمسائیہ ممالک اچ وی کݙاہیں ایبولا دا کوئی کیس رپورٹ نئی تھیا۔ انھاں آکھیا جو عالمی ادارہِ صحت احتیاطی نگرانی ودھاوݨ دی ہدایت کیتی اے، کہیں قسم دی سفری پابندیاں دی سفارش نئی کیتی ڳئی۔ انھاں آکھیا جو وفاقی وزیرِ صحت مصطفیٰ کمال وائرس دے حالیہ پھیلاؤ دے پیشِ نظر ملک اچ پیشگی اقدامات کرݨ دا فیصلہ کیتے۔وفاقی وزیرِ صحت دی ہدایت دے مطابق ایبولا توں بچاؤ کیتے ملک بھر دے ایئرپورٹس تے نگرانی ٻئی موثر بݨائی ڳئی اے، انٹرنیشنل ریگولیشن دی سفارشات تے عملدرآمد کوں یقینی بݨیندے پئن۔ ترجمان قومی وزارتِ صحت مزید آکھیا جو این آئی ایچ پاکستان ایبولا تشخیص دی صلاحیت رکھیندے، قومی ادارہِ صحت کوں سارے ضروری انتظامات کوں یقینی بݨاوݨ دی ہدایت کیتی ڳئی اے۔ انھاں ہدایت کیتی جو افریقی ملکاں دا سفر کرݨ آلے شہری روانگی توں پہلے ایں ملک دی متعلقہ سفری تے طبی ہدایات ضرور ݙیکھن۔ پاکستان دے صحت حکام عالمی ادارہِ صحت دے تعاون نال صورتحال دی مسلسل نگرانی کریندے پئن۔