نشتر ہسپتال اچ ایچ آئی وی اسکریننگ غفلت کیس، 8 ڈاکٹرز تے ہک نرس دے خلاف پیڈا ایکٹ دے تحت کارروائی دی سفارش

ملتان۔ 23 مئی (اے پی پی) نشتر ہسپتال اچ مریض دے آپریشن توں پہلے ایچ آئی وی اسکریننگ دے معاملے اچ مبینہ غفلت تے ایس او پیز دی خلاف ورزی تے قائم کیتی ڳئی انکوائری کمیٹی 8 ڈاکٹرز تے ہک سٹاف نرس کوں قصوروار قرار ݙیندیں ہوئیں انھاں دے خلاف پیڈا ایکٹ 2006 دے تحت محکمانہ کارروائی دی سفارش کر ݙتی اے۔ جاری کردہ انکوائری رپورٹ دے مطابق ڈاکٹر شہباز انور، ڈاکٹر عمر، ڈاکٹر ثانیہ سعید، ڈاکٹر نعیم اختر، ڈاکٹر فریحہ، ڈاکٹر ارسا عارف، ڈاکٹر علی جان، ڈاکٹر ابوذر تے اسٹاف نرس ردا زہرا کوں غفلت تے قواعد دی خلاف ورزی دا ذمہ دار قرار ݙتا ڳئے۔ رپورٹ اچ ݙسایا ڳیا جو چوک کمہاراں والا ملتان دے رہائشی مریض محمد شہباز دا آپریشن اوں ویلھے کیتا ڳیا ڄݙاں ایں دی ایچ آئی وی اسکریننگ رپورٹ ملݨں باقی ہئی جڈانجو بعد اچ مریض دا ایچ آئی وی ٹیسٹ مثبت آ ڳیا۔ وائس چانسلر ڈاکٹر مہناز خاکوانی دی ہدایت تے قائم کیتی ڳئی انکوائری کمیٹی اچ ڈاکٹر لبنیٰ اعظم، ڈاکٹر نور، مس طاہرہ غفار تے ڈاکٹر فیض شامل ہن۔ وائس چانسلر کمیٹی دی سفارشات ٻئٰ کارروائی کیتے سیکرٹری اسپیشلائزڈ ہیلتھ کیئر اینڈ میڈیکل ایجوکیشن کوں بھیج ݙتن۔ ہسپتال ذرائع دے مطابق مریض دا آپریشن 19 مئی کوں جنرل آپریشن تھیٹر نمبر 17 اچ کیتا ڳیا۔ ذرائع سوشل میڈیا تے گردش کرݨ آلی انھاں خبراں دی تردید کیتی اے جئیں اچ دعویٰ کیتا ڳیا ہئی جو مریض دے بعد ٻئے 17 افراد دے آپریشن کیتے ڳئے یا کہیں آپریشن تھیٹر کوں سیل کیتا ڳیا۔ اݙوں میڈیکل سپرنٹنڈنٹ ڈاکٹر راؤ امجد تمام 8 ڈاکٹرز تے نرس کوں معطل کریندیں ہوئیں فوری انکوائری دا حکم ݙے ݙتا جڈانجو ڈین سرجری ڈاکٹر مسعود ہراج آپݨے ویڈیو بیان اچ موقف اختیار کیتا جو مریض دے ݙو سابقہ آپریشنز اچ ایچ آئی وی رپورٹس منفی آئیاں ہن اتے انھاں اے تاثر وی مسترد کیتا جو آپریشن انھاں خود کیتا ہئی۔